Жорий йил 7 апрель куни Алишер Навоий номидаги Ўзбекистон Миллий кутубхонасида таниқли қозоқ ёзувчиси, драматург ва жамоат арбоби Кемел Токаев таваллудининг 100 йиллигига бағишланган давра суҳбати ва «Турки алеминин детективи жанрин дарабози» китоб-расмли кўргазмаси бўлиб ўтади, деб хабар бермоқда «Дунё» .
Ташкилотчилар — Қозоғистон Республикаси Миллий кутубхонаси, Ўзбекистоннинг Олмаотадаги Бош консуллиги, Алишер Навоий номидаги Ўзбекистон Миллий кутубхонаси.
Тадбирдан кўзланган мақсад туркий тилли мамлакатларда Кемел Токаевнинг адабий меросини тарғиб қилиш ва оммалаштириш, ёшлар ва ёш авлодни ватанпарварлик, Ватанга муҳаббат ва садоқат руҳида тарбиялашдан иборат. Тадбир туркий давлатлар ташкилоти томонидан эълон қилинган Туркий цивилизасияни ривожлантириш йили, шунингдек, ТУРКСОЙнинг 30 йиллигини нишонлаш доирасида ўтказилмоқда.
Кемел Токаев — бадиий сўз устаси, драматург, қозоқ насрида детектив жанрининг асосчиси. 1948 йилда Қозоғистон давлат университетини тамомлаган. Адибнинг биринчи «Жулдизди жорик» тўплами 1954 йилда нашр этилган. «Аскар кетди», «Махсус топшириқ», «Охирги зарба», «Тунги зарба», «Сарбаған бўлган воқеа» ва бошқа роман ҳамда қиссалари нафақат Қозоғистонда, балки чет элда ҳам кенг тарқалган.
Тадбир доирасида ёзувчининг ҳаёти ва ижодига бағишланган китоб-расмли кўргазма ташкил этилади. Унда муаллифнинг асарлари, унинг таҳрири остида нашр этилган журналлар, даврий нашрлардан мақолалар, унинг ҳаёти ва ижоди ҳақидаги материаллар намойиш этилади.
