Ўзбекистон ташқи ишлар вазири Бахтиёр Саидов кеча Уганданинг биринчи элчиси Мозес Каваалууко Кизигени қабул қилди, деб хабар қилмоқда «Дунё» АА.
«Уганданинг Ўзбекистондаги биринчи Элчиси Мозес Каваалууко Кизиге жаноблари Тошкентга келди, – деб ёзди Ўзбекистон ТИВ раҳбари ўзининг telegram-каналида. – Биз Қўшилмаслик ҳаракатига Уганданинг муваффақиятли раислигини олқишлаймиз ва 2027-2029 йилларда Ҳаракатга бўлажак раислигимизни қўллаб-қувватлашини қадрлаймиз. Ташқи ишлар вазирликлари ўртасида сиёсий маслаҳатлашувлар йўлга қўйилиши мамлакатларимизнинг манфаатли ва истиқболли ҳамкорлиги учун мустаҳкам замин яратади. Тадбиркорларнинг ўзаро алоқаларини мустаҳкамлаш, халқаро ташкилотлар доирасидаги ҳамкорлик, фойдаланилмаган салоҳиятни рўёбга чиқариш ва бошқа масалалар ҳам кун тартибимиздан ўрин олди».
Эслатиб ўтамиз, Уганда Ўзбекистон билан дипломатик муносабатлар ўрнатган 145-давлат ҳисобланади.
Тегишли қўшма коммюнике 2024 йил 18 январь куни Уганда пойтахти Кампала шаҳрида Ўзбекистон делегациясининг Қўшилмаслик ҳаракатининг вазирлар йиғилишида иштироки чоғида имзоланган.
