Смартфон фойдаланувчилари тасвирни таниб олиш имкониятига эга Google Lens иловасидан беш йилдан буён фойдаланиб келишади.
Унинг ёрдамида матнларни сканерлаш, қўлда ёзилган эслатмаларни сақлаш, тадбирлар календарини яратиш, ўсимликлар ва ҳайвонларни аниқлаш, матнларни исталган воситадан таржима қилиш, объектларни таниб олиш мумкин.
Яқинда ушбу кенг имкониятлар рўйхатига терининг ҳолатини кузатиш функцияси ҳам қўшилди. Ўз соғлиғига эътиборсиз бўлмаган одамлар агар терида ноодатий хол ёки тошмаларни кўриб қолишса, мазкур иловадан фойдаланишлари мумкин. Бу хусусият дерматолог билан боғланиш қийин бўлганда фойдали бўлиши мумкин.
Бунинг учун камера объективини терининг муаммоли жойига йўналтириш талаб этилади, шундан сўнг дастур ушбу расм асосида тегишли ҳаволани чиқаради. Компаниянинг таъкидлашича, мазкур илова Bard чатботига интеграция қилинади, у реал вақт режимида фойдаланувчи сўровлари бўйича фикр-мулоҳазаларни тақдим этади.
Бироқ Google Lensга бутунлай ишониб қолиш ярамайди. Фақат дерматологнинг тўлиқ текширувидан сўнг аниқ ташхис қўйилиши мумкин, дейилади techcult.ru сайтида.
