Ўзбекистон ҳуқуқни муҳофаза қилувчи органлари фуқароларни Жанубий Кореяга ишга жўнатиш билан боғлиқ фирибгарлик ҳолатларига қарши курашни давом эттирмоқда. Бош прокуратура ҳузуридаги Иқтисодий жиноятларга қарши курашиш департаменти ҳамда Миграция агентлиги томонидан ноқонуний равишда пул йиғиш билан боғлиқ янги ҳолатлар фош этилди.
Энг йирик ҳолат Қашқадарё вилоятининг Косон туманида қайд этилди. Компаниялардан бири раҳбари ўзининг юқори лавозимли танишлари орқали 48 нафар фуқарони Жанубий Кореяга ишга жойлаштириб беришни ваъда қилган. Тергов маълумотларига кўра, у олинган маблағлардан 28,8 минг долларни ноқонуний равишда ўзлаштирган.
Шунга ўхшаш ҳолатлар Қарши шаҳри, Китоб тумани, Сурхондарё, Навоий, Бухоро, Фарғона ва Наманган вилоятларида ҳам аниқланган. Гумонланувчилар фуқаролардан ҳужжатларни расмийлаштириш, ишга жойлаштириш ёки зарур имтиҳонлардан ўтишга кўмаклашиш баҳонасида ўнлаб минг доллар маблағ олгани маълум қилинди.
Аниқланган барча ҳолатлар бўйича фирибгарлик ва пора беришга суиқасд қилиш моддалари билан жиноят ишлари қўзғатилган. Ҳозирда тергов ҳаракатлари олиб борилмоқда.
Эслатиб ўтамиз, май ойида ҳуқуқни муҳофаза қилувчи органлар Ўзбекистон фуқароларини Жанубий Кореяга ишга юбориш билан боғлиқ йирик коррупцион схемани фош этгани ҳақида хабар берган эди. Тергов маълумотларига кўра, унда собиқ Ташқи меҳнат миграцияси агентлиги ходимлари ва хусусий бандлик агентликлари вакиллари иштирок этган. Фақат бир жиноят иши доирасида ноқонуний олинган маблағлар ҳажми 90 миллион доллар деб баҳоланган.
