Ижтимоий тармоқларда, «Ўзбекистондаги иссиқхоналар фалокат ёқасида» сарлавҳаси остида тарқалган хабарлар муҳокамаларга сабаб бўлди. Ҳолат бўйича Қишлоқ хўжалиги вазирлиги Ахборот хизмати расмий муносабат берди.
Унга кўра, бугунги кунда мамлакатимиз аҳолисини сифатли озиқ-овқат маҳсулоти билан таъминлаш мақсадида иссиқхоналар майдони сўнги 5 йилда 3 баробарга кўпайиб, 5,2 минг гектарга етди, уларда етиштирилаётган маҳсулотлар ҳажми 90 минг тоннадан 300 минг тоннага кўпайди.
Амалий натижалардан бири — Энергетика вазирлиги томонидан куз-қиш мавсумида аҳоли газ тармоқларига уланмаган иссиқхона хўжаликларига табиий газ етказиб бериш бўйича шартнома тузиш ишлари бошланди.
Хусусан, иссиқхона хўжаликлари молиявий аҳволини яхшилаш ва ривожлантириш бўйича республика ишчи гуруҳининг 3 та йиғилиш баёнлари қабул қилиниб, иссиқхона хўжаликлари томонидан олинган 87 фоиз кредит маблағларининг муддати 14 йилгача узайтирилди.
«Танқидий руҳда тарқатилган хабарлар эса, бирламчи таҳмин ҳамда асосга эга бўлмаган фикрлар жамланмаси», дейилади расмий муносабатда.
