- Advertisement -
Қашқадарё вилоятида суд «Ўзбекнефтегаз»дан 8,8 млрд сўм миқдорида экологик компенсация ундириш ҳақидаги даъвонинг асосий қисмини рад этди. Натижада компаниядан 676 133 сўм ундириш белгиланди.
Даъвони Экология ва иқлим ўзгариши вилоят бошқармаси «Ўзбекнефтегаз»нинг Шўртан нефть ва газ қазиб чиқариш бошқармасига нисбатан киритган. Судда корхона манфаатларини Бизнес-омбудсман ҳимоя қилган.
Суд муҳокамаси давомида назорат қилувчи орган текширув предмети доирасидан четга чиққанини аниқлади. Шунингдек, даъвонинг асосий қисми бўйича ҳисоб-китоблар етарли далиллар билан тасдиқланмагани қайд этилди.
Суд қонун бузилган ҳолда олинган далиллардан фойдаланиш мумкин эмаслигини ҳам инобатга олди. Натижада 8,8 млрд сўмлик даъвонинг асосий қисми рад этилди.
