Мамлакатимиз элчихонаси кўмагида Эрон маданият вазирининг ўринбосари, Кино ташкилоти раҳбари Муҳаммад Хазаий бошчилигидаги ушбу давлат делегациянинг “Ипак йўли дурдонаси” XV Тошкент халқаро кинофестивалида иштироки ташкил этилди.
Эрон делегациясини Ўзбекистон маданият вазири Озодбек Назарбеков қабул қилди. Учрашувда икки мамлакат ўртасида маданият ва кино соҳасида ҳамкорлик алоқаларини ривожлантириш масалалари муҳокама қилинди.
Ўзбекистон ва Эрон ўртасидаги тарихий алоқаларни инобатга олиб, Алишер Навоий ва Шарофиддин Али Яздий каби буюк аждодларимиз ҳақида ҳамкорликда фильмларни суратга олиш масалалари хусусида фикр алмашилди.
Муҳаммад Хазаий Ўзбекистон Марказий Осиёнинг сиёсий ва маданий соҳада энг илғор мамлакати эканини таъкидлаб, ўзининг тарихий, маданий ва диний илдизлари билан халқаро ҳамжамиятда муҳим ўрин тутишини алоҳида таъкидлади. “Маданий муштараклик икки мамлакат халқлари ўртасидаги алоқаларни мустаҳкамлашнинг фундаментал асосидир. Икки мамлакат цивилизациялари бир-бирига боғланган. Ўзбекистонликлар учун Машҳад, Сабзевар, Исфаҳон, Теҳрон, Табриз, Шероз, Нишопур, Кирмон шаҳарлари машҳур бўлса, Эрон халқи учун Самарқанд, Бухоро, Хива, Термиз, Фарғона ва Тошкент шаҳарлари жуда азиз”, деди Эрон маданият вазирининг ўринбосари.
Муҳаммад Хазаий, шунингдек, Ўзбекистон ва Эронда ўзаро кино ҳафталикларини ўтказиш таклифини билдирди.
Учрашув якунида Ўзбекистон Кинематография агентлиги ва Эрон Кино ташкилоти ўртасида Ҳамкорлик меморандуми имзоланди.
Ҳужжат Ўзбекистон Кинематография агентлиги директори Фирдавс Абдухолиқов ва Эрон Кино ташкилоти раҳбари Муҳаммад Хазаий томонидан имзоланди.
