Қозоғистон президенти Қосим-Жомарт Токаев “Қозоғистон Республикасининг айрим қонун ҳужжатларига таълим, тарбия ва болалар хавфсизлиги масалалари бўйича ўзгартиш ва қўшимчалар киритиш тўғрисида”ги қонунни имзолади. Ушбу тузатишлар, жумладан, мактаб ўқувчиларининг дарс вақтида уяли телефонлардан фойдаланишини чеклайди, деб ёзди Orda.kz.
Қонунда ўқувчилар телефондан фақат дарс вақтида фойдалана олмаслиги белгилаб қўйилган. Болалар ҳали ҳам смартфонларни мактабга олиб келишлари ва улардан дарс вақтидан ташқари (масалан, танаффус вақтида) фойдаланишлари мумкин бўлади.
Қонунда болалар билан содир бўлган бахтсиз ҳодисаларнинг олдини олиши керак бўлган деразаларга махсус қулфлаш механизмларини мажбурий ўрнатиш каби бошқа янгиликлар ҳам назарда тутилган.
Сенат депутатлари февраль ойи бошида мактабларда уяли телефонлардан фойдаланишни чекловчи қонун лойиҳасини маъқуллаган эди. Собиқ таълим ва фан вазири Асхат Аягамбетовнинг тушунтиришича, баъзи ҳолларда ўқитувчилар болаларга таълим мақсадида смартфонлардан фойдаланишга рухсат беришлари мумкин – чекловлар мактаб ўқувчиларининг ижтимоий тармоқлар, биринчи навбатда ТикТок орқали дарс вақтида чалғимаслигини таъминлашга қаратилган.
