Бирлашган Миллатлар Ташкилотининг Бош котиби ўринбосари ва Чўлланишга қарши кураш бўйича конвенцияси ижрочи котиби Ибрахим Тиав бошчилигидаги делегация Ўзбекистонга ташриф буюрди.
Юқори мартабали меҳмонни Экология, атроф-муҳитни муҳофаза қилиш ва иқлим ўзгариши вазири Азиз Абдуҳакимов кутиб олди.
Делегация ташрифидан мақсад 2023 йилнинг 13–17 ноябрь кунлари Самарқанд шаҳрида бўлиб ўтадиган Чўлланишга қарши курашиш Конвенциясининг бажарилишини кўриб чиқиш қўмитаси 21-йиғилиши учун яратилаётган шарт-шароитлар билан танишиш ҳамда тадбирни ўтказиш бўйича битим имзолашдир.
Иброҳим Тиав Самарқандга бориб, «Silk Road Samarkand» сайёҳлик марказида бўлиб, Конгресс-холлни кўздан кечирди. Томонлар Чўлланишга қарши курашиш Конвенциясининг бажарилишини кўриб чиқиш қўмитаси 21-йиғилишига тайёргарлик масалаларини муҳокама қилишди.
Шу билан бирга, «Регистон» майдони ва «Боқий шаҳар» бўйлаб саёҳат қилган Иброҳим Тиав Ўзбекистоннинг туризм салоҳиятини юқори баҳолади.
Маълумот учун, CRIC-21 тадбири Самарқандда 13–17-ноябр кунлари ўтказилади.
