Ўзбекистон миллий терма жамоасининг ўйинларини жонли томоша қилиш учун мамлакат бўйлаб 220 та мактаб ҳудудида махсус «Мухлислар майдони» (Fan Zone) ташкил этилади.
Мазкур ташаббус доирасида футбол ишқибозлари терма жамоа иштирокидаги баҳсларни катта экранлар орқали жамоавий тарзда кузатиш имкониятига эга бўлади. Шунингдек, мухлислар биргаликда миллий жамоани қўллаб-қувватлаб, футбол байрами муҳитини ҳис қилишлари мумкин.
Таъкидланишича, ташкил этилаётган мухлислар майдонлари турли ҳудудлардаги аҳоли, айниқса ёшлар ўртасида футболга бўлган қизиқишни янада ошириш, спорт маданиятини ривожлантириш ҳамда миллий терма жамоа атрофида бирдамлик муҳитини мустаҳкамлашга хизмат қилади.
Ушбу майдонларда Ўзбекистон терма жамоасининг муҳим учрашувлари катта экранларда жонли эфир орқали намойиш этилиши режалаштирилган.
