Ўзбекистон Республикаси Президенти ҳузуридаги Статистика агентлиги маълумотларига кўра, 2023 йилнинг 1 октябрь ҳолатига республикамизнинг доимий аҳолиси 36 599 764 кишини ташкил этган.  

Республикамизнинг доимий аҳолиси сони ўтган йилнинг мос даври билан солиштирилганда 2,2 % га ошган.

Мамлакатимиз аҳолиси 2023 йил бошидан буён 574,8 минг кишига кўпайган.

Ўзбекистон аҳолиси 2023 йилнинг ҳар бир ойида ўртача 63,9 минг кишига ошган.

2023 йилнинг ҳар бир кунида доимий аҳоли сони ўртача 2,1 минг кишига кўпаймоқда.

АЁЛЛАР СОНИ – 18 176 873 киши

️ЭРКАКЛАР СОНИ – 18 422 891 киши

2023 йилнинг 1 октябрь ҳолатига доимий аҳоли таркибидаги эркаклар сони аёллар сонидан 246 018 нафарга кўп.

Энергетика вазири Жўрабек Мирзамаҳмудов Ўзбекистонда бензин дефицити йўқлигини маълум қилди. Бу ҳақда у Самарқандда Верона Евроосиё иқтисодий форумида маълум қилди, дея хабар беради “spot.uz”.

Вазир жорий йилда Ўзбекистонга 1 млн тонна нефть ва нефть маҳсулотлари импорт қилингани ва бу ўтган йилга нисбатан бир оз кўп эканлигини айтди. Келгусида мамлакат ўсиб бораётган иқтисодиёт эҳтиёжларини қондириш учун нефть импортини оширишни режалаштирмоқда.

“Ҳа, биз буни яқинда [Россияга] ташрифимиз доирасида имзолаганмиз. Ҳажмлар йўқ, энг муҳим тамойил — етказиб бериш масаласи”, — деган вазир Россия билан нефть етказиб бериш бўйича ҳукуматлараро битим имзоланишига изоҳ бериб. “Асосийси, етказиб беришда ҳеч қандай чекловлар йўқ”, дея қўшимча қилди у.

Энергетика вазирлиги раҳбарининг таъкидлашича, 21 сентябрдан Россия томонидан бензин ва дизел ёқилғиси экспортига киритилган чекловлар Ўзбекистонга етказиб беришга таъсир қилмаганлигини, бу давлатлар ўртасида ҳукуматлараро келишув тузилгани билан изоҳланган.

Бундан ташқари, Мирзамаҳмудов Рақобат қўмитаси томонидан биржада АИ-80 бензинини сотиб олиш лимити оширилганига изоҳ бериб, мамлакатда ёқилғи дефицити йўқлигини таъкидлади.

“Чеклов нархларни манипуляция қилишнинг олдини олиш учун киритилди. Бу аҳолининг арзон бензинга эга бўлишини таъминлаш учун қилинган. Бу [импорт] ҳажмига боғлиқ эмас. Дефицит йўқ”, — дея хулоса қилди вазир.

Ўзбекистонга январь-октябрь ойларида хорижнинг 19 та давлатидан 22 492 та электромобил олиб келинган. Бу ҳақда Божхона қўмитаси матбуот хизмати xaбар берди.

Қайд этилишича, олиб келинган электромобилларнинг умумий қиймати 582,3 миллион долларни ташкил этиб, ўтган йилнинг мос даврига нисбатан импорт ҳажми 6 баробардан юқори ўсган.
Хитой энг кўп электромобил импорт қилинган мамлакат сифатида етакчиликни сақлаб қолмоқда. Ўтган 10 ойда ушбу мамлакатдан жами 20 642 дона (91,фоиз) электромобил олиб келинган.

Шунингдек, Гонгконгдан 1258 дона, Бирлашган Араб Амирликларидан 147 дона электромобил импорт қилинган. Кучли бешликка Жанубий Корея, АҚШ якун ясамоқда, мазкур даватлардан мос равишда 136 ҳамда 134 дона электромобиль олиб келинган.

Жорий йилнинг 8, 9 ноябрь кунлари Ўзбекистон Республикаси “Иқтисодий ҳамкорлик ташкилоти”нинг 16-саммитига мезбонлик қилади. Шу муносабат билан 8 ноябрдан 10 ноябргача Тошкент шаҳрининг айрим кўчаларида ҳаракатланиш чекланади. Бу ҳақда Тошкент шаҳар ИИББ ахборот хизмати хабар бермоқда. Хабарга кўра: 

1.     Ислом Каримов номидаги аэропорт майдонидан Бобур кўчаси бўйлаб Бобур — Шота Руставели чорраҳасигача;

2.      Нукус — Бобур чорраҳасидан Нукус кўчаси бўйлаб Мовароуннаҳр кўчасигача;

3.     Ойбек — Туркистон чорраҳасидан Ойбек, Афросиёб ва Олмазор кўчалари;

      4. Ислом Каримов — Бунёдкор чорраҳасидан Ислом Каримов кўчаси бўйлаб  Амир Темур – Ислом Каримов чорраҳасигача;

      5. Шароф Рашидов — Афросиёб чорраҳасидан Шароф Рашидов кўчаси бўйлаб Кичик ҳалқа айланма йўлигача;               

      6. Навоий — Мустақиллик чорраҳасидан Навоий – Лабзак чорраҳасигача;

      7. Фурқат – Бешёғоч чорраҳасидан Бешёғоч кўчаси бўйлаб Ислом Каримов – Бешёғоч чорраҳасигача;

      8. Олмазор – Ислом Каримов чорраҳасидан Олмазор кўчаси бўйлаб Навоий кўчасигача.  

Эслатиб ўтамиз, ҳаракатланиш чекланган кўчаларда Тез-тиббий ёрдам, фавқулодда вазиятлар бўлинмалари транспорт воситаларига истисно тариқасида ҳаракатланиш учун рухсат берилади.

Шунингдек, шу кунларда Тошкент шаҳридаги юк ташувчи транспорт воситаларининг шаҳар марказида ҳаракатланиши тўлиқ тўхтатилади.

Саммит доирасида белгиланадиган вақтинчалик чекловлар сабабли Водийдан Воҳага ҳамда Воҳадан Водийга ҳаракатланиш 4П-12 автомагистраль йўли орқали амалга оширилишини маълум қилган. 

Сизлардан юзага келадиган вақтинчалик ноқулайликлар учун узр сўраймиз, дейилади хабарда. 

Статистика агентлигининг дастлабки маълумотларига кўра, Ўзбекистон 2023 йилнинг январь-сентябрь ойларида хориждан қиймати 178,2 млн AҚШ долларига тенг бўлган қарийб 2,6 млн дона барча турдаги мобил телефонлардан импорт қилган.

Мобил телефонлар импорти 2022 йилнинг мос даври билан солиштирилганда 398 361 тага ошган.

Ўзбекистон 2023 йилнинг 9 ойида энг кўп мобил телефон импорт қилган давлатлар:

— Хитой – 2,3 млн дона

— Ветнам – 223,1 минг дона

— Ҳиндистон – 32,5 минг дона

— БАА – 7,7 минг дона

— Қозоғистон – 2,5 минг дона.

Халқаро аэропортни Бобур кўчаси билан боғловчи кўприк 4 ноябрь соат 19:00 дан 5 ноябрь соат 09:00 га қадар транспорт воситалари ҳаракати учун ёпилади. Бу ҳақда «Uzbekistan airways» хабар берди. 

Рейсларга кечикмаслик учун йўловчиларга айланма йўллардан фойдаланиш ва аэропортга одатдагидан олдинроқ жўнаб кетиш тавсия этилади, дейилади хабарда. 

Эртага Тошкентнинг 4 та туманида иссиқ сув бўлмайди. Бунга «Ҳудудий электр тармоқлари» 4 ноябрь куни соат 05:00 дан 18:00 гача 4-ИМ қозонхонаси ҳудудида электр таъминотини ўчирилиши сабаб бўлади.

 Шу сабабли Юнусобод, Олмазор, Шайхонтоҳур ва Мирзо Улуғбек туманларининг айрим ҳудудларида иссиқ сув бўлмайди.

Иссиқ сувни ўчириш қуйидаги ҳудудларга таъсир қилади:

Юнусобод тумани: 2, 3, 4, 5, 6, 7, 8, 9, 10, 11, 12, 13, 14, 15, 16, 17, 18, 19, С-2, С-4, С-5, С-6 мавзелари, Бодомзор, Эргашев, Осиё, Ниёзбек Йўли, Амир Темур, Асомов, Аҳмад Дониш, Боғишамол, Муртазаев, Арифов кўчалари.

Олмазор тумани: Қорақамиш 1/1, 1/2, 1/3, 1/4, 2/1, 2/3, 2/4, 2/5, С-22, Ғофур Ғулом, Тахтапул, Себзор, С-17 /18 даҳалари, С. Олмазор, О. Бобожонов, Қорасарой, Ф. Баланд, Абдураҳмонов, Сағбон, Ёлқин, Дадабоев, Ўразбоев, Юнусов, Мухбир, Келес йўли, Норазтепа кўчалари.

Шайхонтохур тумани: Зулфияхоним, Баҳор кўчалари, С-12, С-15, С-16 даҳалари.

Мирзо Улуғбек тумани: С-1, С-2 даҳалари, Ҳамид Олимжон кўчаси.

Иссиқ сув таъминоти электр таъминоти қайта тикланганидан ва 4-ИМ қозонхонаси ишга туширилгандан сўнг (тахминан 5 октябр эрталабгача) амалга оширилади.

Самарқанд шаҳрида ўтказилган Ўзбекистон–Франция бизнес форумида Ўзбекистон Соғлиқни сақлаш вазири А. Иноятов Франциянинг “Airbus Helicopters” компанияси раҳбарияти билан учрашди. Бу ҳақда вазирлик Матбуот хизмати хабар берди.

Музокара давомида Республика тез тиббий ёрдам тизими учун 10 та “Airbus Н-145” русумли тиббий вертолётларни харид қилиш ҳамда мамлакатимизда Европа стандартларига мос тиббий авиация хизматини ташкил этиш, бу соҳанинг моддий-техника базасини яратиш ҳамда мутахассислар тайёрлаш, тоғли ва чекка ҳудудларда тиббий авиация хизматини ташкил этиш механизмларини ишлаб чиқиш истиқболларини муҳокама қилинган. 

4 ноябрь куни Тошкент шаҳрининг Олмазор ҳамда Юнусобод туманларининг айрим ҳудудларида электр энергияси соат тонгги 05:00 дан 18:00 га қадар вақтинчалик ўчирилади.  Бу ҳақда «Ҳудудий электр тармоқлари» хабар бермоқда.

Тошкент шаҳрининг Олмазор ҳамда Юнусобод туманларининг айрим ҳудудларини электр энергияси билан таминловчи  «Юнусобод» подстанциясидаги трансформатор юқори кучланишли янги трансформаторга алмаштириш, электр қурилмаларини ўрнатиш ишлари олиб борилиши ҳамда ушбу ишларни хавфсиз бажариш мақсадида ҳудуддаги 4 та подстанциялари вақтинча ўчирилади.

ОЛМАЗОР туманидаги — 21-сонли  оилавий поликлиника, АТС-248, Руҳий касалликлар шифохонаси, Тери – дерматовенерология диспансери, мактаб, тадбиркорлик субъектлари.  

«Иброҳим ота», «Тараққиёт» МФЙ, «Мирпўлатова» МФЙ, «Қорасарой» МФЙ, «О.Ҳотамова» МФЙ, «Ҳасанбой» МФЙларида ҳамда Ибрагимова, Қорасарой, Чуқурсой, Шифокорлар шаҳарчаси,  Охунбобоев ҳамда Охунбобоев мавзе ва даҳаларида жойлашган  аҳоли хонадонлари ҳамда 23 та тадбиркорлик субъектлари.

ЮНУСОБОД туманидаги — 6, 7, 8 ва 9-даҳалари, «Исломобод», «Тикланиш», «Ҳасанбой», «Катта Ҳасанбой», «Регистон», «Иттифоқ», «Аҳроробод» МФЙларида ва «Ҳасанбой» мавзесида,  «Корзинка» савдо комплекси ҳамда 6 та тадбиркорлик субъектлари.

Эслатиб ўтамиз, эртага Тошкентнинг 4 та туманида иссиқ сув ҳам бўлмайди.

Кеча маҳаллий вақт билан соат 17:30да янги «Air Samarkand» маҳаллий авиакомпаниясининг биринчи самолёти Самарқанд халқаро аэропортига келиб қўнди. 277 та эконом ва 36 та бизнес-классда ўриндиқларга эга Airbus А330-300 самолёти анъанавий тарзда сув аркаси билан кутиб олинди.

«Air Samarkand» ўз авиапаркини кенгайтиришни давом эттиради. Хусусан, яқин кунларда самолётлар парки иккинчи — ўрта масофали Airbus А321 билан тўлдирилади. Умуман олганда, 2023 йил охирига қадар компания 5 тагача самолётни қабул қилиб, фойдаланишга топширишни режалаштирмоқда.

Куз-қиш мавсумида авиаташувчи Самарқанддан қатор хорижий йўналишларга, жумладан, Жануби-Шарқий Осиё, Яқин Шарқ, Туркия ва Хитой шаҳарларига мунтазам ва чартер рейсларини йўлга қўйишни режалаштирмоқда.

«Air Samarkand» 2022 йилда ташкил этилган Ўзбекистон авиакомпанияси бўлиб, бош қароргоҳи Самарқанд шаҳрида жойлашган.

Ўзбекистон Республикаси Президенти Шавкат Мирзиёев Туркий давлатлар ташкилоти саммитида иштирок этиш учун Остона шаҳрига амалий ташрифини якунлади.

Давлат раҳбарлари кенгашининг навбатдаги йиғилишида Ўзбекистон етакчиси юртимизнинг ташкилотга раислигида эришилган асосий натижаларни қайд этди, тузилмани янада ривожлантириш ва туркий мамлакатлар ўртасидаги ҳамкорликни мустаҳкамлашнинг устувор йўналишлари борасидаги фикрларини баён қилди, қатор муҳим таклиф ва ташаббусларни илгари сурди. 

Саммит доирасида Президент Шавкат Мирзиёевга туркий халқлар оиласининг бирлигини мустаҳкамлашга, туркий мамлакатларнинг манфаатлари ва қарашларини халқаро майдонда фаол илгари суришга қўшган улкан ҳиссаси учун “Туркий дунёнинг олий ордени” тантанали топширилди.

Ташриф дастуридаги тадбирлар якунлангач, Ўзбекистон Президенти Тошкентга жўнаб кетди. Аэропортда давлатимиз раҳбарини Қозоғистон Бош вазири Алихан Смаилов кузатиб қўйди.

Президент қарори амалда

Сурхондарё вилоятининг Қизириқ тумани ҳудудидаги иккита коллекторда 230 ва 490 мегаватт қувватга эга кичик ГЭСлар бунёд этилмоқда.

“Ўзбекгидроэнерго” акциядорлик жамияти қурувчилари барпо этаётган кичик ГЭСлар янги йилгача тўлиқ фойдаланишга топширилади. Ҳар иккала гидроэлектрстанция ҳам маҳаллий ва хорижнинг замонавий ускуналари билан жиҳозланмоқда.

Президентимизнинг жорий йил 16 февралдаги “2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисида”ги қарори ижроси доирасида қурилаётган янги кичик ГЭСлар ишга тушгач, тумандаги 1 минг 500 хонадонни узлуксиз арзон электр энергияси билан таъминлайди.

Жанубдаги воҳада электр энергияси ишлаб чиқариш барқарорлигини таъминлаш учун шу йил Сариосиё туманидаги “Тўпаланг ГЭС” 75 миллион 400 минг евро маблағ эвазига модернизация қилинди. Замонавий технологиялар билан жиҳозланиб, умумий қуввати 175 мегаваттга етказилди. Бу йилига 467 миллион киловатт соат электр энергияси ишлаб чиқариб, вилоятдаги 60 фоиз истеъмолчини барқарор электр энергияси билан таъминлаш ҳамда 126,2 миллион куб-метр табиий газни тежаш имконини берди.

Маълумотларга кўра, вилоятда 2023-2030 йилларда 81 та лойиҳа асосида 601,4 МВт, йиллик 2 038,2 миллион киловатт соатга тенг янги қувватларни ишга тушириш режалаштирилган.

МАНБДА: ЎзА