Фарғонадаги  «M. C. I.» МЧЖдан давлат фойдасига 5.193.981.350 сўм давлат божини ундириш тўғрисидаги суд қарорининг ижро ҳужжати Ўзбекистон туман МИБ бўлими томонидан амалга оширилмоқда. 

Қарздор бир неча бор огоҳлантирилган бўлсада, қарзини тўламаган. Натижада унга тегишли «TOYOTA LANDCRUISER»  русумли автотранспорт воситаси хатланган.

Машинанинг дастлабки баҳоси  148 млн сўм қийматда онлайн аукцион савдосига чиқарилган ва аукцион савдоларида 226 млн сўмга сотилди.

«M. C. I.» МЧЖ нинг қолган мулклари ҳам сотилиш арафасида. Аукциондан тушган маблағлар қарздорликни қоплаш учун йўналтирилиши юзасидан ижро ҳаракатлари олиб борилмоқда.

17 апрель куни Яккабоғ туманида “Ласетти” ҳамда “Нексия” русумли автомашиналари иштирокида йўл транспорт ҳодисаси содир бўлган. Ҳодиса юзасидан Бош прокуратура матбуот хизмати раҳбари Ҳаёт Шамсутдинов darakchi.uz’га хабар берди.

Ҳолат бўйича прокуратура томонидан текшириш ҳаракатлари олиб борилмоқда. 

Ҳодиса натижасида ҳеч ким тан жароҳат олмаган.

Ҳодиса юзасидан судга оид автотехника ҳамда баҳолаш экспертизалари тайинланган.

Текшириш давом этмоқда.

Ўзбекистон Республикаси Президенти Шавкат Мирзиёев ва Тожикистон Республикаси Президенти Эмомали Раҳмон муштарак тарихий мерос, маънавий қадрият ва анъаналаримизни асраб-авайлаш ва тарғиб қилиш бўйича самарали фаолияти, шунингдек, биродар халқларимиз ўртасидаги дўстлик ришталарини мустаҳкамлашга қўшган муносиб ҳиссаси учун икки мамлакат маданият ва санъат арбобларининг бир гуруҳига фахрий унвон бердилар. Бу ҳақда Президент матбуот хизмати хабар берди.

Мамлакатимиз етакчисининг давлат ташрифи доирасида ушбу унвонлар билан тақдирлаш маросими бўлиб ўтди.

Тожикистон миллий консерваторияси ректори Мирали Дўстизода, Тожикистон миллий консерваторияси доценти Исмоил Назриев, Тожикистон Ҳукумати ҳузуридаги Телевидение ва радио қўмитасининг Ф.Шахобов номидаги «Шошмақом» ансамбли раҳбари Фурқат Саидзода, Бобожон Ғафуров тумани шошмақом ансамбли раҳбари Тўлқин Тожибоев, А.Жўраев номидаги Тожикистон давлат филармонияси «Фалак» ансамбли бадиий раҳбари Раҳматулло Ҳошимов «Ўзбекистон Республикаси халқ артисти» фахрий унвонига сазовор бўлди.

Ўзбекистон миллий мусиқа санъати институти «Мақом хонандалиги» кафедраси профессори Муножатхон Йўлчиева, Ўзбекистон Республикаси маданият вазири Озодбек Назарбеков, Ўзбекистон давлат филармонияси «Лазги» ашула ва рақс ансамбли бадиий раҳбари Оғабек Собиров ва хонанда Юлдуз Усмановага «Тожикистон халқ ҳофизи» фахрий унвони, Ўзбекистон миллий академик драма театри директори Ёдгор Саъдиевга «Тожикистон халқ артисти» фахрий унвони берилди.

Давлат раҳбарлари фахрий унвонлар нишонларини ўз соҳибларига тантанали равишда топширдилар.

Ўзбекистон Президенти Шавкат Мирзиёев ва Тожикистон Президенти Эмомали Раҳмон олий даражадаги музокаралардан сўнг оммавий ахборот воситалари вакиллари учун баёнот билан чиқдилар. Бу ҳақда Президент матбуот хизмати хабар қилди.

Ўзбекистон Президенти Тожикистон Президенти ва халқига ҳар доимгидек илиқ ва самимий қабул учун дилдан миннатдорлик билдирди.

Томонлар дўстлик ва ишонч муҳитида ўтган олий даражадаги учрашувлар якунларини юксак баҳоладилар.

— Яна бир бор таъкидлайман, Тожикистон Ўзбекистон учун энг яқин, ишончли, асрлар билан синалган стратегик шерикдир. Биродар ўзбек ва тожик халқлари кўп асрлик дўстлик ришталари билан чамбарчас боғланган. Бизни умумий тарих, маданий ва маънавий қадриятлар, анъана ва урф-одатлар бирлаштириб туради, — деди Шавкат Мирзиёев.

Қардош халқларимизнинг туб манфаатларига тўлиқ мос бўлган Иттифоқчилик муносабатлари тўғрисидаги шартноманинг имзоланиши ушбу ташрифнинг чинакам тарихий натижаси бўлгани қайд этилди:

— Бу қадам билан Ўзбекистон ва Тожикистон ўртасидаги кўп қиррали стратегик шериклик ва иттифоқчиликни чуқурлаштириш бўйича ортга қайтмас йўлдан юришга қатъий интилишимизни тасдиқладик. Ушбу муҳим ҳужжат, ҳеч муболағасиз, икки томонлама муносабатларда янги тарихий даврни англатади.

Савдо ва саноат кооперациясини кенгайтириш ҳамкорликнинг устувор йўналиши этиб белгиланди.

Кейинги йилларда бир неча ўн карра кўпайган товар айирбошлаш барқарор ўсиб бораётгани катта мамнуният билан қайд этилди.

Икки мамлакат ҳукуматлари  олдига товар айирбошлашни, шу жумладан учинчи мамлакатлардан импортнинг ўрини фаол тўлдириш орқали 2 миллиард долларга етказиш вазифаси қўйилди.

Куни кеча ўтган бизнес форумида салмоқли шартномалар ва битимлар тўплами имзолангани ушбу мақсадга хизмат қилади.

Шунингдек, “Ойбек-Фотехобод” чегараолди эркин савдо зонаси ва “Андархон” савдо-логистика марказини ташкил этиш ишларини жадаллаштириш муҳимлиги таъкидланди.

Олий даражадаги учрашувлар чоғида саноат кооперациясида, энг аввало, икки мамлакат бир-бирини тўлдириб турган анъанавий тармоқларда янги ўсиш нуқталари белгиланиб олинди.

Машинасозлик, энергетика, электротехника, металлургия, қазиб чиқариш, тўқимачилик, фармацевтика, агросаноат ва бошқа устувор тармоқлардаги қўшма лойиҳалар шулар жумласидан.

Бундай муҳим лойиҳаларни қўллаб-қувватлаш учун Ўзбекистон-Тожикистон инвестиция компаниясининг салоҳиятидан самарали фойдаланилади.

Сув-энергетика соҳасидаги ҳамкорликка алоҳида эътибор қаратилди. Трансчегаравий сув ресурсларидан биргаликда фойдаланиш соҳасида конструктив ҳамкорликни давом эттиришга тайёрлик билдирилди.

Ҳамкорликнинг яна бир стратегик йўналиши – икки мамлакат транспорт-транзит салоҳиятини ошириш учун қулай шароитлар яратиш.

Йўловчи ва юклар ташиш ҳажмини ошириш, замонавий чегараолди ва божхона инфратузилмасини яратиш бўйича қўшма чоралар кўрилади.

Ҳудудлараро ҳамкорлик салоҳиятини фаол ишга солиш зарурлиги қайд этилди.

Кўргазмалар, театрларнинг ижодий сафарлари, ёшлар ва таълим форумларини мунтазам ўтказиш, спорт дастурларини амалга ошириш, туризм хизматларини кенгайтириш орқали маданий-гуманитар алмашинувни чуқурлаштириш масалалари музокаралардан муҳим ўрин эгаллади.

Томонлар ушбу тарихий ташриф, унинг самарали натижалари ва имзоланган муҳим ҳужжатлар икки мамлакатнинг жадал тараққиётига хизмат қилиши, биродар Ўзбекистон ва Тожикистон халқларининг умумий фаровонлигини таъминлашига ишонч билдирдилар.

Ижтимоий тармоқларда «Rinotin kids» маҳсулоти тўғрисидаги хабарлар тарқалмоқда.

Санэпидқўмита Ахборот хизмати хабарига кўра, маҳсулотнинг рухсатномаси бекор қилинди.

Маълум қилинишича, Санэпидқўмита мутахассислари томонидан ушбу ҳолат юзасидан қонун доирасида ўрганиш ишлари олиб борилиб, аҳоли орасида овқатдан заҳарланиш ҳолатлари келиб чиқишининг олдини олиш мақсадида сироп маҳсулотларига берилган рухсатномалар бекор қилинди.

Шу билан биргаликда “CYNERGY PHARMCO” масъулияти чекланган жамиятига республика ҳудудларидаги барча савдо тармоқлари ҳамда дорихоналардаги “Rad Gida Laboratuvarive Ilac Sanayi Ticaret Limited” компанияси томонидан ишлаб чиқарилган  “Rinotin kids” сироп маҳсулотларини қайтариб олиш топшириғи берилиб, ижроси назорат остига олинди. Бугунги кун ҳолатига корхона томонидан 28 та дорихоналардан маҳсулотлар қайтариб олинди. Мазкур ҳолат юзасидан профилактик тадбирлар давом эттирилмоқда.

“Ҳурматли фуқаролар биологик қўшимчаларни харид қилишдан аввал уларнинг хавфсизлиги текширилганлиги тўғрисидаги маълумотларни  Санэпидқўмитанинг sanepid.uz сайтига жойлаштирилган электрон каталог орқали текшириб олишингизни тавсия қиламиз.

Эслатиб ўтамиз, агар сиз кундалик турмушда белгиланган санитария-қоида ва меъёрлари бузилиш ҳолатларига дуч келсангиз @Sanepidmurojaatbot га мурожаат қилишингиз мумкин”, — дейилади хабарда.

Президент Шавкат Мирзиёев БМТ Бош Ассамблеясининг 78-сессиясидаги нутқида 2024 йилда Ўзбекистонда хотин-қизларнинг бой салоҳиятидан фойдаланиш, жамият ҳаётининг барча жабҳаларида улар ўз имкониятларини рўёбга чиқаришида тажриба алмашиш мақсадида Осиё хотин-қизлари форумини ўтказишни таклиф қилган эди.

Шунга кўра, 2024 йилнинг 13-14 май кунлари Самарқанд шаҳрида “Хотин-қизларнинг иқтисодий, ижтимоий ва сиёсий ҳуқуқ ҳамда имкониятларини кенгайтириш масалаларига минтақавий ёндашув” мавзусида биринчи Осиё хотин-қизлари форуми ўтказилади. Бу ҳақда Хотин-қизлар қўмитаси матбуот хизмати хабар қилди.

Форумда Шарқий Осиё, Жануби-Шарқий Осиё, Жанубий Осиё ва Марказий Осиё мамлакатлари парламентларининг аёл аъзолари, ҳукуматлари аъзолари, давлат органлари ва фуқаролик жамияти институтлари вакиллари, аёллар ишбилармон доиралари вакиллари, сиёсатшунослар, ижтимоий фаоллар, олимлар, иқтисодиёт тармоқлари ва турли соҳалар вакиллари иштирок этадилар.

Форумдан кўзланган асосий мақсад – минтақада хотин-қизларнинг имконият ва салоҳиятини рўёбга чиқариш масалаларини муҳокама қилиш, уларнинг иқтисодиётдаги иштирокини янада кенгайтириш, ҳозирги замонда давлат ва жамият бошқарувида хотин-қизларнинг ролини мустаҳкамлаш масалаларида тажриба алмашиш учун ўзига хос мулоқот майдонини яратишдан иборат.

Президент Шавкат Мирзиёевга 2024 йилги хусусийлаштириш дастури ва унинг ижросини самарали ташкил этишга қаратилган чора-тадбирлар ҳақида ахборот берилди. Бу ҳақда Президент матбуот хизмати хабар қилди.

Шу йил 16 январь куни иқтисодиётни ривожлантириш масалалари бўйича ўтган видеоселектор йиғилишида Вазирлар Маҳкамасига янги хусусийлаштириш дастурини тайёрлаш вазифаси қўйилган эди. Шунга асосан, давлат иштирокидаги корхоналарнинг улушлари ва кўчмас мулк объектлари самарадорлик жиҳатидан таҳлил қилиниб, янги дастур ишлаб чиқилди.

Хусусан, иқтисодиётда давлат иштирокини қисқартириш мақсадида оммавий савдоларга чиқариладиган 250 га яқин улушлар рўйхати, давлат иштирокидаги корхоналарнинг қарийб мингта кўчмас мулк объекти рўйхати, маҳаллий фонд бозорида акцияларнинг оммавий таклифи ўтказиладиган 12 та корхона рўйхати шакллантирилди.

Илгари савдога қўйилган айрим иншоотлар сотилишида ҳам муаммолар бор. Буни жадаллаштириш ва иқтисодиётда хусусий сектор улушини ошириш мақсадида қатор енгилликлар белгиланмоқда.

Масалан, давлат активлари 3 ойда сотилмаганда (Тошкент шаҳри ва вилоят марказлари бундан мустасно) уларнинг бошланғич баҳоси 10 фоизигача босқичма-босқич пасайтирилади. 2024 йил 1 январгача аукцион орқали ижарага олганига камида 5 йил бўлган ва мажбуриятларини бажарган тадбиркорларга давлат мулкини баҳоланган қийматда сотиб олиш таклиф этилади.

Қишлоқ хўжалигига мўлжалланмаган ер участкалари 3 ойда сотилмаганда (Тошкент шаҳри ва вилоят марказлари бундан мустасно) бошланғич қиймати 30 фоизигача, 6 ойда сотилмаганда 10 фоизигача пасайтирилади. Тўловларнинг 15 фоизини 3 ой муддатда, қолган қисмини 10 йилгача муддатда бўлиб-бўлиб тўлаш имконияти яратилади.

Хусусийлаштириш дастурларига киритилган кўчмас мулкларнинг кадастр ҳужжатларидаги камчиликларни бартараф этиш учун тўловларни Хусусийлаштириш жамғармаси ҳисобидан амалга оширишга рухсат берилади.

Шунингдек, янги дастур доирасида, тадбиркорлик ва шаҳарсозлик фаолияти учун ҳамда халқаро автомобиль йўллари бўйида савдо ва сервис объектларини жойлаштириш учун савдоларга чиқариладиган ер участкаларининг рўйхатлари шакллантирилди ҳамда уларни савдога чиқариш соддалаштирилди.

Бу борада ҳам янги тартиблар белгилаш таклиф этилмоқда. Жумладан, мастер-режа асосида халқаро аҳамиятдаги автомобиль йўллари бўйида жойлашган ер участкалари замонавий сервис ва савдо-маиший объектларни қуриш учун аукционга чиқарилади. Сотилган ер участкалари харидорга чекловларсиз расмийлаштириб берилади.

Йиғилишда давлат иштирокидаги йирик корхоналарни трансформация қилиш ва хусусийлаштириш масалаларига алоҳида эътибор қаратилиб, буни жадаллаштириш бўйича таклифлар муҳокама қилинди.

Аграр соҳага хизмат кўрсатувчи давлат иштирокидаги корхоналарни хусусийлаштириш чора-тадбирлари ҳам кўриб чиқилди.

Давлатимиз раҳбари бу жараёнларни жадаллаштириш, хусусийлашган бино-иншоотлар негизида тадбиркорликни ривожлантириб, кўпроқ иш ўринлари очиш юзасидан кўрсатмалар берди.

Ўз соҳасида хусусий сектор улушини муттасил ошириб бориш, самарасиз фойдаланилаётган ва бўш турган активларни сотиш маҳаллий ҳокимлик ва тармоқ раҳбарларининг асосий вазифаларидан бўлиши кераклиги кўрсатиб ўтилди.

Февраль ойида кўчмас мулк бозорида фаоллик бироз ўсишидан сўнг, март ойида сезиларли пасайиш қайд этилди.

• Пойтахтда кўчмас мулк бозори 20,7%га пасайди.
• Иккиламчи бозор пасайишни бошлади, ойига ўртача нарх атиги 0,5%га ошди.
• Пойтахтнинг ижара бозоридаги фаоллик янада камайди.

Тошкент, 2024 йил 17 апрель. Иқтисодий тадқиқотлар ва ислоҳотлар маркази ўзининг шарҳида кўчмас мулк бозорида юз берган ўзгаришларни мунтазам таҳлил қилади.

Март ойида кўчмас мулк бозори фаолликнинг пасайиши билан ажралиб турди

Кўриб чиқилаётган даврда кўчмас мулкни сотиб олиш ва сотиш бўйича 17,8 мингта шартнома тузилди, бу февраль ойига нисбатан 20%га кам.

Жорий йилнинг I чораги якунларига кўра, кўчмас мулк бозори ўтган йилга нисбатан 0,3%га бироз ўсди. 2022 йилнинг I чорагига нисбатан 3%га сезиларли ўсиш қайд этилди.

Ҳудудий уй-жой бозоридаги вазият

Ҳудудлар бўйича кўчмас мулк бозоридаги фаолликнинг энг катта пасайиши Наманган ва Фарғона вилоятларида 27 ва 28%га, Қорақалпоғистон Республикасида эса 26%га қайд этилди.

Кўчмас мулк бозорининг қарийб 28%и Тошкент шаҳри ҳиссасисига тўғри келди, март ойида пойтахтда кўчмас мулк олди-сотдиси бўйича тузилган шартномалар сони 5,34 мингтани ташкил этди, бу ўтган ойга нисбатан 20,7%га кам.

Тошкентда уй-жой ижараси бозоридаги вазият

Март ойида пойтахтнинг уй-жой ижара бозорида харидорларнинг фаоллиги 2,2%га камайди ва 1 кв.м. учун 8,6 долларни ташкил этди.

Шайхонтохур, Яккасарой ва Миробод туманларида ижара нархи юқорилигича қолмоқда, бу ҳудудларда ижара нархи бир кв.м. учун 10,6 долларни ташкил этади.

Учтепа, Сергели ва Бектемир туманларида нисбатан арзон уй-жой ижараси сақланиб қолмоқда, бу ҳудудларда ўртача ижара нархи бир кв.м. учун 6,7 долларни ташкил этади.

Шу билан бирга, ўтган йилнинг март ойига нисбатан Тошкент шаҳрида ижара бозори 5,2%га қисқарган. Шундай қилиб, нархларнинг энг кўп пасайиши қайд этилган туманлар Яшнобод 10,3%, Миробод 10,9% ва Яккасарой 13,3% бўлди.

Иккиламчи уй-жой бозори

Март ойида иккиламчи уй-жой бозори февраль ойидаги 0,8%га нисбатан 0,5%га ўсди. Йиллик шартларда иккиламчи бозор нархлар 14,1%га ошди.

Тошкент шаҳрида – 24,8%, Бухоро – 25,1% ва Хоразм вилоятларда – 20,1%га сезиларли ўсиш қайд этилди.

Пойтахтда иккиламчи уй-жой нархларининг ўсиши ҳам секинлашди. Агар март ойида Тошкент шаҳрида иккиламчи уй-жойларнинг ўртача нархи 0,2%га ошган бўлса, февраль ойида ўсиш мос равишда 1,6%ни ташкил этди.

Нарх ўсишининг энг юқори суръатлари Бектемир – 3,3%, Олмазор – 1,8% ва Сергели – 1,8% туманларида қайд этилди.

Иккиламчи бозорда нарх параметрлари

Умуман олганда, йил давомида пойтахтдаги иккиламчи уй-жой бозори 14,3%га ўсди.

Иқтисодий тадқиқотлар ва ислоҳотлар маркази

Жамоатчилик билан алоқалар бўлими

Президент Шавкат Мирзиёев 16 апрель куни транспорт ва қурилиш лойиҳалари тақдимоти билан танишди. Бу ҳақда Президент матбуот хизмати хабар қилди.

Қайд этилишича, сўнгги йилларда Ислом Каримов номидаги Тошкент халқаро аэропорти модернизация қилиниб, йўловчиларга шароит яхшиланди. Хизмат турлари, рўйхатдан ўтказиш ва самолётга чиқиш йўлаклари кўпайтирилди. Умуман, уч йиллик реконструкция ишлари натижасида пойтахт аэропортининг жўнаб кетиш терминали майдони 56 минг квадрат метрдан 80 минг квадрат метргача кенгайди.

Ҳозирги кунда аэропортдаги учиб кетиш терминали реконструкция қилинмоқда. Бу уч босқичда амалга оширилиб, рўйхатдан ўтказиш, божхона ва хавфсизлик имкониятлари кенгайтирилади. Натижада йўловчиларга хизмат кўрсатиш қуввати соатига 1 минг 200 кишидан 2 минг 400 нафарга етади.

Шунингдек, Тошкент халқаро аэропортида янги карго терминалини қуриш режалаштирилган. Бунинг самарасида юкларга сифатли хизмат кўрсатиш қуввати 300 тоннага етади.

Маълумки, 2022 йил 29 августда Урганч шаҳрида Ал-Хоразмий шаҳарчаси қурилишига пойдевор қўйилган эди. У ерда кўп қаватли уйлар, мактаб ва боғчалар, спорт ва маданият марказлари, хиёбонлар, технопарк ва бошқа мажмуалар барпо этилади. Хусусан, шаҳарча марказида Ал-Хоразмий университети қурилади.

Лойиҳага кўра, бу олийгоҳда математика ва табиий фанлар, информатика, муҳандислик факультетлари бўлади, 4 минг талаба таълим олади. Университет қошида истеъдодли болалар учун ихтисослашган мактаб ҳам бўлади. Шу тариқа, бу ерда ўқиш, илм-фан ва ишлаб чиқариш интеграцияси йўлга қўйилиб, таълим кластери яратилади.

Тақдимотда университет концепциясини бойитиш бўйича фикр алмашилди. Ёшларнинг тадқиқотлари учун замонавий лабораториялар ташкил этиш, стартап лойиҳаларини тижоратлаштириш, рақамли технологиялар ва киберспорт йўналишларини жорий қилиш муҳимлиги таъкидланди.

Яна бир мутафаккир бобомиз Абу Райҳон Беруний ҳам халқимизнинг фахру ғурури. Унинг ҳаёт йўллари, жаҳон илм-фанига қўшган беқиёс ҳиссасини улуғлаш мақсадида, Президентимиз ташаббуси билан, Қорақалпоғистон Республикаси Беруний тумани марказида музей ташкил этиш режалаштирилган. У икки қаватли бўлиб, энг илғор қурилмалар билан жиҳозланиши, интерфаол усуллар қўлланилиши мўлжалланган. Музей олдидаги хиёбонда Берунийнинг муаззам ҳайкали ўрнатилади.

Тақдимотда мазкур лойиҳалар бўйича бир нечта таклифлар кўриб чиқилди. Мутасаддиларга лойиҳаларни такомиллаштириш, қулайликларни ошириш ва сифатли қуриш бўйича кўрсатмалар берилди.

2024 йилнинг май ойидан бошлаб электр энергияси ва табиий газга тарифлар ўзгариши муносабати билан кам таъминланган оилаларга ва айрим тоифадаги истеъмолчиларга ижтимоий ёрдамлар кўрсатилади. Бу ҳақда Ижтимоий ҳимоя агентлиги матбуот хизмати хабар қилди. 

Маълум қилинишича, 1 майгача бўлган муддатда ёқилғи-энергетика ресурслари нархлари ошишини ҳисобга олиб, минимал истеъмол харажатлари қийматини қайта кўриб чиқилади.

Бунда, 1 млнга яқин энг кам пенсия ва нафақа олувчиларнинг пенсия ва нафақа миқдорлари минимал истеъмол харажатлари қийматидан кам бўлмаган миқдорда қайта ҳисобланади.

Аҳолининг муҳтож қатламларини иситиш мавсумида қўшимча ижтимоий ҳимоясини таъминлаш учун 2024 йил ноябрда “Ижтимоий ҳимоя ягона реестри” ахборот тизими орқали болалар нафақаси ва моддий ёрдам тайинланган оилаларга 270 минг миқдорда бир марталик компенсация ажратилади.

Ушбу компенсация орқали, қарийб 1,5 млн. кам таъминланган оилаларнинг ижтимоий ҳимояси таъминланади.

Мазкур компенсация “маҳалла еттилиги” хулосалари асосида “Ижтимоий ҳимоя ягона реестри”га кирмаган қўшимча 200 мингдан ортиқ муҳтож оилаларга ҳам тўлаб берилади.

Бунда, “маҳалла еттилиги” томонидан муҳтож оилалар рўйхатлари уйма-уй юрган ҳолда шакллантирилади.

Электр энергияси ва табиий газ бўйича қуйидаги миқдорлардаги истеъмол учун базавий меъёр доирасидаги ҳамда базавий меъёрдан ошган нархлар ўртасидаги фарқ компенсация қилиб берилади:

табиий газ учун – ойига базавий меъёрдан ортиқ фойдаланилган 250 куб метргача;

электр энергияси учун – ойига базавий меъёрдан ортиқ фойдаланилган 150 кВт соатгача.

Ижтимоий меъёрдан ортган истеъмол учун компенсация олиш учун эҳтиёжманд оила “Инсон” ижтимоий хизматлар марказига ариза беради ва компенсация кейинги ойда ҳақиқий истеъмолидан келиб чиқиб тўлаб берилади.

Мазкур компенсация тўловлари Ўзбекистон Республикасининг Давлат бюджети маблағлари ҳисобидан Ижтимоий ҳимоя миллий агентлиги орқали тўлаб берилади.

МАНБА: DARAKCHI.UZ

Макроиқтисодий ва ҳудудий тадқиқотлар институти (МҲТИ) экспертлари томонидан 2017-2023 йилларда Ўзбекистонда цемент саноатининг ривожланиш динамикаси ўрганилди.

2017-йилда мамлакатимизнинг 5 та ҳудудида жойлашган 12 та корхонада 8,9 миллион тонна цемент ишлаб чиқарилганди. Цементга талабнинг юқорилиги, бозорни ривожлантиришнинг катта салоҳияти ва қулай ишбилармонлик муҳитини яратишга қаратилган давлат сиёсати соҳага янги инвесторлар эътиборини тортди.

2017-2023 йилларда турли ҳудудларда энергия тежовчи “қуруқ” технологиялар асосида 25 та янги цемент ишлаб чиқариш қувватлари ташкил этилди ва уларнинг умумий қуввати 26,6 миллион тоннага етди.

2023-йилда Ўзбекистонда 15,5 миллион тонна цемент ишлаб чиқарилди ва аҳоли жон бошига тўғри келадиган цемент миқдори 431 кг га етди. Бу кўрсаткич 2022-йилда дунё миқёсида 510 килограммни, Хитойда 1490 килограммни, Саудия Арабистонида 1460 килограммни, Вьетнамда 1220 килограммни, Туркияда 980 килограммни, Россияда 420 килограммни, АҚШда 280 килограммни ташкил қилган.

2023-йилда цемент ишлаб чиқариш ҳажми 2017-йилдагига нисбатан 74,1 фоизга, аҳоли жон бошига ишлаб чиқариш эса 55,6 фоизга ошди. Бу эса бозордаги талаб ва эҳтиёжлар тўлиқ таъминланмаганлигини кўрсатмоқда.

«Ўзбекистон — 2030» стратегиясида 2030-йилга қадар иқтисодиёт ҳажмини 2 баробарга кўпайтириш, шу жумладан маҳаллий хомашё базасидан самарали фойдаланиш, технологик ва инфратузилма инвестицияларини амалга ошириш белгиланган.

Ушбу вазифаларни бажариш учун цемент саноатида қуйидагиларни таъминлаш кўзда тутилган:
➖ мавжуд имкониятлардан самарали фойдаланиш;
➖ “яшил”, энергия тежайдиган технологияларни жорий этиш;
➖ ички ва ташқи бозорда талаб юқори бўлган махсус цемент турларини ишлаб чиқаришни сезиларли даражада ошириш;
➖ харажатларни камайтириш ва меҳнат унумдорлигини ошириш.

Айни пайтда бўлиб ўтаётган йиғилишда давлат раҳбари тармоқда фаолият юритаётган корхоналар раҳбарлари билан мулоқот қилиб, уларнинг муаммолари ва таклифларини эшитди. Бу ҳақда Президент матбуот хизмати хабар қилмоқда. 

Маълум қилинишича, мулоқотда тадбиркорлар:

— корхоналарда меҳнат унумдорлигини ошириш;

— қўшилган қиймат солиғини бир кунда қайтариш амалиётини кенгайтириш;

— бўялган мато экспортини кенгайтириш;

— экспортолди кредитлар олишни соддалаштириш;

— тўқимачилик корхоналарининг объектларини қуришда енгиллик бериш;

— корхоналарнинг арзон молиявий ресурсларга эҳтиёжини қондириш;

— мамлакатимизда ишлаб чиқарилган тўқимачилик маҳсулотларини оммалаштириш масалаларини кўтарди.

Давлат раҳбари билдирилган фикр ва таклифларни чуқур ўрганиб, тегишли чора-тадбирларни ишлаб чиқиш зарурлигини таъкидлади.

16 апрель куни Россия ҳудудида қонуний вакиллари (ота-оналари) бўлмаган ва ёрдамга муҳтож болалар Ўзбекистонга қайтарилди. Бу ҳақда “Дунё” ахборот агентлиги хабар берди.

Элчихона Ижтимоий ҳимоя миллий агентлиги ҳамда Ички ишлар ва Соғлиқни сақлаш вазирликлари вакиллари билан биргаликда 17 нафар вояга етмаган болани ватанга қайтаришда ёрдам кўрсатди. Элчихона томонидан уларга қайтиш учун бепул сертификатлар берилган.

“Қайтарилган барча болалар яқин қариндошларига ёки мамлакатдаги махсус болалар муассасаларига васийлик қилиш учун топширилади”,– дейилади хабарда. 

Ўзбекистоннинг Женевадаги БМТ бўлими ва бошқа халқаро ташкилотлардаги доимий вакили Элдиёр Тошматов БМТ Европа иқтисодий комиссияси (ЕИК) ижрочи котиби Татяна Молчан билан учрашди.

Европа иқтисодий комиссияси ижрочи котибига республикада амалга оширилаётган кенг кўламли ислоҳотлар ҳақида батафсил маълумот берилди.

Татяна Молчан мамлакатимизнинг кейинги йилларда иқтисодий соҳада эришган ютуқлари, икки томонлама ҳамкорлик мустаҳкамланаётганини юқори баҳолади. «Мен ЕИ ва Ўзбекистон ўртасидаги савдо, инновациялар, энергетика, экология, статистика ва бошқа соҳаларни ривожлантириш каби жуда яқин ҳамкорликни юксак қадрлайман», деди у.

ЕИК ижрочи котиби Комиссия Ўзбекистонни ўз ваколатлари доирасидаги барча соҳаларда қўллаб-қувватлашга содиқлигини тасдиқлади. Ўзбекистонда Барқарор ривожланиш мақсадларини амалга оширишга кўмаклашиш бўйича ўзаро манфаатли ишларнинг кўплаб йўналишлари, жумладан, давлат-хусусий шериклик, барқарор қўшилган қиймат занжири, инновациялар ва бошқа соҳалардаги ишларнинг натижалари алоҳида таъкидланди.

Татяна Молчан, шунингдек, 2024 йил 2-3 май кунлари бўлиб ўтадиган III Тошкент халқаро инвестиция форумида иштирок этишини ва ташриф давомида республика вазирлик ҳамда идораларида икки томонлама ҳамкорликни янада ривожлантириш бўйича бир қатор учрашувлар ўтказишини билдирди.

Жиззах вилоятининг Шароф Рашидов туманида автобус ариққа тушиб кетди. Бу ҳақда вилоят ИИБ ахборот хизмати хабар берди.

Маълум қилинишича, 15 апрель куни соат 17:00 ларда Шароф Рашидов тумани «Қўшкўприк» маҳалласи ҳудудидан ўтган автомобиль йўлида йўловчи ташувчи автобус ариққа тушиб кетган.

Олиб борилган суриштирувлар натижасида автобус ичида йўловчилар бўлмагани аниқланган. Ҳайдовчига эса биринчи тез тиббий ёрдам кўрсатилган.

Тошкент шаҳрининг Сергели туманидаги мактабда ўқитувчи хато қилган ўқувчиларини жазолашда шафқатсизлик қилиб, уларнинг қўлига игна ва “саморез” санчиб келгани маълум бўлди.  

Воқеа тумандаги 277-мактабда содир бўлгани айтилмоқда.

Шаҳзода қизим мактабнинг биринчи синфида ўқийди. Унинг ўқитувчиси С.Р. болаларни жазолаш учун уларнинг қўлига игна, “саморез” санчиб, шафқатсизлик қилиб келган экан. Бу ҳақда ота-оналар яқинда билдик, — дейди ўзини Дилором Маҳмудова деб таништирган она.  

Мурожаатчи онанинг билдиришича, ҳолат 2023—2024-ўқув йили бошидан бери такрорланиб келган.  

Болаларимизга “бу ҳақда кимгадир айтсанг, бундан баттарини қилиб, қўлингга мих тиқаман” деб қўрқитган экан, — дейди она.  

Яна бир суҳбатдошнинг маълумот беришича, ўқитувчи эндигина биринчи синфга чиққан ўқувчиларнинг хатоси учун шундай жазолаш усулини танлаган.  

Биринчи синф ўқувчиси эндигина ҳарф таниётган бўлса, ўқитувчи болалар қилган ҳар бир имловий хато учун уларнинг қўлига игна ва “саморез” санчиб, болаларимизнинг жонини оғритган. Бу ҳолат анчадан бери содир бўлиб келган. Болалар қўрқитилгани учун бизга айтмаган, — дейди Муҳаммадамин исмли жияни шу мактабда ўқишини айтган суҳбатдош.  

Билдирилишича, ота-оналар ҳолатдан норози бўлиб, бугун, 16 апрель куни мактаб директори қабулига кирган. Директор ҳолат у мактабда йўқ пайтида содир этилганини айтиб, “сувдан қуруқ чиқиш”га уринган.  

Директор ўқитувчига ҳайфсан берганини айтди, ўқитувчи бўшаш ҳақида ариза ҳам ёзибди. Лекин хатосини тан олгиси йўқ. У шу йўл билан болаларимизни ўқитаётганини, билим бераётганини айтмоқда, — дейди ота-оналар.

Ташриф чоғида икки томонлама ҳамкорлик ва икки давлат ўртасидаги дўстона муносабатларни мустаҳкамлаш масалалари муҳокама қилиниши кутилмоқда.

Ўзбекистон Президенти Шавкат Мирзиёев 18-19 апрель кунлари расмий ташриф билан Тожикистонга бориши кутилмоқда. Бу ҳақда Ўзбекистоннинг Тожикистондаги элчихонаси Asia Plus’га маълум қилган.

Таъкидланишича, ташриф чоғида икки томонлама ҳамкорлик ва икки давлат ўртасидаги дўстона муносабатларни мустаҳкамлаш масалалари муҳокама қилиниши кутилмоқда.

Эслатиб ўтамиз, кеча Тожикистон Ташқи ишлар вазирлиги раҳбари Сирожиддин Муҳриддин Тошкентда «Марказий Осиё – Араб давлатлари ҳамкорлик кенгаши» стратегик мулоқоти ташқи ишлар вазирларининг иккинчи йиғилиши доирасида Ўзбекистон ташқи ишлар вазири Бахтиёр Саидов билан учрашган.

Учрашувда томонлар икки томонлама муносабатларнинг бугунги ҳолати ва истиқболлари ҳамда халқаро ва минтақавий ташкилотлар доирасидаги ҳамкорликни муҳокама қилдилар.

Томонлар Ўзбекистон Президентининг Тожикистонга давлат ташрифига тайёргарлик кўриш билан боғлиқ масалаларни ҳам кўриб чиқдилар, дея хабар берди Тожикистон Ташқи ишлар вазирлиги. 

Жорий йилнинг 15 апрель куни Тошкентда «Марказий Осиё ва Кўрфаз араб давлатлари ҳамкорлик кенгаши» стратегик мулоқоти ташқи ишлар вазирларининг иккинчи йиғилиши бўлиб ўтди.

Унда Ўзбекистон, Қирғизистон, Қозоғистон, Тожикистон, Туркманистон, БАА, Баҳрайн, Қатар, Кувайт, Саудия Арабистони, Ўмон ва Озарбайжон (фахрий меҳмон) делегациялари иштирок этди.

Йиғилишда давлатлар ўртасида сиёсий, хавфсизлик, савдо-иқтисодий, инвестиция ва бошқа соҳаларда ҳамкорликни мустаҳкамлаш масалалари муҳокама қилинди.

Ушбу саммит доирасида Ўзбекистон президенти томонидан олға сурилган минтақавий ҳамкорликни ривожлантиришга қаратилган бир қатор ташаббуслар, хусусан Дўстлик, минтақалараро боғлиқлик ва ҳамкорлик битимини қабул қилиш таклифи долзарб ва муҳим эканлиги алоҳида қайд этилди.

Шунингдек, вазирлар долзарб халқаро ва минтақавий масалалар, хусусан Афғонистон, Яқин Шарқдаги вазият, Фаластин—Исроил можароси ва бошқа бир қатор мавзулар бўйича атрофлича фикр алмашдилар.

Йиғилиш якуни бўйича Қўшма баёнот қабул қилинди.