Актёр ва Feed UP асосчиси тадбиркор Умид Иргашев ўзи ҳақида:
— Тадбиркорлик ва ижодга қизиқиш менда ҳамоҳанг уйғунликда кечган. Болаликдан кино қаҳрамонларининг ижросига қизиққанман. Айниқса, хориж актёрларидан Уилл Смит ижросидаги фильмларни яхши кўрардим. Бундан ташқари, менда мустақил равишда шахсий маблағ ишлаб топишга интилиш ҳам кучли эди. Тадбиркорлик фаолияти ҳақида ҳам кўп ўйлардим. Оиламдагилар қизиқишларимга қаршилик қилишмаган.
Ўзим 1987 йил 2 март куни Тошкент шаҳрида туғилганман. Отам Муҳаммадкарим Иргашев мебель цехида менежер, онам Карима Иргашева эса, банкда ҳисобчи бўлган. Ўзим оилада катта ўғилман, синглим, укам бор. 281 мактабни битиргач, Банк коллежига ўқишга кириб, у ерни ҳам тамомладим. Шундан сўнг, ўзим мустақил пул ишлаб топиш учун, аввалига таваккал қилиб бензин қуйиш шаҳобчасига ишга кирдим ва у ерда 2005 йилдан 2007 йилгача бензин қуювчи бўлиб ишладим. Менга мустақил ўз ишимни очиш фикри тинчлик бермасди. У ердан бўшагач, бу ҳақида жиддий ўйлай бошладим. Натижада тадбиркорликдаги дастлабки қадамимни 2007 йил “Paynet” очишдан бошладим ва у ерда ўзим “Paynet”чи бўлиб ишладим. Орадан вақт ўтиб, “Paynet”нинг вақти ўта бошлаганлигини сездим ва яна қайси йўналишда тадбиркорликни амалга ошириш мумкинлигини сарҳисоб қилиб кўра бошладим.
2009 йилда тушликка фастфуд еб ўтириб, кутилмаганда менда шу йўналишда ишлайдиган кафе очиш ғояси туғилди. Бу ғояни амалга ошириш осон бўлмади, албатта. Чунки, бунга маблағ, яхши локация ҳамда, фидоий ишчилар жамоаси керак эди. Мен эса, бир ўзимман. Аммо, шунда ҳам мен ҳеч қандай қийинчиликдан қўрқмай, фақатгина шу режамни амалга оширишни ўйлардим холос.
Ниҳоят, режам амалга ошди. 2010 йил илк Feed Up, фастфуд кафе тарзида очилди. Айнан шу куни Feed Up брендига асос солдим. Мижозлар Feed Upга ўрганиб, ишлар ривожлангач, 2012 йилда Feed Upнинг иккинчи филиали очилди. 2016 йилда менда бошқа брендлар билан рақобатлашишни ҳисобга олган ҳолда, Feed Up кафелар тармоғини яратиш ғояси туғилиб, шу режа асосида муттасил ишлай бошладим.
Натижада 2017 йилда эса, Feed Up ни тўртинчи филиалини очдим. Бугун 2022 йилга келиб эса, Feed Up нинг филиаллари сони, Тошкент шаҳрида 22 та етди!
Бугун ортга назар ташлаб, бунинг учун қанча меҳнат ва куч сарфлаганимни ҳис қиламан.
Мен фақатгина тадбиркорлик билан шуғулланиб, актёрлик билан боғлиқ орзуларимни ҳам ташлаб қўймадим. Инсон агар ўзи истаса, бемалол ҳамма нарсага вақт топиши мумкин. Мен ҳам шунга амал қилдим ва вақтдан унумли фойдаланиб, актёрлик борасида ҳам ўз олдимга қўйган мақсадларимга эришиб келяпман. 2012 йилда ўз актёрлик фаолиятимни бошлаб, режиссёр Саид Мухторовнинг “Оқпадар” фильмида суратга тушдим. Бу кино оламидаги илк ролим эди. Шундан сўнг, кетма-кет фильмларда роль ижро қила бошладим. 2014 йил режиссёр Баҳром Ёқубовнинг “Тунги меҳмон” фильмида суратга тушдим.
2015 йилдан эса, продюсер Руслан Мирзаев билан ижодий ҳамкорлигимиз бошланди ва шу йил унинг “Хиёнат гирдоби” фильмида бош ролни ижро қилдим. Бош қаҳрамон ролини ижро қилиш осон эмаслигини, бу ҳам катта масъулият эканлигини шунда чинакамига ҳис қилдим. Очиғи бу фильм қор, совуқларда суратга олинган ва съёмка жараёнлари мен учун ҳам осон кечмаган.
Шундан сўнг, Руслан Мирзаевнинг “Кўз ёшим” фильмида ҳам, кичик бўлса-да, эсда қоларли ролни талқин этдим. 2016 йил “Икки телба” фильмида суратга тушдим. 2017 йил продюсер Руслан Мирзаевнинг “Севади, севмайди” фильмида, 2019 йил эса, унинг навбатдаги “Истанбуллик миллиардер” фильмида ҳам бош ролларни ижро қилдим.
2020 йилдан сериалларга эътибор қаратиб, продюсер Руслан Мирзаевнинг турк киноижодкорлари билан биргаликда яратилган “Юраклар жанги” сериалида бош қаҳрамон ролини ижро қилдим. Бу роль ижодимда ҳақиқий бурилиш бўлдим. Сериал бир неча телеканалларда намойиш қилинди.
2021 йилда эса, продюсер Руслан Мирзаевнинг турк киноижодкорлари билан навбатдаги ижодий ҳамкорлиги бўлган “Ишқ ўйинлари” сериалида ҳам бош қаҳрамонлардан бирини талқин этдим.
Ҳаётда ўзим ижро қилган ролларимдан фарқ қиламан, албатта. Бахтли оила бошлиғиман, 2 та ўғлим бор.
