Ўзбекистон Республикаси Вазирлар Маҳкамаси ҳузуридаги Таълим сифатини назорат қилиш давлат инспекцияси бўлим бошлиғи Сардор Мақсудов хусусий ОТМ дипломлари юзасидан саволларга жавоб берди.
– Ўзбекистонда фаолият олиб бораётган кўплаб хусусий университетларнинг дипломи давлат ОТМлариники билан бир хил кучга эгами?
– Қонунчиликда нодавлат таълим ташкилотлари фаолиятига алоҳида урғу берилган. Хусусан, нодавлат таълим ташкилотларининг ҳуқуқий мақоми, уларни ташкил этиш тартиблари белгилаб қўйилган. Бу каби таълим ташкилотлари ўз фаолиятларини лицензия асосида олиб боради. Нодавлат таълим ташкилотларида давлат стандартлари асосида ўқиш ташкил этилса, давлат намунасидаги диплом бера олиши мумкин. Лицензия асосида ишлаётган хусусий ОТМнинг дипломи Ўзбекистонда тан олинадиган таълим ҳужжати бўла олади.
– Ўзбекистондаги ОТМлар дипломи хорижий давлатларда тан олинадими?
–Ҳар бир мамлакат ўз қонунчилигига эга. Хорижий давлатларда ҳам бошқа давлат ОТМдан олинган дипломларни тан олиш тартиби бор. Мана шу тартибда дипломлар бошқа давлатларда тан олинишига эришиш мумкин.
