Шавкат Мирзиёев бир қатор давлатлар билан меҳнат стажи ва пенсия ҳуқуқларини ўзаро тан олиш бўйича музокараларни жадаллаштиришни топширди. Бу Ўзбекистонга қайтган фуқароларнинг хорижда қонуний ишлаган даврларини меҳнат стажига қўшиш имконини беради. Бу ҳақда президент йиғилишда маълум қилди.
Давлат раҳбари хорижда қонуний асосда ишлаётган ўзбекистонликлар нафақат солиқлар, балки пенсия бадалларини ҳам тўлаётганини таъкидлади. Бироқ уларнинг Ватанга қайтганидан кейин ушбу меҳнат стажини ҳисобга олиш масаласи ҳозирча тўлиқ ҳал этилмаган.
Жорий йилда Ўзбекистон Қирғизистон, Озарбайжон ва Туркия билан меҳнат стажи ҳамда пенсия ҳуқуқларини ўзаро тан олиш бўйича келишувлар имзолади.
Энди Германия, Россия, Япония, Жанубий Корея, Болтиқбўйи ва Болқон мамлакатлари билан ҳам шундай келишувларга эришиш режалаштирилмоқда.
«Уларнинг хориждаги меҳнат стажи Ватанга қайтганидан кейин ҳисобга олиниши ва, айниқса, пенсия тайинлашда албатта инобатга олиниши керак», — деди Шавкат Мирзиёев.
Масъул идораларга ушбу давлатлар билан музокараларни фаоллаштириш ва йил якунига қадар аниқ натижаларга эришиш топширилди.
Аввалроқ Шавкат Мирзиёев Ўзбекистонда янги иш ўринлари биринчи навбатда мамлакат фуқароларига берилиши кераклигини таъкидлаган эди. Унинг сўзларига кўра, ички меҳнат бозорини ҳимоя қилиш ривожланган давлатларда ҳам кенг тарқалган амалиёт ҳисобланади. Ўшанда президент Ўзбекистонга узоқ муддатга келаётган хорижликларнинг яшаш ва ишлаш жойларини мониторинг қилиш платформасини яратишни ҳам топширган.
