Халқ таълими вазирлиги томонидан 16 ёшга тўлган мактаб битирувчилари ўз вақтида фуқаролик паспорти, яъни ID-карта олишлари лозимлиги ҳақида эълон берилган эди. Мазкур хабар юзасидан Давлат тест маркази аҳолига мурожаат йўллади:
«Айрим телеграм каналларда олий таълим муассасаларига кириш тест синовларида иштирок этиш учун абитуриентларда ID-карта бўлиши шарт, деган мазмунда хабарлар тарқалмоқда.
Бунинг натижасида Давлат тест марказига абитуриентлар томонидан паспортимиз бўлса ҳам ID-карта олишимиз шартми, деган мазмунда кўплаб мурожаатлар келиб тушмоқда.
Бу бўйича қуйидагиларни маълум қиламиз:
жорий йилда ҳам олий таълим муассасаларининг бакалавриат таълим йўналишларига кириш тест синовлари учун абитуриентларни онлайн рўйхатга олиш my.dtm.uz сайти орқали онлайн тарзда амалга оширилади;
рўйхатга олишда абитуриентларнинг расми ва паспорт маълумотлари Давлат персоналлаштириш марказидан онлайн режимда олинади;
бунинг учун абитуриентда биометрик паспорт ёки ИД-карта бўлиши лозим;
бунда биометрик паспортга эга бўлган абитуриентлар ИД-карта олишлари шарт эмас;
абитуриентлар биометрик паспорт билан ҳам my.dtm.uz сайти орқали онлайн рўйхатдан ўтишлари мумкин» дейилган унда.
