-2.7 C
Узбекистан
Воскресенье, 25 февраля, 2024
Домой Блог

Австралия Ўзбекистонга янги элчи тайинлади

Ўзбекистон ташқи ишлар вазири Бахтиёр Саидов кеча Австралия элчиси этиб тайинланган Жон Гирингни (қароргоҳи Москва шаҳрида) қабул қилди.

“Австралиянинг Ўзбекистондаги Элчиси Жон Гиринг жаноблари билан учрашиб, унинг ишонч ёрлиқлари нусхаларини қабул қилдик, — деб ёзди Ўзбекистон ТИВ раҳбари ўзининг telegram каналида. — Учрашувимиз кун тартиби ўзаро савдони кенгайтириш, ҳамкорликнинг янги имкониятларини излаш ҳамда айрим минтақавий ва халқаро масалаларни қамраб олди”.

Бундан аввал Австралиянинг Ўзбекистондаги элчиси лавозимида Грейм Михан (2020-2024 йиллар) фаолият юритган эди.

Танзила Норбоева Ўзбекистонда меҳмон бўлиб турган қатор давлатлар омбудсманлари билан учрашди

Сенат Раиси Танзила Норбоева Олий Мажлиснинг Инсон ҳуқуқлари бўйича вакили (омбудсман) институтининг 29 йиллиги муносабати билан ўтказилган халқаро конференцияда иштирок этиш учун мамлакатимизда меҳмон бўлиб турган Венгрия, Италия, Қирғизистон, Марокаш, Мўғулистон, Туркия омбудсманлари билан учрашув ўтказди.

Инсон ҳуқуқларини таъминлаш соҳасида ҳамкорлик алоқаларини мустаҳкамлаш, халқаро мажбуриятлар бажарилишини таъминлаш бўйича ўзаро тажриба алмашиш масалалари муҳокама қилинди.

Маълумот ўрнида таъкидлаш лозим, Ўзбекистон Омбудсмани томонидан дунёдаги 50 га яқин мамлакатларнинг, шу жумладан Америка, Европа, Осиё, МДҲ давлатларининг омбудсманлари билан ҳамкорлик алоқалари ўрнатилган.

Даставвал мамлакатимизда инсон ҳуқуқларини ҳимоя қилиш соҳасида амалга оширилаётган ислоҳотлар, Омбудсман томонидан фуқароларнинг ҳуқуқ ва манфаатларини самарали ҳимоя қилиш борасида қўлланилаётган таъсир чоралари ва механизмларига тўхталиб ўтилди.

Инсон ҳуқуқлари соҳасига оид меъёрий ҳужжатларнинг қабул қилиниши ва такомиллашиб бориши Омбудсман институтига фуқароларнинг ҳуқуқлари ва қонуний манфаатларини ҳимоя қилишдаги ваколатлари ҳамда натижадорлигининг ошишига туртки бўлгани айтиб ўтилди.

Ўз навбатида, меҳмонлар Ўзбекистонда инсон ҳуқуқ ва эркинликларини таъминлаш йўналишида амалга оширилаётган кенг кўламли ислоҳотларни юксак баҳолаб, янги таҳрирдаги Конституцияга мувофиқ Омбудсман институтига қонунчилик ташаббуси сифатида парламент қуйи палатасига қонунчиликка оид таклифларни киритиш ҳуқуқи берилганлигини эътироф этдилар.

Конструктив ва амалий руҳда кечган учрашув якунида хорижий давлатларнинг омбудсманлари билан ўзаро тажриба алмашиш ҳамда ҳамкорлик алоқаларини янада кенгайтиришни давом эттиришга келишиб олинди.

МАНБА: Халқ сўзи

1 мартдан бошлаб “Ҳар бир маҳалладан икки нафар дастурчи” дастури жорий этилади

Ўзбекистон Республикаси Президентининг 2024 йил 21 февралда “Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида”ги фармони қабул қилинди.

Ҳужжатга кўра, 2024 йил 1 мартдан бошлаб “Ҳар бир маҳалладан икки нафар дастурчи” дастури жорий этилади.  

Ушбу дастур доирасида маҳаллаларда ёшлар етакчилари томонидан маҳалла фаоллари иштирокида ахборот технологиялари ва компьютер дастурлаш соҳасига қизиқувчи ёшлар аниқланиб, уларни инглиз ва бошқа хорижий тилларга ўқитиш ҳамда сертификатлар олишини ташкил этиш, сертификат олган ёшлар тўғрисида маълумотларни Рақамли технологиялар вазирлигининг махсус ахборот тизимига киритиб бориш амалиёти жорий қилинади.  

Рақамли технологиялар вазирлиги, Камбағалликни қисқартириш ва бандлик вазирлиги томонидан махсус ахборот тизимига киритилган ёшларни IT соҳасида фаолият юритаётган ташкилотларга йўналтириш ва ишга жойлаштиришга кўмаклашиш чоралари кўрилади.  

МАНБА: ЎзА

Ўзбекистонда аҳолига кредит бериш талаблари кучайтирилади

Марказий банк раиси Мамаризо Нурмуратов 2024 йил 1 июлдан бошлаб Ўзбекистон банклари учун аҳолига кредит бериш бўйича талаблар кучайтиришга оид қарорни имзолади.

Унга кўра, қарор билан қарз юки кўрсаткичи жорий этилмоқда, у ўртача кредит тўловларининг қарз олувчининг ўртача ойлик даромадига нисбати орқали ҳисобланади.

Қарз юки кўрсаткичи — бу қарз олувчи ўртача ойлик даромадининг солиқлар чегириб ташлангандан кейин барча кредитлари ва қарзлари бўйича шартнома тўловларини амалга ошириш учун зарур бўлган улуши ҳисобланади. Паст ҚЙК қиймати қарз олувчининг даромадлари ва харажатлари баланси мавжуд кредитлар бўйича тўловларни ўз вақтида тўлашга имкон беришини кўрсатади. Юқори даража эса ортиқча қарзни билдиради, яъни қарз олувчи ҳар ой даромадининг асосий қисмини қарзни тўлашга сарфлашга мажбур бўлади.

Маълумот ўрнида, ҳозир Ўзбекистонда қарз юки талаби фақат микрокредитларга нисбатан қўлланади ва 50 фоизни ташкил этади. 2024 йил 1 июлдан бошлаб барча кредитларни (шу жумладан, микрокредитларни) беришда кредиторлар ўз мижозларининг қарз юки 60 фоиздан ошмаслигини таъминлаши шарт.

2025 йил 1 январдан бошлаб бу кўрсаткич 50 фоизгача қисқартирилади.

Қарз юкини барча кредитлар контекстида ҳисоблашни жорий этиш орқали регулятор аҳоли даромадларини легаллаштиришга эришиш, ўз даромадларини қонунийлаштирган қарз олувчиларни кредитлашни рағбатлантириш, норасмий даромадларни баҳолашни расмийлаштириш ва банкларни масъулиятли кредитлашга жалб этишни мақсад қилган.

Хоразмда 1,4 млрд сўм кредитни ноқонуний хорижга олиб чиққан шахслар аниқланди

Бош прокуратура ҳузуридаги Департаментнинг Хоразм вилоят бошқармаси томонидан ўтказилган терговга қадар текширувда “A.D.” оилавий корхонаси масъул шахслари давлат кафолати остида олинган кредит маблағлари ҳисобидан импорт қилинган парранда боқиш ускуналарининг нархини сунъий равишда ошириб, аслида бозор баҳоси 1,1 млрд сўм бўлган 25,9 минг парранда боқишга мўлжалланган ускуналарни гўёки 50 минг бош парранда боқишга мўлжалланганлигини кўрсатиб, ҳудудий тижорат банки филиалидан ажратилган 2,5 млрд сўм кредитни “Sh.Y.” хорижий компаниясига ўтказишга эришиб, жами 1,4 млрд сўм кредит маблағини ўзлаштириш йўли билан талон-торож қилганликлари аниқланган.

Мазкур ҳолат юзасидан Жиноят кодексининг 167-моддаси (ўзлаштириш ёки растрата йўли билан талон-торож қилиш) ва 205-моддаси (ҳокимият ёки мансаб ваколатини суиистеъмол қилиш) билан жиноят иши қўзғатилиб, тергов ҳаракатлари ўтказилмоқда, дейилади хабарда.

ЖССТ: Дунё мамлакатларининг ярмидан кўпида қизамиқ эпидемияси кузатилиши мумкин

Жаҳон соғлиқни сақлаш ташкилоти, агар шошилинч чоралар кўрилмаса, 2024 йил охирига келиб, дунё мамлакатларининг ярмидан кўпида қизамиқ эпидемияси тарқалиш хавфи жуда юқори эканлигидан огоҳлантирди.

Чунки ушбу касаллик ҳозиргача Шимолий ва Жанубий Америка қитъаларидан бошқа барча минтақаларда қайд этилди.

Мутахассислар хулосасига кўра, эпидемиологик вазият ёмонлашуви коронавирус пандемияси даврида қизамиққа қарши эмлаш тадбирлари етарли даражада ташкил этилмагани оқибатидир.

Хусусан, 2022 йили дунё бўйича эмлаш қамрови 2021 йилга нисбатан бироз ошган бўлсада, аммо шунда ҳам 33 миллион бола мазкур хасталикка қарши вакциналар дозалари билан қамраб олинмади. 22 миллион нафарга яқин ўғил-қиз уларнинг биринчи дозасини, 11 миллион нафари иккинчи дозасини қабул қилишдан четда қолган.

«2024 йилги эмлаш дастурларида ҳам катта бўшлиқлар бор, — дейди ЖССТ вакили Наташа Кроукрофт. — Агар ҳолат шундай давом этса, миллионлаб болаларимиз бундан жабр кўриши мумкин.

Бугун сайёрамиз бўйича қизамиқнинг ўсиш динамикаси кузатиляпти. Айниқса ўрта даромадли мамлакатларда аҳвол қониқарли эмас. Биз 2019 йилги ҳолат такрорланишидан хавотирдамиз”.

Эслатиб ўтамиз, 2019 йили Ер юзида қизамиқ билан касалланиш даражаси кескин ошиб, сўнгги 23 йилдаги рекорд кўрсаткичга етганди (869 мингта ҳолат). Энг ёмони, ўша йили бу хасталикдан ўлим статистикаси ҳам 2016 йилга нисбатан деярли 50 фоизга кўпайди (207 минг ҳолат).

2023-йилда Ўзбекистонда саноат маҳсулотларини ишлаб чиқариш 6 фоизга ошди

Макроиқтисодий ва ҳудудий тадқиқотлар институти (МҲТИ) экспертлари 2023-йилда саноат соҳасида эришилган ўсишнинг асосий омилларини таҳлил қилди. 

2023-йил якунлари бўйича саноат маҳсулотларини ишлаб чиқариш 6 фоизга ошди ва барча муҳим тармоқларда ўсиш суръатига эришилди. 

Саноат соҳасидаги ўсишнинг интенсивлиги 2022-йилдагига нисбатан 0,8 фоиз пунктига юқори бўлди. ЯИМ таркибида саноатнинг улуши 26,1 фоизни ташкил этди ва қўшилган қиймат ҳажми бўйича хизмат кўрсатиш соҳасидан сўнг иккинчи ўринни эгаллади.   

Саноат соҳасидаги ўсишнинг асосий драйвери бўлган ишлаб чиқариш саноати таркибий ўзгаришларнинг энг яхши суръатини намойиш этди. Мазкур тармоқда маҳсулот ишлаб чиқариш 6,7 фоиз ошди ва умуман, саноат бўйича ўртача ўсиш индексидан 0,7 фоиз пунктига юқори бўлди. Бу эса тармоқнинг саноат таркибидаги улушини 84,4 фоиз (1,2 фоиз пункти) гача ошириш имконини берди. 

Ишлаб чиқариш саноатининг жадал ривожланиши асосида ишлаб чиқаришнинг ривожланишини ортда қолдирувчи интилиш ётади. Буни нефтни қайта ишлаш (127,1 фоиз), металлургия (106,4 фоиз), қурилиш материаллари саноати (111,3 фоиз) каби тармоқларда кўриш мумкин. Уларда ўсиш суръати 2022-йилдагига нисбатан сезиларли даражада юқори бўлди.  

Саноат маҳсулотларини ишлаб чиқаришдаги ўсишнинг ярмидан ортиғи (53,4 фоиз)  машинасозлик маҳсулотлари (107,4 фоиз), тўқимачилик маҳсулотлари ва кийим-кечаклар  (107,2 фоиз), салқин ичимликлар ва тамаки маҳсулотлари (105,9 фоиз) ни ишлаб чиқарувчи корхоналар ҳисобига таъминланди. 

Гарчи рақобатлашувчи импорт ҳажмининг ортиши туфайли ўсиш интенсивлиги ўтган даврдаги билан таққослаганда бироз секинлашган бўлсада, истеъмол маҳсулотларини ишлаб чиқариш ҳажмининг ортиши (107,3 фоиз) билан боғлиқ ижобий ўзгариш саноат ривожланишидаги асосий омиллардан бири бўлди. 

Ҳудудлар рейтингида ишлаб чиқарилаётган маҳсулотлар ҳажмида истеъмол товарларининг энг катта улуши Андижон вилояти (умумий ҳажмга нисбатан 27,3 фоиз), Тошкент шаҳри (20,8 фоиз), Тошкент вилояти (11,9 фоиз) да қайд этилди. Бошқа ҳудудларда истеъмол товарларини ишлаб чақришда катта захиралар сақланиб қолмоқда. 
 
Хорижий инвестициялар иштирокидаги корхоналар фаолиятининг қиёсий таҳлили саноат ишлаб чиқаришида уларнинг улуши Қорақалпоғистон Республикаси (51,1 фоиз), Самарқанд вилояти (42,3 фоиз), Тошкент шаҳри (30,2 фоиз), Фарғона вилояти (25,4 фоиз) да энг катта эканлигини кўрсатди. Бу кўрсаткич бошқа ҳудудларда 5,7 фоиздан 19,7 фоизгача оралиқни, умуман олганда эса саноат бўйича 21,7 фоизни ташкил этди. Бу 2022-йилдагига нисбатан 3,3 фоиз пунктига паст. 

Электр таъминотида ишлаб чиқаришдаги сезиларли ўсиш кўрсаткичи (109,7 фоиз) га эришилди. Бу саноат тармоқлари орасидаги энг яхши кўрсаткичлардан бири бўлди. Тоғ-кон саноатида ўсиш суръати 101 фоизни ташкил этди. Тармоқ истиқболи фойдали қазилмаларни қазиб олиш бўйича устувор лойиҳаларни амалга ошириш самарадорлиги билан белгиланади. 

Зарар ва қолиб кетган тўловларнинг ортиб бориш суръати секинлашиши таҳлил этилаётган даврнинг ўзига хос жиҳатидир. Бунинг натижасида кредитлар бўйича қарзларнинг қайтарилмаслик хавфи 2022-йилдагига нисбатан камроқ бўлди. 

Таҳлил этилаётган даврнинг қийинчиликларига қарамасдан, корхоналар янги энергетик тарифларга аста-секин мослашаяпти. Маҳсулотларни ишлаб чиқариш харажатларини камайтириш бўйича кўрилган чора-тадбирлар туфайли шундай имконият пайдо бўлмоқда.

Жорий даврдаги чора-тадбирлар қуйидаги мақсадларга қаратилган:

➖ ЯИМ таркибида саноатдаги қўшилган қийматнинг сезиларли даражада ўсиши учун шарт-шароитларни бундан кейин ҳам такомиллаштириш;
➖ ички ва ташқи бозордаги ўрнини сақлаб қолиш мақсадида ишлаб чиқарилаётган маҳсулотларнинг рақобатбардош нархини ушлаб туриш учун таннархни камайтириш;

Фарғонада келинни алдаб, тўй куни қочиб кетган куёв 6 йилга қамалди

Икки ёш қанча вақтдан мобайнида гаплашиб юришади. Тўй белгиланиб, барчага таклифномалар тарқатилгач тўй куни куёв ғойиб бўлади.

Мазкур иш бўйича ЖИБ Қува тумани судида бир аёлни алдаб, пулларини ўзлаштирган куёвга суд ҳукми ўқилди. 

Қайд этилишича, фарғоналик Д.Сафарова телевизор кўриб ўтириб, ТВ рекламасида эълон қилинган маҳсулотни буюртма бериш учун кўрсатилган рақамга қўнғироқ қилади. Орадан бир неча кун ўтиб ўзини реклама қилинган маҳсулот корхонасидан дея таништирган К.Шуҳратов (тарафларнинг исми-фамилияси ўзгартирилган) телефон қилиб, унинг буюртмаси бўйича айрим масалаларни аниқлаб олиши кераклигини айтиб суҳбат бошлайди.

К.Шуҳратов суҳбат давомида Д.Сафарованинг ўқишни тамомлаб ишлаётгани, турмушга чиқмагани, оиласи ва бошқа маълумотларни батафсил сўраб олади. Шундан сўнг, К.Шуҳратов ўзининг ғараз мақсадини амалга ошириш режасини тузади ва бир неча кундан сўнг Тошкентдан Марғилон шаҳрига келади.

Д.Сафарова уни излаб келган К.Шуҳратовни кўргач, гўёки «бир неча йилдан буён ўзи кутган инсонни учратгандек бўлади». Йигитнинг барча талабларини ҳеч шубҳаланмай бажаради. Жумладан, К.Шуҳратов унга уйланиш мақсадида «уйини таъмирлаш учун» пул сўраганда, тўплаб юрган барча пулларини беради. Йигит уни деб тайёр ишини ташлаб келганини айтади, келгусида таксичи бўлиб ишлаши учун машина сотиб олишга ёрдам сўраганда, ҳеч иккиланмай ота-онасидан пул олиб беради.

Бундан ташқари кредит дўконларидан ва тижорат банкларидан пул ҳамда турли товарлар олиб беришни илтимос қилади. Д.Сафарова бу талабларни ҳам бажаради.

Маълум қилинишича, К.Шуҳратов Д.Сафарова тўйгача никоҳдан ўтиб, яшаб туриш таклифини беради. Сўнг, Д.Сафарова никоҳ ўқитиб ўз уйидан К.Шуҳратовга жой беради. Рўзғор харажатларини барчасини Д.Сафарованинг ўзи кўтаради.

Д.Сафарованинг ота-онаси ва ака-укалари «куёвдан» тўй қилишни, никоҳни эл-юртга ошкор қилишни сўрай бошлайди. К.Шуҳратов Фарғона шаҳридаги тўйхонада дабдабали тўй қилишига Д.Сафарова ва унинг яқинларини ишонтириб, тўй кунини белгилайди. Ҳатто таклифномаларни Д.Сафарованинг яқинларига тарқатиб, ҳаммани тўйга таклиф этади.

Шундан сўнг, К.Шуҳратов келин ва унинг яқинларини тўплаб уларга қимматбаҳо тўйхонада катта тўй қилиш учун анча қарз бўлиб қолганини, ўзига яна бироз ёрдам кераклигини айтиб уларни ишонтиради. Барчанинг тўёна пулларини йиғиштириб олиб Тошкент вилоятига қочиб кетади.

К.Шуҳратовга Жиноят Кодексининг тегишли бандлари билан жиноят иши қўзғатилиб, дастлабки тергов ҳаракатлари олиб борилган. Аниқланишича, К.Шуҳратов оилали, икки нафар фарзанди бор экан. Уларга ишлаб, пул топиб келишини айтиб, уйидан чиқиб кетган.

Судда ҳам К.Шуҳратов ўзи етказган зарарларни қоплаш ўрнига, оиласидан ажрашиб Д.Сафаровага уйланишини айтади. Аммо, Д.Сафарова бунга ишонмайди.

Суд ҳукми билан фирибгар К.Шуҳратов 6 йилга озодликдан маҳрум қилинди.

Туркманистон Халқ Маслаҳати Раиси Гурбангули Бердимуҳамедов Президент Шавкат Мирзиёевга мактуб йўллади

Ўзбекистон Республикаси Президенти Шавкат Мирзиёев номига Туркман халқининг миллий етакчиси, Туркманистон Халқ Маслаҳати Раиси Гурбангули Бердимуҳамедовдан мактуб келди.

Мактубда Ўзбекистонда ўзбек ва туркман халқлари ўртасидаги биродарлик ва дўстлик пойдеворини яратишга улкан ҳисса қўшган буюк туркман шоири ва мутафаккири Махтумқули Фироғийнинг 300 йиллигини кенг нишонлаш тўғрисида қабул қилинган қарор учун давлатимиз раҳбарига чуқур миннатдорлик билдирилган.

Ўзбекистонда Махтумқули Фироғийнинг 300 йиллик юбилейи кенг нишонланиши халқларимиз ва давлатларимиз ўртасидаги биродарлик ришталарининг бузилмаслиги, тарихий тақдирлари муштараклиги, якдиллигимиз ва ҳамиша бирга бўлишга тайёрлигимизнинг навбатдаги тасдиғи бўлишига ишонч билдирилган.

Гурбангули Бердимуҳамедов Ўзбекистон Президентига мустаҳкам соғлиқ, фаровонлик, фаолиятида янги муваффақиятлар, Ўзбекистон халқига эса тинчлик ва равнақ тилакларини изҳор

MANBA: Халқ сўзи

Ўзбекистонда дам олиш кунлари кутилаётган об-ҳаво ҳақида маълумот берилди

“Ўзгидромет” агентлиги Ўзбекистонда дам олиш кунлари кутилаётган об-ҳаво ҳақида маълумот берди.

Унга кўр, бугун ва дам олиш кунлари Ўзбекистон ҳудуди бўйича ҳаво ҳарорати меъёрдан 3-5 га паст бўлган нисбатан совуқ об-ҳаво сақланиб туради. Кечалари 0-5 совуқ, баъзи жойларда 2 илиққача, кундуз куни 23 февралда 2-7 илиқ, 24-25 февралда 0-5 илиқ атрофида бўлади. Шимолда кечалари 7-12 совуқ, кундуз кунлари 0-5 илиқ бўлади.

Бугун 23 февралда республика ҳудуди бўйича ёғингарчилик кутилмайди, фақат Тошкент вилоятида баъзи жойларда ёғингарчилик (ёмғир, қор) бўлади.

24-25 февраль кунлари республиканинг кўпчилик ҳудудларида вақти-вақти билан асосан қор кўринишидаги ёғингарчилик бўлади, фақат Қорақалпоғистон Республикаси, Хоразм Сурхондарё вилоятларида ёғингарчилик кутилмайди. Тоғли ҳудудларда вақти-вақти билан қор ёғади. Қор кўчиши хавфи бор.

Республика бўйича баъзи жойларга туман тушади. Шамол 7-12 м/с тезликда эсади, 24-25 февралда 15-18 м/с гача кучайиши мумкин. Йўлларда баъзи жойларда яхмалак кузатилади.

Пойтахтдабугун кундузи вақти-вақти билан бироз ёғингарчилик (ёмғир, қор) бўлади. Ҳарорат 3-5 илиқ бўлади.

Шанба куни вақти-вақти билан қор ёғади. Шамол ғарбдан 5-10 м/с тезликда эсади. Ҳарорат кечаси 1 совуқ-1 илиқ, кундузи 1-3 илиқ бўлади. Якшанба куни бироз ёғингарчилик (ёмғир, қор) бўлиши мумкин. Ҳарорат кечаси 3-5 совуқ, кундузи 2-4 илиқ бўлади. Кечаси ва эрталаб туман тушиши мумкин. Шамол 3-8 м/с тезликда эсди.

582 та қонун ҳужжатларида коррупциявий омиллар аниқланди — Адлия вазирлиги

Адлия вазирлиги томонидан ҳуқуқий экспертизадан ўтказилган қонун ҳужжатлари лойиҳаларининг 543 таси ёки ҳар учтадан биттаси мақсадга мувофиқ эмас деб қайтарилган. Бу ҳақда вазирлик томонидан ташкил этилган ҳисобот анжуманида маълум қилинди.

Қайд этилишича, охирги уч йил давомида қонунчилик юкини ихчамлаштириш бўйича дадил қадамлар ташланди. “Тартибга солиш гильотинаси” усули орқали 8 848 та норматив-ҳуқуқий ҳужжатлар бекор қилинди.

Норматив-ҳуқуқий ҳужжатларни амалиётда қўллашдаги коррупциявий хавфларнинг олдини олиш мақсадида 359 та лойиҳа ҳамда 113 та амалдаги қонун ҳужжатлари коррупцияга қарши экспертизадан ўтказилди, натижада 582 та коррупциявий омиллар аниқланди.

Қашқадарё ва Сурхондарёнинг олис ҳудудларидаги ўқувчилар учун бепул автобуслар йўлга қўйилади

2024 йил 1 сентябрдан бошлаб Қашқадарё ва Сурхондарё вилоятларида тажриба-синов тариқасида умумий ўрта таълим мактабларига олис ҳудудлардан қатнайдиган ўқувчилар учун аутсорсинг асосида бепул автобуслар қатнови йўлга қўйилади. 

Бу ҳақда “Ўзбекистон – 2030” стратегиясини 2024 йилда амалга оширишга оид давлат дастури маълум қилинган.

Шунингдек 2024/2025 ўқув йилидан бошлаб:

— Қорақалпоғистон Республикаси, вилоятлар ва Тошкент шаҳрининг 1 тадан туманида (шаҳрида) синов тариқасида “Менинг мактабим” лойиҳаси амалга оширилсин ҳамда бунинг доирасида Давлат бюджети маблағлари ҳисобидан мактабларга базавий ҳисоблаш миқдорининг 150 баробарида маблағ ажратилиб, ушбу маблағ 5–11-синф ўқувчилари танловига кўра, электрон доска, компьютер, спорт жиҳозлари, китоблар каби мактаблар учун зарур товарларга сарфланиши белгиланади;

— умумий ўрта таълим муассасалари директорларини менежерлик бўйича сертификациялаш тизими жорий этилсин. Бунда, директорларга малакавий талаблар аниқ белгиланиб, улар ҳар беш йилда бир маротаба аттестациядан ўтказилади.

б) 2025 йил 1 январдан бошлаб Мактабгача ва мактаб таълими вазирлиги тизимидаги умумий ўрта таълим муассасаларида она тили ва адабиёт ҳамда тарих фанлари бўйича Олий таълим, фан ва инновациялар вазирлиги ҳузуридаги Билим ва малакаларни баҳолаш агентлигининг миллий баҳолаш тизимида олинган тегишли даражадаги сертификатга эга бўлган ва ушбу фанлардан дарс берувчи педагог кадрларга уларнинг тариф ставкасига нисбатан 50 фоиз миқдорида ҳар ойлик қўшимча устама тўланиши белгиланади.

2024 йилда Президент ва ихтисослаштирилган мактабларнинг билимларни баҳолаш тизими қўшимча 1 000 та умумий ўрта таълим муассасаларида жорий қилиниб, фанлардаги амалий машғулотлар улуши 60 фоизгача оширилади;

6,7 миллион нафар 40 ва ундан катта ёшдаги аҳоли орасида юрак-қон томир, қандли диабет, ўпканинг сурункали обструктив касалликлари хавфини аниқлаш бўйича профилактик кўриклар ташкил этилади;

7,5 минг нафар ёшлар замонавий касбларга ўқитилиши, халқаро имтиҳон тизимларида чет тиллари бўйича юқори балл олган 6 минг нафар ёшларнинг имтиҳон харажатлари қоплаб берилиши таъминланади. 

Аввалроқ Тошкентда 1 мартдан айрим юк машиналари учун чеклов киритилиши маълум бўлганди. 

Бугун Тошкент ҳавосининг ифлослиги бўйича дунёда 3-ўринни қайд этди

Бугун, 23 февралда Тошкент ҳавонинг ифлосланиш даражаси бўйича дунёнинг йирик шаҳарлари орасида 3-ўринни эгаллади. 

“Ўзгидромет” маълумотларига кўра, 2024 йил 23 феврал соат 8:00 даги Атмосфера ҳавоси мониторинги автоматик стансиялари маълумотларига кўра, Тошкент шаҳрининг атмосфера ҳавосидаги

— ПМ10 дисперсли заррачаларининг миқдори 46,8 мкг/м3 ни ташкил этди,  SanEQvaN 0293-11 (500 мкг/м3) бўйича рухсат этилган  меъёрдан ошмади.

PM2,5 майда дисперсли заррачалар  миқдори 31,5 мкг/м3 ни ташкил этди, ЖССТ тавсияларидан 6,3 марта ошди (5 мкг/м3).

Углерод оксиди CО (автотранспорт ва саноат корхоналари чиқиндилари) 0,5 мг/м3 ни ташкил этди, СанЕҚваН 0293-11 (5 мг / м3) бўйича рухсат этилган меъёрдан ошмади.

Ўзбекистон импорт-экспортидаги ТОП-10 давлатлар эълон қилинди

Статистика агентлиги Ўзбекистон импорти ва экспортидаги ТОП-10 давлатларни эълон қилди.

Агентлик маълумотларига кўра, 2024 йилнинг январь ойида  Ўзбекистон импортида юқори улушга эга бўлган ҳамкор давлатлар:

— Хитой – 956,8 млн

—  Россия – 526 млн

—  Қозоғистон – 194,9 млн

—  Корея – 176,9 млрд

—  Туркия – 130,5 млрд

—  Германия – 90,8 млн

—  Япония – 89 млн

—  Ҳиндистон – 64,2 млн

—  Чехия – 59,7 млн

—  Литва – 55,2 млн АҚШ долларини ташкил этган. 

2024 йилнинг январь ойида Ўзбекистон экспортида юқори улушга эга бўлган давлатлар эса:

—  Россия – 240,6 млн

— Хитой – 185 млн

—  Туркия – 83,4 млн

—  Қозоғистон – 76,3 млн

—  Франция – 66,8 млн

—  Афғонистон – 60,5 млн

—  Тожикистон – 37,2 млн

—  Қирғиз Р. – 26,8 млн

—  Покистон – 24,8 млн

—  Эрон – 16,4 млн АҚШ долларини ташкил этмоқда.

1 мартдан Тошкентда катта юк машинари ҳаракатига чеклов қўйилади

“Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида Президент фармони эълон қилинди.

Унга кўра, 2024 йил 1 мартдан Тошкент шаҳрида юк ташиш учун мўлжалланган, рухсат этилган тўла вазни 10 тоннадан юқори бўлган N2, N3, О4 тоифага кирувчи автотранспорт воситаларининг ҳаракати тиғиз вақт оралиқларида тақиқланади. Бунда, ушбу чекловлар махсус хизмат, шу жумладан, коммунал хўжалиги, ободонлаштириш ва Ўзбекистон Республикаси Қуролли Кучларининг юк транспорти воситаларига татбиқ этилмаслмайди.

Шунингдек, 2030 йилга қадар Тошкент ва Нукус шаҳарлари, вилоятлар марказларида “ЕВРО – 5” ва ундан юқори стандартларига мувофиқ бўлмаган автомашиналар эксплуатацияси босқичма-босқич чеклансин.

Бундан ташқари, кенг жамоатчилик вакиллари ва экофаолларнинг экологияга автомобиллар чиқинди газларининг зарарли таъсирини камайтириш учун Тошкент шаҳрида ҳар ойнинг бир иш куни давомида автомобиллар ҳаракатланишини (жамоат транспортлари, махсус ва шошилинч ёрдам хизматларидан ташқари) қисқартиришга қаратилган “Автомобилсиз кун” жамоатчилик лойиҳасини амалга ошириш тўғрисидаги таклифи маъқулланди.

Бунда, биноси Тошкент шаҳрида жойлашган барча республика ва ҳудудий ижро этувчи ҳокимият органларининг раҳбар ва бошқа ходимлари жамоат транспортида иш жойига келиши орқали намуна кўрсатиши белгилаб қўйилди.

Президентнинг “Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисидаги Фармони қабул қилинди

“Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури тўғрисида

Ўзбекистон Республикаси Президентининг Фармони

“Ўзбекистон – 2030” стратегиясида белгиланган кенг кўламли ислоҳотларни 2024 йилда самарали амалга ошириш, халқимизнинг кундалик ҳаётида ижобий ўзгаришларга эришиш бўйича тизимли ҳаракатларни изчил давом эттириш, “яшил иқтисодиёт” тамойилларига асосланган юқори иқтисодий ўсиш суръатларини таъминлаш, экологик ҳолатни яхшилаш, сув ва бошқа табиий ресурслардан унумли фойдаланиш стандартларини кенг жорий қилиш ҳамда халқ манфаатларига йўналтирилган бошқарув тизимини янада такомиллаштириш мақсадида:

1. 2024 йил 1 мартдан бошлаб алоҳида ишлаш талаб этиладиган, шунингдек, истеъдодли ва иқтидорли ёшлар Маҳаллаларда ёшлар билан ишлаш масалаларини мувофиқлаштириш бўйича республика комиссияси қарори билан “Ёшлар баланси” асосида вазирлик ва идоралар, маҳаллий ижро этувчи ҳокимият органлари, давлат иштирокидаги корхона ва ташкилотлар ҳамда олий таълим ташкилотлари раҳбарларига бириктирилсин. Бунда мазкур раҳбарлар:

ҳар ойда камида бир маротаба ўзларига бириктирилган ёшлар билан учрашиб, уларнинг муаммоларини ҳал қилиш ва салоҳиятини юзага чиқариш, уларни талаб юқори бўлган касб-ҳунарга ўқитиш орқали бандлигини таъминлаш, ҳаётда ўз ўрнини топиши, шунингдек, ҳуқуқий онги ва маданиятини юксалтиришга ҳар томонлама кўмаклашиб борсин;

ўзларига бириктирилган ёшлар муаммоларини ҳал қилиш ва салоҳиятини юзага чиқариш учун тегишли ташкилотнинг бюджетдан ташқари маблағлари ва қонунчилик билан тақиқланмаган бошқа манбалар ҳисобидан зарур маблағларни Вазирлар Маҳкамаси томонидан белгиланадиган тартиб асосида йўналтиришга рухсат этилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Маҳаллаларда ёшлар билан ишлаш масалаларини мувофиқлаштириш бўйича республика комиссиясиЁшлар ишлари агентлиги (А.Саъдуллаев) ҳамда ёшлар бириктирилган вазирлик ва идоралар белгилансин.

2. Ёшларнинг салоҳияти, истеъдоди ва ташаббусларини тўлақонли рўёбга чиқариш мақсадида “Беш ташаббус олимпиадаси” доирасида:

2024 йил 1 мартдан бошлаб маҳалла, таълим муассасалари, корхона ва ташкилотлар тизимида мукофот жамғармаси 600 миллион сўм миқдорида хорижий тиллар (“Ибрат фарзандлари”) бўйича танловлар, киберспорт мусобақалари ва “Заковат” интеллектуал ўйинлари юқори савияда ташкил этилсин;

Ёшлар ишлари агентлиги ва маҳаллий ҳокимликлар томонидан касблар танловида ғолиб бўлган ёшларни ўз ҳудудларида жиҳозланган устахоналар билан “Ёшлар дафтари” жамғармаси маблағлари ҳисобидан таъминлаш амалиёти йўлга қўйилсин.

Мазкур банднинг тўлиқ, сифатли ва сўзсиз бажарилиши учун масъул этиб Ёшлар ишлари агентлиги (А.Саъдуллаев) белгилансин.

3. Ёшлар ишлари агентлиги, Экология, атроф-муҳитни муҳофаза қилиш ва иқлим ўзгариши вазирлиги, Иқтисодиёт ва молия вазирлигининг экология, соғлом турмушни тарғиб қилиш каби ижтимоий аҳамиятга молик 100 та волонтёрлик лойиҳалари бўйича биринчи босқичда базавий ҳисоблаш миқдорининг 200 бараваригача маблағни танлов асосида ажратиш тартибини жорий этиш тўғрисидаги таклифига розилик берилсин.

4. Ёшлар ўртасида тадбиркорликни кенг оммалаштириш ва бизнес билан шуғулланишга қўшимча имкониятларни яратиш мақсадида:

а) оилавий тадбиркорлик дастури доирасида ажратилаётган кредитларнинг камида 40 фоизи ёшлар тадбиркорлигини ривожлантиришга йўналтирилсин;

б) 2024 йил 1 июндан бошлаб қуйидагиларни назарда тутувчи “Ёш тадбиркор” танловларини ўтказиш амалиёти йўлга қўйилсин:

Ёшлар ишлари агентлиги томонидан танлов асосида “маҳалла – туман – вилоят – республика” босқичларида ёшларнинг истиқболли бизнес лойиҳа ва ғоялари сараланади. Бунда, ногиронлиги бўлган ёш тадбиркорларнинг лойиҳа ва ғояларига алоҳида эътибор қаратилади;

республика босқичида саралашдан ўтган ҳар бир лойиҳага базавий ҳисоблаш миқдорининг 1 000 бараваригача миқдордаги имтиёзли кредитлар ажратилади;

ғолиб бўлган бизнес лойиҳа ва ғоялар эгалари Ёш тадбиркорларни қўллаб-қувватлаш жамғармаси ҳисобидан хорижий давлатларга малака оширишга юборилади.

Мазкур банднинг тўлиқ, сифатли ва сўзсиз бажарилиши учун масъуллар этиб Ёшлар ишлари агентлиги (А.Саъдуллаев), Савдо-саноат палатаси (Д.Вахабов) ва Ўзбекистон ногиронлар уюшмаси белгилансин.

5. 2024 йил 1 мартдан бошлаб “Ҳар бир маҳалладан икки нафар дастурчи” дастури жорий этилсин.

Бунда, ушбу дастур доирасида:

маҳаллаларда ёшлар етакчилари томонидан маҳалла фаоллари иштирокида ахборот технологиялари ва компьютер дастурлаш соҳасига қизиқувчи ёшлар аниқланиб, уларни инглиз ва бошқа хорижий тилларга ўқитиш ҳамда сертификатлар олишини ташкил этишсертификат олган ёшлар тўғрисида маълумотларни Рақамли технологиялар вазирлигининг махсус ахборот тизимига киритиб бориш амалиёти жорий қилиниши;

Рақамли технологиялар вазирлиги, Камбағалликни қисқартириш ва бандлик вазирлиги томонидан махсус ахборот тизимига киритилган ёшларни IT соҳасида фаолият юритаётган ташкилотларга йўналтириш ва ишга жойлаштиришга кўмаклашиш чоралари кўрилиши белгилансин.

Мазкур банднинг тўлиқ, сифатли ва сўзсиз бажарилиши учун масъуллар этиб Ўзбекистон маҳаллалари уюшмаси (К.Куранбаев), Ёшлар ишлари агентлиги (А.Саъдуллаев), Рақамли технологиялар вазирлиги (Ш.Шерматов) ҳамда Қорақалпоғистон Республикаси Вазирлар Кенгаши, вилоятлар ва Тошкент шаҳар ҳокимликлари белгилансин.

6. 2024 йил 1 мартдан бошлаб:

“Ёшлар дафтари” жамғармаси маблағларини ёшларни чет тиллари ва касб-ҳунарга ўқитиш мақсадларига йўналтириш амалиёти йўлга қўйилсин;

ёшларни замонавий касбларга ўқитиш бўйича “Устоз” махсус платформаси ишга туширилсин ва дастлабки босқичда мазкур платформа орқали 250 минг нафар ёшлар қамраб олиниши таъминлансин;

ёш хотин-қизларни тадбиркорлик, маркетинг, график-дизайн каби замонавий касбларга ўргатиш учун “Қизлар академияси” платформаси ишга туширилсин ва бу орқали ёш хотин-қизлар учун турли танлов, лойиҳалар, ўқув оромгоҳлари, стажировкалар ташкил этилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Камбағалликни қисқартириш ва бандлик вазирлиги (Б.Мусаев), Оила ва хотин-қизлар қўмитаси (О.Парпибоева) ва Ёшлар ишлари агентлиги (А.Саъдуллаев) белгилансин.

7. Миллий иқтисодиётни ривожлантиришнинг асосий омили сифатида бизнес учун янада қулай шароитларни яратиш мақсадида “Бизнесни қўллаб-қувватлаш дастури” доирасида 2024 йил якунига қадар:

комплекс қўллаб-қувватлаш чора-тадбирларини амалга ошириш орқали 2 миллион аҳолини бизнесга жалб қилиш;

янги иш ўринларини яратиш орқали 5 миллион аҳолининг бандлигини таъминлаш учун зарур шароитлар яратилсин.

Мазкур банднинг тўлиқ, сифатли ва сўзсиз бажарилиши учун масъул этиб Бош вазир ўринбосари – Ж.Қўчқоров белгилансин.

8. 2024 йил 1 июлдан бошлаб нуфузли халқаро брендлар билан ишлаб чиқаришни бошлаётган корхоналарга:

халқаро стандартларни жорий этиш ва экологик сертификатлаш харажатларини қоплаб бериш тартиби жорий қилинсин;

уч йил давомида нуфузли халқаро брендлар остида ишлаб чиқариладиган маҳсулотлар учун зарур бўлган барча хомашёлар маҳаллийлаштириш даражасини камида 60 фоизга етказиш шарти билан божхона божидан озод этилсин;

нуфузли халқаро брендлардан жалб қилинган технолог, дизайнер, маркетолог каби мутахассислардан Ўзбекистон Республикаси ҳудудида меҳнат фаолиятини амалга ошириш ҳуқуқини берувчи тасдиқнома берилганлиги учун тўловлар ундирилиши бекор қилинсин.

Мазкур банднинг тўлиқ, сифатли ва сўзсиз бажарилиши учун масъул этиб Савдо-саноат палатаси (Д.Вахобов) ҳамда Инвестициялар, саноат ва савдо вазирлиги (Л.Қудратов) белгилансин.

9. 2024 йил 1 майдан бошлаб фуқаролар ва тадбиркорлик субъектлари учун янги мажбурий тўловлар ва йиғимларни фақатгина қонунда белгилаш амалиёти киритилсин.

10. Кенг жамоатчилик билан муҳокамаларда билдирилган таклифлар асосида ишлаб чиқилган “Ўзбекистон – 2030” стратегиясини “Ёшлар ва бизнесни қўллаб-қувватлаш йили”да амалга оширишга оид давлат дастури (кейинги ўринларда – Давлат дастури) доирасида қуйидагилар:

2024 йилга мўлжалланган йўналишлар кесимидаги амалий тадбирлар режалари 1–5-иловаларга мувофиқ;

2024 йилда йўналишлар кесимида ишлаб чиқиладиган норматив-ҳуқуқий ҳужжатлар лойиҳалари рўйхатлари 6–10-иловаларга мувофиқ тасдиқлансин.

Бунда, йўналишлар кесимида 2024 йилга мўлжалланган мақсадли кўрсаткичлар Ўзбекистон Республикаси Президентининг 2023 йил 11 сентябрдаги “Ўзбекистон – 2030” стратегиясини 2023 йилда сифатли ва ўз вақтида амалга ошириш чора-тадбирлари тўғрисида”ги ПҚ–300-сон қарори билан тасдиқланганлиги маълумот учун қабул қилинсин.

11. Ҳар бир инсонга ўз салоҳиятини рўёбга чиқариш учун муносиб шароитлар яратиш йўналиши доирасида 2024 йилда:

Президент ва ихтисослаштирилган мактабларнинг билимларни баҳолаш тизими қўшимча 1 000 та умумий ўрта таълим муассасаларида жорий қилиниб, фанлардаги амалий машғулотлар улуши 60 фоизгача оширилсин;

6,7 миллион нафар 40 ва ундан катта ёшдаги аҳоли орасида юракқон томир, қандли диабет, ўпканинг сурункали обструктив касалликлари хавфини аниқлаш бўйича профилактик кўриклар ташкил этилсин;

7,5 минг нафар ёшлар замонавий касбларга ўқитилиши, халқаро имтиҳон тизимларида чет тиллари бўйича юқори балл олган 6 минг нафар ёшларнинг имтиҳон харажатлари қоплаб берилиши таъминлансин;

10 миллион нафар аҳолини югуриш, футбол, волейбол, стол тенниси, шахмат, миллий ва белбоғли кураш каби спорт турлари бўйича марафон ва мусобақаларни ташкил этиш орқали оммавий спортга жалб қилиш чоралари кўрилсин;

2024 йилда Париж шаҳрида ўтказиладиган Олимпия ва Паралимпия ўйинларида муваффақиятли иштирок этиш учун камида 140 та лицензияни қўлга киритиш мақсадида 15 та олимпия ва параолимпия марказида ҳамда Тошкент шаҳри, Андижон ва Тошкент вилоятларидаги 14 та спорт базасида барча зарур шароитлар яратилсин.

Мазкур банднинг тўлиқ, сифатли ва сўзсиз бажарилиши учун масъуллар этиб тегишинча Мактабгача ва мактаб таълими вазирлиги (Х.Умарова), Соғлиқни сақлаш вазирлиги (А.Худаяров), Камбағалликни қисқартириш ва бандлик вазирлиги (Б.Мусаев), Ёшлар ишлари агентлиги (А.Саъдуллаев), Спорт вазирлиги (А.Икрамов), Ўзбекистон Миллий олимпия қўмитаси (О.Касимов), Ўзбекистон Миллий паралимпия қўмитаси (М.Ташходжаев) белгилансин.

12. Қуйидагилар:

а) 2024/2025 ўқув йилидан бошлаб:

Қорақалпоғистон Республикаси, вилоятлар ва Тошкент шаҳрининг 1 тадан туманида (шаҳрида) синов тариқасида “Менинг мактабим” лойиҳаси амалга оширилсин ҳамда бунинг доирасида Давлат бюджети маблағлари ҳисобидан мактабларга базавий ҳисоблаш миқдорининг 150 баробарида маблағ ажратилиб, ушбу маблағ 5–11-синф ўқувчилари танловига кўра, электрон доска, компьютер, спорт жиҳозлари, китоблар каби мактаблар учун зарур товарларга сарфланиши белгилансин;

умумий ўрта таълим муассасалари директорларини менежерлик бўйича сертификациялаш тизими жорий этилсин. Бунда, директорларга малакавий талаблар аниқ белгиланиб, улар ҳар беш йилда бир маротаба аттестациядан ўтказилсин.

б) 2025 йил 1 январдан бошлаб Мактабгача ва мактаб таълими вазирлиги тизимидаги умумий ўрта таълим муассасаларида она тили ва адабиёт ҳамда тарих фанлари бўйича Олий таълим, фан ва инновациялар вазирлиги ҳузуридаги Билим ва малакаларни баҳолаш агентлигининг миллий баҳолаш тизимида олинган тегишли даражадаги сертификатга эга бўлган ва ушбу фанлардан дарс берувчи педагог кадрларга уларнинг тариф ставкасига нисбатан 50 фоиз миқдорида ҳар ойлик қўшимча устама тўланиши белгилансин;

Мазкур банднинг тўлиқ, сифатли ва сўзсиз бажарилиши учун масъул этиб Мактабгача ва мактаб таълими вазирлиги (Х.Умарова) белгилансин.

13. 2024 йил 1 сентябрдан бошлаб Қашқадарё ва Сурхондарё вилоятларида тажриба-синов тариқасида умумий ўрта таълим мактабларига олис ҳудудлардан қатнайдиган ўқувчилар учун аутсорсинг асосида бепул автобуслар қатнови йўлга қўйилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Қашқадарё вилояти ҳокимлиги (М.Азимов) ва Сурхондарё вилояти ҳокимлиги (У.Қосимов) белгилансин.

14. 2024 йил якунига қадар эҳтиёждан келиб чиқиб, вилоятлар марказлари, шунингдек, Тошкент ва Нукус шаҳарларида камида биттадан оғир гематологик, онкологик ва клиник иммунологик касалликлари бор беморларга паллиатив ёрдам кўрсатувчи хоспислар ташкил этилсин.

Бунда, хосписларни ташкил этиш, уларнинг моддий-техника базасини мустаҳкамлаш ва фаолиятига доимий кўмаклашиш лойиҳалари учун Олий Мажлис ҳузуридаги Нодавлат нотижорат ташкилотларни ва фуқаролик жамиятининг бошқа институтларини қўллаб-қувватлаш жамоат фонди томонидан грантлар эълон қилиб бориш амалиёти йўлга қўйилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Қорақалпоғистон Республикаси Вазирлар Кенгаши Раиси, вилоятлар ва Тошкент шаҳри ҳокимлари белгилансин.

15. Соғлиқни сақлаш вазирлиги (А.Худаяров):

а) 2024 йил 1 майга қадар:

2025 йилдан бошлаб катта ёшдаги аҳоли орасида юқумли бўлмаган касалликлар хавфли омилларининг тарқалганлигини ўрганиш;

Мактабгача ва мактаб таълими вазирлиги (Х.Умарова) билан биргаликда 2026 йилдан бошлаб ўтказиладиган мактаб ўқувчилари орасида тамаки маҳсулотларини истеъмол қилишнинг тарқалганлик ҳамда уларнинг психологик ҳолатини ўрганиш бўйича режани белгиласин;

б) 2024 йил 1 декабрга қадар Рақамли технологиялар вазирлиги (Ш.Шерматов) билан биргаликда Ягона интерактив давлат хизматлари портали орқали соғлиқни сақлаш соҳасида кўрсатиладиган давлат хизматлари сонини 17 тадан 24 тага етказсин ва бунинг доирасида фуқароларнинг онкологик, кардиологик ва эндокринологик скринингдан ўтиши натижаси, уларни даволаш учун ажратиладиган пуллар тўғрисида маълумот олиш имкониятини яратсин.

16. Ижтимоий ҳимояга муҳтож фуқароларни қўллаб-қувватлаш тизимини янада такомиллаштириш мақсадида:

2024 йилда ногиронлиги бўлган шахсларни замонавий протез-ортопедия мосламалари ва реабилитация қилиш техник воситалари билан таъминлашнинг янги тизими босқичма-босқич жорий қилинсин;

2024 йил 1 сентябрдан бошлаб пенсия тайинлашда бир вақтнинг ўзида шахсий жамғариб бориладиган пенсия ҳисобварағидаги пулни олиш билан боғлиқ ҳаракатларни проактив тарзда амалга ошириш, ногиронликни белгилашда  эса, ногиронлиги бўлган шахсларга бериладиган имтиёзлар тўғрисида хабардор қилиш тартиби жорий этилсин;

2024 йил 1 декабрдан бошлаб ёлғиз яшаётган ҳамда ёлғиз кексалар ва ногиронлиги бўлган шахсларга Тошкент шаҳрида эксперимент тариқасида тегишли йўналишдаги нодавлат ташкилотлар орқали Ижтимоий ҳимоя миллий агентлиги маблағлари ҳисобидан ижтимоий хизматлар кўрсатиш амалиёти йўлга қўйилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Ижтимоий ҳимоя миллий агентлиги (М.Оллоёров) ҳамда Иқтисодиёт ва молия вазирлиги (О.Фозилкаримов) белгилансин.

17. Оғир атлетика бўйича миллий спорт мактабининг халқаро нуфузини ошириш мақсадида 2024 йилда оғир атлетика бўйича барча ёш тоифасидаги спортчилар билан индивидуал ишлаш тизимини яратиш ҳамда уларни профессионал тайёргарлигини ташкил этиш учун Чирчиқ шаҳрида Оғир атлетика маркази ташкил этилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Спорт вазирлиги (А.Икрамов), Ўзбекистон Миллий олимпия қўмитаси (О.Касимов) белгилансин.

18. Барқарор иқтисодий ўсиш орқали аҳоли фаровонлигини таъминлаш йўналиши доирасида:

ялпи ички маҳсулот ўсиш суръати 6 фоиздан кам бўлмаган даражада бўлишини, инвестициялар эса ялпи ички маҳсулот ҳажмига нисбатан камида 30 фоиз бўлишини таъминлаш чоралари кўрилсин;

иқтисодиёт тармоқларида қиймати 18 миллиард доллар бўлган 309 та йирик лойиҳалар ишга туширилсин;

йиллик инфляция даражаси 9 фоизгача ва фискал тақчиллик 4 фоизгача бўлиши таъминлансин, кейинчалик инфляция ва Давлат бюджети тақчиллиги кўрсаткичларини пасайтириш чоралари кўрилсин;

иқтисодиёт тармоқларига 275 триллион сўм кредит ресурсларини йўналтириш, шу жумладан, 41 триллион сўмлик микромолия хизматлари кўрсатилиши таъминлансин;

банклар томонидан тақдим этиладиган кредит ставкаларини бозор механизмлари асосида 2–3 фоиз бандга пасайтириш учун зарур шароитлар яратилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Бош вазир ўринбосари – Ж.Қўчқоров ва Марказий банк (М.Нурмуратов) белгилансин.

19. 2024 йил 1 апрелдан бошлаб давлат инвестиция дастурлари доирасида марказлашган манбалар ҳисобига амалга ошириладиган йирик лойиҳаларга саноат кооперацияси талаблари жорий этилсин.

Бунда, лойиҳалар доирасида маҳаллий корхоналарда зарур маҳсулотларни ўзлаштириш ва харид қилиш тавсия этиладиган маҳсулотлар рўйхати, маҳаллий мутахассисларни жалб қилиш режаси ва уларга қўйиладиган талаблар назарда тутилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Инвестициялар, саноат ва савдо вазирлиги (Л.Қудратов) ва Иқтисодиёт ва молия вазирлиги (Б.Ходжаев) белгилансин.

20. Республикада “яшил иқтисодиёт”га ўтиш учун қулай шароитларни яратиш ва “яшил энергия” манбалари салмоғини ошириш мақсадида:

а) 2024 йил 1 апрелга қадар:

“яшил энергия” сертификатлари айланмаси бозор тамойиллари асосида йўлга қўйилиши таъминлансин;

халқаро иссиқхона гази савдоси бўйича лойиҳаларни амалга ошириш тартиби тасдиқлансин;

б) 2024 йил 1 апрелдан бошлаб иқлим ўзгариши соҳасида мониторинг, ҳисобот бериш ва текширишнинг замонавий тизими (MRV) ва маълумотлар базаси босқичма-босқич йўлга қўйилсин;

в) 2024 йил якунига қадар хорижий инвесторлар иштирокида Тошкент, Қашқадарё, Бухоро, Наманган ва Навоий вилоятларида умумий қуввати 2 700 МВт бўлган 6 та йирик қуёш электр станцияларини ишга тушириш таъминлансин.

Мазкур банднинг тўлиқ, сифатли ва сўзсиз бажарилиши учун масъуллар этиб Иқтисодиёт ва молия вазирлиги (И.Норқулов) ва Энергетика вазирлиги (Ж.Мирзамахмудов) белгилансин.

21. Давлат активларини бошқариш агентлиги (А.Ортиқов) бир ой муддатда:

уч ойдан ортиқ муддат мобайнида очиқ савдоларда сотилмаган давлат активларининг бошланғич баҳосини 50 фоизгача босқичма-босқич пасайтириш;

ер участкалари олти ой давомида сотилмаганда тўловнинг 15 фоизини уч ой муддатда, қолган қисмини 10 йил муддатда бўлиб тўлаш имкониятини яратиш бўйича амалий чораларни кўрсин.

22. 2024 йил 1 апрелдан бошлаб чегара божхона постларида мева-сабзавот ва озиқ-овқат маҳсулотларини расмийлаштириш бўйича карантин, санитария-эпидемиология осойишталик ва ветеринария соҳаларидаги назорат функциялари божхона хизмати органларига ўтказилсин.

Мазкур банднинг тўлиқ, сифатли ва сўзсиз бажарилиши учун масъул этиб Божхона қўмитаси (А.Мавлонов) белгилансин.

23. Давлат иштирокидаги корхоналар фаолиятида очиқлик даражасини кескин ошириш ва корпоратив бошқарувни янада такомиллаштириш мақсадида 2024 йил 1 июлдан бошлаб давлат улуши 50 фоиз ва ундан юқори бўлган йирик солиқ тўловчилар корпоратив ижтимоий масъулият (CSR) ҳамда экологик, ижтимоий ва корпоратив бошқарув (ESG) ҳолати тўғрисида ҳар йили 1 июлга қадар ҳисоботни жамоатчиликка ошкор этиш амалиёти йўлга қўйилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Иқтисодиёт ва молия вазирлиги (Б.Ходжаев) ва Давлат активларини бошқариш агентлиги (А.Ортиқов) белгилансин.

24. Маҳаллий ишлаб чиқарувчиларни қўллаб-қувватлаш, экспорт ҳажмини кўпайтириш мақсадида Ўзбекистон Республикаси Президентининг 2021 йил 20 октябрдаги “Рақобатбардош маҳсулотлар ишлаб чиқаришни янада кенгайтириш чора-тадбирлари тўғрисида”ги ПҚ–5262-сон қарорида назарда тутилган маҳсулотларга импорт божхона божининг ноль ставкасини қўллаш муддати 2027 йил 1 январга қадар узайтирилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Иқтисодиёт ва молия вазирлиги (А.Я.Хайдаров) ва Божхона қўмитаси (А.Мавлонов) белгилансин.

25. Сув ресурсларини тежаш ва атроф-муҳитни муҳофаза қилиш йўналиши доирасида:

2024 йилда “Яшил макон” умуммиллий лойиҳаси доирасида камида 200 миллион туп манзарали ва мевали дарахт ҳамда буталар кўчатлариниқаламчаларини экиш, республикада 444 та яшил боғлар барпо этиш;

2024 йил 1 мартга қадар сув каналларини реконструкция қилиш ишларига Давлат бюджетидан қўшимча ажратилган 500 миллиард сўм маблағлар доирасида камида 1,5 минг километр йирик каналларни бетонлаш ишларини якунлаш чоралари кўрилсин.

Мазкур банднинг тўлиқ, сифатли ва сўзсиз бажарилиши учун масъуллар этиб тегишинча Бош вазир ўринбосари – А.Раматов, Сув хўжалиги вазирлиги (Ш.Хамраев), Ҳисоб палатаси (А.Бобоев) ва Иқтисодиёт ва молия вазирлиги (И.Норқулов) белгилансин.

26. Мамлакатимизда чанг бўронларига қарши курашиш ва уларнинг салбий оқибатларини юмшатиш доирасида:

а) 2024 йил 1 мартдан бошлаб:

ҳудудларда чанг бўрони содир бўлаётганда ва атмосфера ҳавосида майда дисперс заррачалари белгиланган нормадан юқори бўлгани аниқланганда аҳолини огоҳлантиришюрак-қон томир ва нафас йўллари касалликларига чалинган ҳамда соғлиғи ҳавонинг ифлосланишига таъсирчанлиги юқори бўлган бошқа фуқароларни зарур профилактик чоралар тўғрисида доимий хабардор қилиш амалиёти йўлга қўйилсин;

ўлчами 500 метр квадрат ва ундан ортиқ бўлган қурилиш майдонларида, унга кириб-чиқиш йўлларида чанг ва қум заррачаларининг ҳавога кўтарилишини бартараф этиш бўйича мажбурий талаблар жорий этилсин;

Тошкент шаҳрида юк ташиш учун мўлжалланган, рухсат этилган тўла вазни 10 тоннадан юқори бўлган N2, N3, О4 тоифага кирувчи автотранспорт воситаларининг ҳаракати тиғиз вақт оралиқларида тақиқлансин. Бунда, ушбу чекловлар махсус хизмат, шу жумладан, коммунал хўжалиги, ободонлаштириш ва Ўзбекистон Республикаси Қуролли Кучларининг юк транспорти воситаларига татбиқ этилмаслиги белгилансин;

б) 2030 йилга қадар Тошкент ва Нукус шаҳарлари, вилоятлар марказларида “ЕВРО – 5” ва ундан юқори стандартларига мувофиқ бўлмаган автомашиналар эксплуатацияси босқичма-босқич чеклансин.

Мазкур банднинг тўлиқ, сифатли ва сўзсиз бажарилиши учун масъуллар этиб тегишинча Экология, атроф-муҳитни муҳофаза қилиш ва иқлим ўзгариши вазирлиги (А.Абдухакимов), Соғлиқни сақлаш вазирлиги (А.Худаяров), Қурилиш ва уй-жой коммунал хўжалиги вазирлиги (Б.Закиров), Ички ишлар вазирлиги (П.Бобожонов) ва Транспорт вазирлиги (И.Махкамов) белгилансин.

27. Кенг жамоатчилик вакиллари ва экофаолларнинг экологияга автомобиллар чиқинди газларининг зарарли таъсирини камайтириш учун Тошкент шаҳрида ҳар ойнинг бир иш куни давомида автомобиллар ҳаракатланишини (жамоат транспортлари, махсус ва шошилинч ёрдам хизматларидан ташқари) қисқартиришга қаратилган “Автомобилсиз кун” жамоатчилик лойиҳасини амалга ошириш тўғрисидаги таклифи маъқуллансин.

Бунда, биноси Тошкент шаҳрида жойлашган барча республика ва ҳудудий ижро этувчи ҳокимият органларининг раҳбар ва бошқа ходимлари жамоат транспортида иш жойига келиши орқали намуна кўрсатиб борсин.

Мазкур банднинг тўлиқ, сифатли ва сўзсиз бажарилиши учун масъуллар этиб Экология, атроф-муҳитни муҳофаза қилиш ва иқлим ўзгариши вазирлиги (А.Абдухакимов), Транспорт вазирлиги (И.Махкамов) ва Тошкент шаҳар ҳокимлиги (Ш.Умурзаков) белгилансин.

28. Қонун устуворлигини таъминлаш, халқ хизматидаги давлат бошқарувини ташкил этиш йўналиши доирасида 2024 йил 1 майга қадар:

адашган ёшларни жамиятга интеграция қилиш, уларнинг ҳаётда ўз ўрнини топишига кўмаклашиш мақсадида Ёшлар иттифоқи кафиллиги асосида жазони ўташдан муддатидан илгари шартли озод қилинган ёшларни пробация ҳисобидан чиқариш амалиёти жорий этилсин ва уларни профилактик ҳисобга олиш асослари кескин қисқартирилсин;

йўл ҳаракати қоидалари бузилиши ҳолати юзасидан юбориладиган қарор ва хабарномалар бўйича Йўл ҳаракати хавфсизлиги хизматига Ягона интерактив давлат хизматлари портали орқали электрон мурожаат қилиш имконияти яратилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Ички ишлар вазирлиги (П.Бобожонов), Ёшлар ишлари агентлиги (А.Саъдуллаев) ва Рақамли технологиялар вазирлиги (Ш.Шерматов) белгилансин.

29. Маҳаллани жамоатчилик ва давлат органлари ўртасидаги таянч бўғинга айлантириш мақсадида:

2024 йил 1 апрелдан бошлаб “Ташаббусли бюджет” доирасидаги лойиҳаларни ташаббускорлар, маҳалла раиси ва фаолларининг иш сифати юзасидан розилиги олинганидан кейингина фойдаланишга қабул қилиш тартиби жорий этилсин;

2024 йил 1 августга қадар фуқароларнинг ўзини ўзи бошқариш органларига “Ташаббусли бюджет” доирасида амалга оширилаётган лойиҳалар юзасидан давлат органлари ва ташкилотларидан маълумотлар олишмаблағларнинг ўз вақтида ва тўлиқ ажратилишини талаб қилиш ҳамда лойиҳалар амалга оширилишини жамоатчилик томонидан мониторинг қилиш имконияти яратилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Иқтисодиёт ва молия вазирлиги (А.Я.Хайдаров) ва Ўзбекистон маҳаллалари уюшмаси (К.Куранбаев) белгилансин.

30. Иқтисодиёт ва молия вазирлиги Давлат бюджети ва маҳаллий бюджетлар даромадлари ҳамда амалга оширилган ва режалаштирилаётган харажатлар бўйича молиявий ҳужжатларга асосланган йиллик ва ярим йиллик ҳисоботларни аҳоли эътиборига тушуниш учун осон усулда ўз расмий веб-сайтида эълон қилиб бориш амалиётини йўлга қўйсин.

31. “Хавфсиз ва тинчликсевар давлат” тамойилига асосланган сиёсатни изчил давом эттириш йўналиши бўйича Қуролли Кучлар, соҳага масъул бошқа вазирлик ва идораларнинг киберхавфсизлик ҳамда эпидемиологик барқарорликни таъминлаш бўйича салоҳиятини кескин ошириш мақсадида:

киберхавфсизлик инфратузилмасининг муҳим элементлари ҳисобланувчи ахборот тизимлари аттестацияси ва экспертизаси учун ҳар бир вазирлик ва идорада масъул шахслар жавобгарлиги белгилансин;

мазкур йўналишларда кадрлар тайёрлаш бўйича ўқув дастурлари ва ўқитиш методикаларини замонавий таҳдид ва тажрибадан келиб чиққан ҳолда такомиллаштириш чоралари кўриб борилсин;

мамлакатимизнинг рақамли ва ҳарбий-тиббий инфратузилмасини такомиллаштириш, масъул идораларни замонавий техника ва тиббиёт аппаратуралари билан босқичма-босқич таъминлаш дастури амалга оширилсин;

фуқаролар шахсий маълумотларининг ҳимоясини кафолатли таъминлаш бўйича, шунингдек, банк ва тўлов тизимлари учун фирибгарликка қарши ва замонавий биометрик тизимлар жорий этилсин.

Мазкур банднинг тўлиқ, сифатли ва сўзсиз бажарилиши учун масъуллар этиб Мудофаа вазирлиги (Б.Курбанов), Ички ишлар вазирлиги (П.Бобожонов), Рақамли технологиялар вазирлиги (Ш.Шерматов) ва Марказий банк (Н.Саъдуллаев) белгилансин.

32.Қуйидагилар:

Стратегик ислоҳотлар агентлиги Адлия вазирлиги, Ҳисоб палатаси билан биргаликда “Ўзбекистон – 2030” стратегияси доирасида йўналишлар бўйича амалий тадбирлар режалари бажарилишини, мақсадли кўрсаткичларга эришилишини ва тегишли норматив-ҳуқуқий ҳужжатлар лойиҳалари ишлаб чиқилишини тизимли мониторинг қилиб борсин;

“Тараққиёт стратегияси” маркази ва “Юксалиш” ҳаракати Давлат дастурининг амалга оширилишини, шу жумладан, жойларга чиқиб, жамоатчилик фикрини инобатга олган ҳолда танқидий ўрганиб борсин ва натижалари бўйича ҳар ойда Ўзбекистон Республикаси Президенти Администрациясига ахборот киритсин.

Давлат ҳокимияти органлари, вазирлик ва идоралар, маҳаллий ижро ҳокимияти органлари “Тараққиёт стратегияси” маркази ва “Юксалиш” ҳаракатининг мазкур банд ижроси бўйича фаолиятига ҳар томонлама кўмаклашиб борсин.

33. Вазирлар Маҳкамаси:

ҳар ой якуни бўйича Давлат дастури ижроси юзасидан маълумотларни умумлаштириб, Ўзбекистон Республикаси Президенти Администрациясига киритиб борсин;

ҳар чорак якуни бўйича Давлат дастурида юклатилган вазифаларнинг ўз вақтида, тўлиқ ва сифатли бажарилишини Вазирлар Маҳкамасининг Раёсати йиғилишида муҳокама қилиб борсин;

ҳар ярим йилда Давлат дастури ижроси юзасидан ҳисоботларни Олий Мажлис Қонунчилик палатасига киритиб борсин.

34. Ахборот ва оммавий коммуникациялар агентлиги (А.Ходжаев), Ўзбекистон Миллий телерадиокомпанияси (А.Джурабаев) ва Ўзбекистон Миллий ахборот агентлиги (А.Кўчимов) оммавий ахборот воситалари билан биргаликда мунтазам равишда:

“Ўзбекистон – 2030” стратегиясини 2024 йилда амалга ошириш натижалари оммавий ахборот воситаларида, шу жумладан, Интернет тармоғида ва ижтимоий тармоқларда кенг шарҳлаб борилишини ҳамда унинг мазмун-моҳияти жамоатчиликка тушунтирилишини;

“Ўзбекистон – 2030” стратегияси доирасида амалга оширилаётган барча тадбирларнинг бориши ва натижалари тўғрисидаги холис ва тўлиқ маълумотлар аҳолига тезкорлик билан етказилишини таъминласин.

35. Мазкур Фармон ижросини самарали ташкил қилишга масъул ва шахсий жавобгар этиб вазирлик ва идоралар раҳбарлари, Қорақалпоғистон Республикаси Вазирлар Кенгаши Раиси, вилоятлар ва Тошкент шаҳар ҳокимлари белгилансин.

Мазкур Фармон ижросини мунтазам равишда муҳокама қилиб бориш, ижро учун масъул ташкилотлар фаолиятини мувофиқлаштириш ва назорат қилиш “Ўзбекистон – 2030” стратегиясини амалга ошириш бўйича Республика комиссияси зиммасига юклансин.

Амалга оширилган чора-тадбирлар тўғрисида ҳар чоракда Ўзбекистон Республикаси Президентига ахборот киритиб борилсин.

Ўзбекистон Республикаси Президенти                     Ш. МИРЗИЁЕВ

Президент авиация соҳасидаги давлат корхоналари трансформацияси бўйича тақдимот билан танишди

Президент Шавкат Мирзиёев 22 февраль куни авиация соҳасидаги давлат корхоналари трансформацияси бўйича тақдимот билан танишди.

Сўнгги йилларда авиация хизматлари бозорида хусусий секторга кенг йўл очилди. Авиакомпаниялар сони 15 тага, жумладан, хусусийлари 10 тага етди. Ўтган йилнинг ўзида 28 та янги самолёт олиб келинди. Буларнинг натижасида охирги етти йилда рейслар 2 баробар кўпайган. Самарқанд аэропорти хусусий шерикликка берилгани ҳисобига йўловчи оқими 4 карра ошиб, 1 миллионга етган.

Шунга қарамасдан, ўтган йили авиация хизматлари ҳажми бор-йўғи 11,6 фоиз ўсган. Мамлакатимиз стратегиясида 2030 йилга қадар авиақатновлар сонини 4 карра ошириш режалаштирилган. Унга эришиш учун соҳада йиллик ўсиш суръатлари 20 фоиздан кам бўлмаслиги керак.

Бу инфратузилма, бошқарув, нарх ва сифат борасида тизимли ишларни талаб этади. Юртимизда авиа чипталар нархи нисбатан қиммат. Ҳам ҳудудий, ҳам хорижий рейслар сони талабга қараганда кам. Парвозларнинг асосий қисми ҳалигача Тошкент ва Самарқанд аэропортларига тўғри келади. Аэропортларда ҳаво кемалари ва йўловчиларга хизмат кўрсатиш имкониятлари чекланган, қўшимча хизматлардан даромад жами тушумнинг бор-йўғи 7 фоизини ташкил қилади. Тошкент, Навоий, Наманган аэропортлари транзит салоҳияти тўлиқ ишга солинмаяпти.

Тақдимотда “Uzbekistan Airways” ва “Uzbekistan Airроrts” акциядорлик жамиятларида трансформация жараёнларини тезлаштириш, хизмат турлари ва даромадни кўпайтириш бўйича жорий йилги режалар баён қилинди.

Хусусан, миллий авиакомпанияга халқаро кредит рейтингини олиб, уни “IPO”га чиқариш жараёни бошланади. Бухоро, Наманган, Урганч ва Андижон аэропортлари хусусий бошқарувга берилиб, модернизация қилинади. Жорий йилда рейслар сони 20 фоизга оширилади.

Соҳада харажатларни 20 фоизга қисқартириш чоралари кўрилади. Ёқилғи сарфи юқори бўлган эски самолётлар сотилиб, замонавий ва тежамкор ҳаво кемалари олиб келинади. 72 та йўналиш бўйича оптимал парвозлар маршрутини танлаш орқали ёқилғи сарфи сезиларли камайтирилади. Фойдаланилмаётган ва даромад келтирмаётган активлар сотувга чиқарилади.

Мутасаддиларга харажатларни қисқартириш дастурини тасдиқлаб, хизматлар рақобатдошлигини ошириш, хусусий шериклик лойиҳаларини тезлаштириш бўйича топшириқлар берилди. Аэропортларда қўшимча хизматларни кўпайтириш, Навоий аэропортида самолётларга техник хизмат кўрсатишни ривожлантириб, унинг салоҳиятини тўлиқ ишга солиш зарурлиги таъкидланди.

Давлат авиакомпанияларига хорижий малакали мутахассисларни жалб қилиш, шунингдек, кадрлар тайёрлашни яхшилаш масалалари ҳам айтиб ўтилди.

MANBA: Халқ сўзи

Пойтахт сув ва канализация учун 8 млрдга яқин маблағ ажратилди

Тошкент шаҳар ҳокими в.б Шавкат Умрзоқов пойтахт бюджетидан 7 миллиард 900 миллион сўм маблағ ажратди. Кеча, 21 февраль куни шаҳар ҳокимининг бу бўйича тегишли қарори эълон қилинган, дея хабар бермоқда ЎзА.

Маблағ пойтахт Иқтисодиёт ва молия бошқармаси ҳузуридаги “Сув таъминоти ва канализация тизимларини ривожлантириш” жамғармасида шаклланган қолдиқ маблағлари ҳисобидан ажратилади.    

Жумладан, Сергели туманидаги Нўғойқўрғон ва Қубайтепа маҳаллаларидаги тоза ичимлик суви ва дренаж тармоғи учун 2,5 миллиард сўм, Юнусобод туманидаги Оқтепа маҳалласини марказлашган оқова сув тармоғи билан таъминлаш харажатлари учун 5,4 миллиард сўм берилади.    

Пул ўрнатилган тартибда “Ягона буюртмачи хизмати” инжиниринг компаниясига йўналтирилади.    

Давлат молиявий назорат бошқармаси пулнинг сарфланишини назорат қилади. Маълумот ўрнида айтиш жоиз, бир неча кун аввал Шавкат Умрзоқов сув тошқинларига қарши бюджетнинг захира жамғармаси ҳисобидан 846 миллион 500 минг сўм пул ажратган эди.  

Ўзбекистонликлар март ойида неча кун дам олади?

Президент фармонига кўра, март ойида Ўзбекистон аҳолиси учун қуйидаги дам олиш кунлари мавжуд:

8 март – жума (байрам);

21 март – пайшанба (байрам);

22 март – жума (иш ҳафтаси туридан қатъий назар барча ходимлар учун қўшимча ишланмайдиган кун);

23 март — шанба (олти кунлик иш ҳафтаси ходимлари учун қўшимча ишланмайдиган кун).
Наврўз байрамида ўзбекистонликлар 4 кун, 8 март куни эса беш кунлик иш ҳафтаси ишчилари 3 кун кетма-кет дам олади.

Шундай қилиб, якшанба кунларини ҳисобга олган ҳолда ҳафтасига 5 кун ишлайдиган Ўзбекистон фуқаролари 13 кун дам олади.

Ўзбекистонда банкоматлардан нақд пул ечиб олиш комиссияси 1,5 фоизга ошдими?

Ижтимоий тармоқларда “Ўзсаноатқурилишбанк” АТБга тегишли банкоматларда нақд пул ечилганда комиссиялар миқдори оширилгани тўғрисида хабарлар тарқалди. 

Банк Матбуот хизмати ушбу хабарларни фейк эканлигини маълум қилди. 

Маълум қилинишича, Банкда маҳаллий (UzCard, Humo) карталаридан нақд пул бериш суммадан 1 фоизни, халқаро тўлов карталаридан (шу жумладан, кобейджинг банк карталари) нақд пул бериш суммадан 1,5 фоизни ташкил этади.

Ушбу тарифлар банкнинг 2023 йил 26 августдаги Бошқарув қарори билан тасдиқланган бўлиб, бугунги кунда комиссия миқдорини ошириш бўйича ҳеч қандай қарор қабул қилинмаган.

Аксинча, ҳозирги пайтда “Ўзсаноатқурилишбанк” АТБ томонидан иш ҳақи лойиҳаси доирасида чиқарилган халқаро карталардан банкнинг ўз процессинг марказига уланган банкоматлар орқали нақд пул ечиш суммадан 0,4 фоизни ташкил қилмоқда, дейилади баёнотда.

Подпишитесь на нас

51,905участниковМне нравится
22,962участниковЧитать
6,100участниковПодписаться
×