Ўзбекистон Республикаси Олий таълим, фан ва инновациялар вазирлиги томонидан ташкил этилган ушбу халқаро анжуман “2030 йил: Ўзбекистон ва Тожикистонда олий таълим ва илм-фанни ривожлантиришнинг устувор йўналишлари” мавзусига бағишланди.

Унда икки томондан 100 га яқин олий таълим муассасалари раҳбарлари, вазирлик ҳамда идоралар масъуллари иштирок этди.

Анжуман ялпи мажлис ва 3 та алоҳида секцияга бўлинган ҳолда олиб борилиб, унда университетларнинг фан ва таълим интеграцияси, илмий тадқиқотлар яқинлашуви борасидаги Ўзбекистон ва Тожикистон тажрибаси муҳокама қилинди ҳамда таълим сифатини таъминлаш, билимларни баҳолаш ва самарали бошқарув масалалари бўйича тажриба алмашилди. Шунингдек, Ўзбекистон ва Тожикистон олий таълим муассасалари ўртасидаги халқаро алоқалар хусусиятлари бўйича фикрлар тингланиб, ҳамкорликдаги истиқболли режалар кўриб чиқилди.

Форумнинг ялпи мажлис якуни бўйича мамлакатлар олий ўқув юртлари ўртасида 50 дан зиёд битим, англашув меморандуми ва йўл хариталари имзоланди.

Ушбу ҳужжатларда ўқитувчи ва талабаларнинг академик алмашинуви, олий ва профессионал таълимда ўзаро ўқув жараёнларини ташкил қилиш, профессор-ўқитувчилар малакасини ошириш, тажриба алмашиш ва стажировка ўташ, илмий анжуманлар, диссертациялар ҳимояси бўйича кенгашлар ишида иштирок этиш, икки давлат олимлари томонидан илмий журналларда мақолалар чоп этиш, биргаликда илмий лойиҳаларда иштирок этиш каби йўналишларда ҳамкорликни йўлга қўйиш ва ривожлантириш кўзда тутилган.

Форум 16 апрель куни Самарқанд шаҳрида ўз ишини давом эттиради.

Маълумот учун: Ўзбекистон-Тожикистон ректорларининг биринчи форуми 2023 йил март ойида ўтказилиб, унда 28 та англашув меморандуми, битим ва «Йўл хариталари» имзоланган эди.

Ўзбекистон ва Саудия Арабистони махсус паспорт эгаларини қисқа муддатли виза талабларидан озод этиш тўғрисидаги битим имзолади. Бу ҳақда Ўзбекистон ташқи ишлар вазири хабар қилди.

“Саудия Арабистони Подшоҳлиги ташқи ишлар вазири шаҳзода Файсал бин Фархон Ол Сауд Ҳазрати Олийлари билан кўришганимиздан мамнунмиз. Ўзбекистон Республикаси билан Саудия Арабистони Подшоҳлиги ўртасида кўп қиррали ҳамкорлик ва кенг қамровли шериклик муносабатларини амалий бойитишга алоҳида эътибор қаратдик. Мулоқотимиздан минтақавий кун тартиби ва кўп томонлама платформалар доирасидаги ўзаро ҳамкорлик масалалари ҳам ўрин олди. Дипломатик ва махсус паспорт эгаларини ўзаро қисқа муддатли виза талабларидан озод этиш тўғрисидаги ҳукуматлараро битимни имзоладик”, — дея ёзиб қолдирди Бахтиёр Саидов.

Ўзбекистон Республикаси Президенти Шавкат Мирзиёев 15 апрель куни “Марказий Осиё – Кўрфаз араб давлатлари ҳамкорлик кенгаши” стратегик мулоқоти бўйича вазирларнинг иккинчи учрашувида иштирок этиш учун мамлакатимизга келган Озарбайжон Республикаси ташқи ишлар вазири Жайхун Байрамовни қабул қилди.

Учрашув аввалида вазир давлатимиз раҳбарига Озарбайжон Президенти Илҳом Алиевнинг саломи ва эзгу тилакларини етказди.

Ўзбекистон-Озарбайжон стратегик шериклик муносабатлари ва кўп қиррали ҳамкорлигини янада кенгайтириш масалалари кўриб чиқилди.

Олий даражадаги келишувларни амалга ошириш ҳамда ҳамкорликнинг 10 та янги йўналиши бўйича истиқболли лойиҳалар портфелини шакллантиришга алоҳида эътибор қаратилди.

Мунтазам ва самарали мулоқотлар туфайли икки томонлама муносабатлар сифат жиҳатидан янги даражага чиққани, амалий мазмун билан бойигани мамнуният ила қайд этилди.

Ўтган йилда товар айирбошлаш 27 фоизга ошди. Автомобилсозлик, электротехника, энергетика, тўқимачилик ва қишлоқ хўжалиги тармоқларида кооперация лойиҳалари амалга оширилмоқда. Қўшма инвестиция фонди ўз фаолиятини бошлади.Бўлажак олий даражадаги учрашув ва тадбирлар режаси ҳам кўриб чиқилди.

15 апрель куни Ўзбекистон Республикаси Президенти Шавкат Мирзиёев шу кунларда Тошкент шаҳрида ўтаётган Марказий Осиё мамлакатлари ва Кўрфаз араб давлатлари ташқи ишлар вазирларининг иккинчи учрашуви доирасидаги тадбирларда иштирок этаётган Баҳрайн Подшоҳлиги ташқи ишлар вазири Абдуллатиф бин Рашид ал-Заяний бошчилигидаги делегацияни қабул қилди.

Баҳрайн ташқи ишлар вазири давлатимиз раҳбарига Подшоҳ Ҳамад бин Исо Ал-Халифанинг саломи ва энг эзгу тилакларини етказди.

Ўзбекистон билан Баҳрайн ўртасидаги кўп қиррали шерикликни янада ривожлантириш ва кенгайтириш масалалари кўриб чиқилди.

Сиёсий мулоқотни фаоллаштириш ҳамда сиёсий маслаҳатлашувлар механизмини тез фурсатда ишга тушириш муҳимлиги қайд этилди.

Савдо-иқтисодий ҳамкорлик, банк-молия, автомобиль ва темир йўллари қурилиши, энергетика инфратузилмасини модернизация қилиш ва бошқа устувор йўналишлардаги дастур ва лойиҳаларни илгари суриш учун катта салоҳият ва кенг имкониятлар мавжудлиги таъкидланди.

Шу мақсадда жорий йилда қўшма Ҳукуматлараро қўмитанинг илк йиғилишини ўтказиш ҳамда Ўзбекистон ва Баҳрайн етакчи компаниялари вакиллари иштирокида Ишбилармонлар кенгашини таъсис этиш режалаштирилган.

Халқаро кун тартиби, шу жумладан хавфсизликка замонавий таҳдидларга қарши курашиш масалалари юзасидан ҳам фикр алмашилди.

Ўзбекистон етакчиси Баҳрайн ташқи ишлар вазирини қутлуғ ёши билан муборакбод этиб, унга мустаҳкам соғлик ва катта муваффақиятлар тилади.

МАНБА: Халқ сўзи

Давлатимиз раҳбари топшириғига асосан тузилган Республика ишчи гуруҳи ўз фаолиятини Жиззах вилоятида давом эттирмоқда.

Президент Администрацияси, Халқ қабулхонаси ҳамда тегишли вазирлик ва идора вакилларидан ташкил топган ишчи гуруҳ томонидан вилоят аҳолиси муаммоларини ҳал қилиш, “маҳалла еттилиги” ҳамкорлигини таъминлаш, ёшлар билан ишлаш, аҳоли бандлигини таъминлаш, томорқалардан фойдаланишни самарали ташкил этиш каби йўналишларда қатор амалий ишлар олиб борилмоқда.

Президент маслаҳатчиси ўринбосари – Халқ қабулхонаси раҳбари Улуғбек Муҳаммадиев бошчилигидаги гуруҳ мутасаддилари вилоят туманларида маҳалла фаоллари, ёшлар билан очиқ мулоқотлар, хонадонбай ўрганишлар олиб бормоқда.

Жумладан, ушбу тадбирларда аҳоли томорқаларидан унумли фойдаланиш, тадбиркорлик истагини билдирган фуқароларни қўллаб-қувватлаш орқали иссиқхоналарни ташкил этиш, деҳқончилик қилиш учун ер майдонларини ажратишда амалий кўмак беришга алоҳида эътибор қаратиляпти.

Хусусан, Халқ қабулхонаси томонидан Пахтакор туманида уй шароитида биогумус ва қўзиқориннинг шампинион турини етиштириш ва шу орқали даромад топишга қаратилган кўргазмали семинар ташкил этилди. Мазкур тадбир маҳалла фаоллари, ҳоким ёрдамчилари ҳамда тадбиркорликка қизиққан ёшлар иштирокида “BEST GOLD CROWN” МЧЖда ташкил этилди.

Тадбиркор А.Ҳайитов ўтган йили 33 миллион сўмлик имтиёзли кредит эвазига 8 квадрат метр майдонда Калифорния қизил чувалчангини парваришлашни бошлаган эди. Бугунга келиб 72 квадрат метр майдонда ишлаб чиқаришни кенгайтириб, харидорларга 50-100 тонна биогумус етказиб бермоқда.

– Ҳозирги кунда бир килограмм биогумус бозорда ўртача минг сўмни ташкил этади, — дейди А.Ҳайитов. – Келгусида қишлоқ хўжалиги учун жуда муҳим ҳисобланган бу маҳсулотни ташқи бозорга ҳам етказиб беришга киришсак, даромад ҳам шунга яраша кўпаяди.

А.Ҳайитов бошчилигида турмуш ўртоғи, фарзандлари томонидан “Шанпинион” қўзоқирини 100 метр кв.да етиштирилмоқда. Бир мавсумда ўртача хосил 1500 килограммдан ошади.

Тадбир якунида 15 нафар фуқаро ушбу йўналишда ўз тадбиркорлигини бошлаш истагини билдириб, Халқ қабулхонаси томонидан керакли амалий кўмакларни олишди.

Республика ишчи гуруҳининг Арнасой туманида ўрганишлари натижасида “Бўстон” маҳалласида истиқомат қилувчи Ғайбуллаев Шерзод Халқ қабулхонаси тавсияси асосида имтиёзли кредит олиб, тадбиркорликни бошлади. У 2 сотих майдонда помидор кўчатларини  етиштирадиган бўлди. Қолаверса, Шерзод ўзидан ташқари яна икки кишини иш билан таъминлади.

“Тинчлик” маҳалласида “Аёллар” ва “Ёшлар” дафтаридаги 29 нафар фуқарога 20 сотихдан ажратилган, жами 5.8 гектар ер майдонида амалга оширилаётган “Бир контур — бир маҳсулот — бир маҳалла” тамойили асосида экспортбоп маҳсулотлар етиштириш учун ер тайёрлаш жараёнлари билан танишилди ва ёшларга тегишли тавсиялар, амалий кўмаклар кўрсатилди.

Фарғона вилоятида аҳолига кўрсатилаётган транспорт хизматлари сифатини ошириш, хусусан, жамоат транспорти тизимини такомиллаштириш мақсадида 20 дона Isuzu HC 45 русумли автобус харид қилинди. Бу ҳақда Транспорт вазирлиги ахборот хизмати хабар берди.

Мазкур транспорт воситалари «Бекавтойўловчитранс» МЧЖ томонидан Самарқанд автомобиль заводида ишлаб чиқарилган.

Улар тез орада Қўқон шаҳри автобус йўналишларида аҳолига хизмат кўрсатишни бошлайди, дейилади хабарда.

Бу турдаги автобуслар 39 нафар йўловчига мўлжалланган бўлиб, ўриндиқлар сони 18 тани ташкил қилади.

Йил бошидан бери «Ўзэнергоинспекция» томонидан электр ва иссиқлик энергиясини беҳуда сарфлаш билан боғлиқ 247 та маъмурий иш расмийлаштирилган.

Маълумот ўрнида, электр ва иссиқлик энергиясини беҳуда сарфлаш (куннинг ёруғ вақтида чироқларни ёқиб қўйиш) ҳолатлари учун жавобгарлик мавжуд. Бунинг учун мансабдор шахсларга БҲМнинг 5 бараваридан (1 млн. 700 минг сўм) 15 бараваригача (5 млн. 700 минг сўм) миқдорда жарима, агар бу 1 йил давомида такрор содир этилган бўлса, БҲМ 15 бараваридан 30 бараваригача (10 млн. 200 минг сўм) миқдорда жарима солишга сабаб бўлади.

Бирлашган Миллатлар Ташкилотининг Озиқ-овқат ва қишлоқ хўжалиги ташкилоти (ФАО) томонидан Бухорода экинларни суғоришни янада мақбуллаштириш мақсадида “АкваКроп” моделини жорий этиш бўйича ўқув семинари ташкил этилди. Семинар Кордоба университети (Испания), Левен католик университети (Белгия) ва Барқарор қишлоқ хўжалиги институти (Испания) халқаро экспертлари томонидан олиб борилди.

Семинар Ўзбекистоннинг тегишли вазирлик ва идоралари мутахассислари, жумладан, Ўзбекистон Республикаси Қишлоқ хўжалиги вазирлиги ва Сув хўжалиги вазирлиги, Халқаро сув ресурсларини бошқариш институти, Ўзгидромет ходимлари, шунингдек, БМТТД ва Швецария тараққиёт ва ҳамкорлик агентлигининг “Ўзбекистонда сув ресурсларини бошқариш Миллий лойиҳаси” вакиллари учун ўтказилди. Тадбир Глобал Экологик Жамғарма (GEF) томонидан молиялаштирилаётган ФАОнинг “Марказий Осиё ва Туркиянинг қурғоқчил ва шўрланган қишлоқ хўжалиги ишлаб чиқариш ландшафтларида табиий ресурсларни комплекс бошқариш” (CACILM-2)  минтақавий лойиҳаси доирасида ташкил этилди.

Таъкидлаш жоизки, яқин кунларда лойиҳа доирасида Ўзбекистон Республикаси Қишлоқ хўжалиги вазирлиги ва Сув хўжалиги вазирликлари билан ҳамкорликда Тошкент шаҳрида “АкваКроп”  ўқув марказини очиш ҳам режалаштирилган. Янги марказ Ўзбекистонда “АкваКроп” моделини янада кенг татбиқ қилиш ва сув сарфини мақбуллаштириш, шунингдек, ушбу соҳадаги маҳаллий мутахассислар салоҳиятини оширишга хизмат қилади.

Кун тартибида қишлоқ хўжалиги экинларини суғоришни режалаштиришда табиий-иқлим омилларини ҳисобга олиш масаласи кўрилди. Бунда озиқ-овқат хавфсизлигини таъминлаш, атроф-муҳит шароитлари ва ресурсларни бошқаришнинг экинлар ҳосилдорлигига таъсирини баҳолаш мақсадида ФАОнинг Ер ва сув ресурслари бўлими томонидан ишлаб чиқилган “АкваКроп” моделидан фойдаланиш таклиф этилади. Дастур тупроқ ва иқлим омиллари асосида ўсимликларнинг ўсишини компьютер симуляциясини яратади ва ҳосилдорликни максимал даражада ошириш учун  зарур бўлган сув миқдорини ҳисоблаш имконини беради. Шундай қилиб, “АкваКроп” сув истеъмолига қараб ўсимликларнинг ҳосилдорлигини прогноз қилади. Бу, айниқса, қурғоқчилик хавфи бўлган ҳудудларда жуда муҳимдир.

“ФАОнинг сув масалалари бўйича олиб бораётган ишлари қишлоқ хўжалигида сувдан самарали ва экологик хавфсиз фойдаланишга қаратилган. Биз сув ресурслари ва уларга боғлиқ экотизимлар ҳолатига зарар етказмасдан ишлаб чиқаришни таъминлашга интиламиз. “АкваКроп” моделининг амалда қўлланилиши қишлоқ хўжалиги экинлари турларини мақбуллаштириш ва уларнинг ҳосилдорлигини ошириш, шу билан бирга, сув ресурсларини сезиларли даражада тежаш имконини беради. Бу қурғоқчиликка мойил ҳудудларда қишлоқ хўжалиги ишлаб чиқаришини қўллаб-қувватлашга қаратилган лойиҳамизнинг мақсад ва вазифаларига тўла жавоб беради”,-деди CACILM-2 миллий лойиҳа бошқарувчиси Муҳаммаджон Қосимов.

Семинарда Бухоро вилоятида суғорма деҳқончиликнинг ўзига хос хусусиятлари кўриб чиқилиб, пахта, буғдой ва беда етиштириш масалаларига алоҳида эътибор қаратилди. Қурғоқчилик ва шўрланиш хавфига қарши курашиш, суғориш технологияларини такомиллаштиришга оид алоҳида тақдимотлар ўтказилди. Суғориш ва суғоришнинг техник томонлари, суғориш ва коллектор-дренаж тизимларидан фойдаланишни режалаштириш схемалари, сув таъминоти стандартлари ва ҳисоби ҳамда бошқа долзарб масалалар муҳокама қилинди. Семинар дастурига далаларга ташрифлар ҳам киритилган.

Семинарнинг амалий қисмида иштирокчилар Бухоро вилоятида “АкваКроп” моделини синовдан ўтказиш имкониятига эга бўлдилар. Иштирокчилар халқаро экспертларнинг тавсияларини инобатга олган ҳолда ҳарорат, ёғингарчилик, шамол тезлиги ва бошқа кўрсаткичлар бўйича маълумотларни электрон тарзда қайта ишлашни амалга оширдилар, тупроқ ва барглардан намликнинг буғланиш коеффициенти бўйича маълумотлар олиб, сўнгра баъзи қишлоқ хўжалиги экинлари мисолида суғориш режимлари ва ҳосилдорлик башоратларини ишлаб чиқдилар.

Ўзбекистонда сувдан фойдаланиш ва қишлоқ хўжалиги экинларини мақбуллаштириш соҳасида ФАОнинг “АкваКроп” модели каби қулай тизимларни кенг кўламда амалга ошириш қурғоқчиликка мойил ҳудудларда қишлоқ хўжалиги маҳсулдорлигини атроф-муҳитга зарар етказмасдан оширишга ёрдам бериб, бу ўз навбатида қишлоқ аҳолиси ҳаётида энг қимматли ва муҳим омили бўлган сув ресурсларини тежаш имконини беради.

«Ўзгидромет» 16−17 апрель кунлари кучли ёмғирлар ёғиши кутилаётгани сабабли республиканинг тоғолди ва тоғли ҳудудларида сел-сув тошқини юзага келиши мумкинлигидан огоҳлантирди.

Унга кўра,

1. Қашқадарё вилояти: Яккабоғ, Деҳқонобод, Чироқчи, Китоб, Шаҳрисабз, Қамаши, Ғузор туманлари;
2. Сурхондарё вилояти: Сариосиё, Узун, Олтинсой, Денов, Бойсун, Шеробод, Шўрчи, Қумқўрғон, Музработ туманлари;
3. Самарқанд вилояти: Ургут, Самарқанд, Булунғур, Нуробод, Қўшработ, Каттақўрғон, Пайариқ, Жомбой, Иштихон туманлари;
4. Навоий вилояти: Хатирчи, Навбаҳор, Нурота, Конимех, Кармана туманлари;
5. Жиззах вилояти: Зомин, Бахмал, Ғаллаорол, Шароф Рашидов, Фориш, Янгиобод туманлари;
6. Тошкент вилояти: Оҳангарон, Бўстонлиқ, Паркент, Пискент, Ўрта Чирчиқ, Юқори Чирчиқ туманларида ва Ангрен, Олмалиқ шаҳарлари;
7. Наманган вилояти: Поп, Косонсой, Чортоқ, Чуст, Наманган, Янгиқўрғон туманлари;
8. Фарғона вилояти: Сўх, Фарғона, Бешариқ туманлари ва Шоҳимардон ҳудуди;
9. Андижон вилояти: Андижон, Асака, Жалақудуқ, Қўрғонтепа, Пахтаобод, Избоскан, Хўжаобод, Марҳамат туманлари ва Хонабод шаҳри.

Тоғолди ва тоғли ҳудудларда истиқомат қилувчи фуқаролар, дам олувчилар ҳамда тоғли ҳудудларда ҳаракатланувчи ҳайдовчилардан эҳтиёткорлик чораларини кўриш сўралмоқда.

Хабарга кўра, Республика ҳудуди бўйича ёмғир сувлари тўпланиши эҳтимоли бор, бу эса ҳудудларни сув босишига олиб келиши мумкин.

Бугун Ўзбекистон ва Ҳиндистон Мудофаа вазирликлари бўлинмалари ўртасида «Термиз» ҳарбий полигонида «Дўстлик» қўшма ҳарбий ўқув машғулотларининг бешинчи давраси бошланмоқда, деб хабар қилмоқда «Дунё» АА.

Бу икки давлат ўртасидаги бешинчи ҳарбий машғулот бўлмоқда. 2019 йилдан буён шу пайтгача «Дўстлик» машғулотлари ҳар икки давлатда икки мартадан ўтказилган.

Аввалгиларидан фарқли равишда навбатдаги қўшма тадбирда томонларнинг 60 нафардан ҳарбий хизматчиси иштирок этмоқда. Шунингдек, қуруқликдаги қўшинлар вакилларига ҳарбий ҳаво кучлари мутахассислари ҳам қўшилган.

Машғулотларда ҳарбий бўлинмалар ўртасида терроризмга қарши биргаликда курашиш ва бошқа операцияларни амалга оширишда мувофиқлаштирилган ҳаракатлар ва жипсликни оширишга асосий эътибор қаратилади.

Ўзбекистонда ташкил этилаётган ҳамкорликдаги ҳарбий ўқув машғулотлари Ҳиндистон оммавий ахборот воситаларида кенг ёритилмоқда.

Сайхунобод туманидаги Пахтакон маҳалласида яшовчи боғбон Турсунбой ота Ариповга президент совғаси топширилган.

Турсунбой ота нафақат туманда, балки вилоятда ҳам кўпчилик миришкор боғбон сифатида билади.

Отахон меҳнат фаолиятини 15 ёшида колхозда сувчиликдан бошлаган.Кейинроқ туманда ташкил этилган бўрдоқичилик чорва фермасида 40 йил меҳнат қилди.  

2011 йилда нафақага чиққач, томорқасида узумчилик билан шуғуллана бошлади. Узоқ йиллар узум етиштириб, ток парваришининг ҳадисини олди. Ҳозир узумнинг ризамат, ҳусайни, келин бармоқ, шоҳонаки, кетмон соп каби навларини кўпайтирмоқда. Отахон янги “абатар” навини пайванд қилганини айтди.

– Президентимизнинг туманимизга ташрифи менинг ҳаётимда энг бахтли, эсда қоларли кун бўлди, – дейди Турсунбой ота. – Ташриф чоғида юртбошимиз менга «Трекер» автомашинасини совға қилди. Кейин маҳалладаги узум етиштирувчиларга мураббийлик қилишимни айтди. Ишонсангиз, ҳалигача ҳаяжоним босилгани йўқ. Хушхабарнинг қўшқаноти бўлади, деганларидек, маҳалла- кўй, туманимиз, вилоятимиз, қолаверса, водийдаги қариндошлар, дўст-биродарларнинг табриклари оғушида яшаяпман. Фарғона водийсининг Олтиариқ туманидаги Узумчи маҳалласи сингари энди бизнинг маҳалла аҳолиси ҳам узумчилик билан шуғулланади. Ҳамқишлоқларимга бу борада қўлимдан келганича хизмат қиламан.  

Отахон 2011 йилда нафақага чиққач, томорқасида узумчилик билан шуғуллана бошлайди. Узоқ йиллар узум етиштириб, ток парваришининг ҳадисини олади. Ҳозир узумнинг ризамат, ҳусайни, келин бармоқ, шоҳонаки, кетмон соп каби навларини кўпайтирмоқда. Отахон янги «абатар» навини пайванд қилганини айтади.    

Ижтимоий тармоқларда Паркент тумани Сўқоқ қишлоғида 13 апрель куни кучли сел келгани ҳақида видео хабарлар тарқалди.

Ҳолат юзасидан хабар берган ФВВга кўра, 13 апрель куни қисқа муддатда ёғиб ўтган кўп миқдордаги кучли ёғингарчилик оқибатида Паркент тумани Сўқоқ қишлоғининг Чашма маҳалласида сел оқимлари юзага келган.

Ҳодиса оқибатида Паркент тумани Сўқоқ қишлоғининг Чашма маҳалласи ҳудудидан оқиб ўтувчи сув йўлига  кучли ёғингарчилик оқибатида оқиб келган сув сиғмай, мазкур ҳудуддаги автомобил йўлининг қатнов қисмига тошиб чиқган.

Паркент туман Фавқулодда вазиятлар бўлими ва тегишли хизматлар томонидан мазкур ҳолат юзасидан ҳудудда ўрганиш ишлари олиб борилди ва ўрганиш натижасида ҳеч қандай талофатлар юзага келмаганлиги аниқланди.

Яқин Шарқ мамлакатларининг бир қисми устидан ҳаво ҳудудининг ёпилиши муносабати билан, шунингдек, Ўзбекистон Республикаси авиация ҳукуматининг парвозлар хавфсизлигини таъминлаш зарурати билан боғлиқ қарорини ҳисобга олган ҳолда,Uzbekistan Airways фақат 2024 йил 15 апрель куни HY301/302 Тошкент — Тел-Авив — Тошкент йўналишидаги авиақатновларини бекор қилади.

Фақат 2024 йил 15 апрель куни амалга оширилиши режалаштирилган HY301/302 авиақатнови авиачипталарини қайта бронь қилиш ёки пул маблағларини жарима ундирилмаган ҳолда қайтариш учун йўловчилардан Uzbekistan Airways Sales филиалига ёки авиакомпаниянинг хориждаги ваколатхоналарига мурожаат қилишларини сўраймиз.

Uzbekistan Airways йўловчилар хавфсизлиги ҳамма нарсадан устун эканлигини эслатиб ўтади. Йўловчилар ва кутиб олувчиларга етказилган ноқулайликлар учун узр сўраймиз. Бизнинг янгиликларимизни кузатиб боринг,- дейилади хабарда.

Олий Мажлис Қонунчилик палатаси депутати Қодир Жўраевнинг маълум қилишича, ҳозирда ишчи гуруҳ тузган ҳолда электр токи ёрдамида балиқ овлаганлик учун жазо чораларини кучайтириш, жумладан, Жиноят кодексига алоҳида модда киритиш масаласи ўрганиб чиқилмоқда.

Яқинда Президент Шавкат Мирзиёев раислигида ўтказилган видеоселектор йиғилишида, 2024 йилнинг ўтган 3 ойида 39 та электр токи ёрдамида балиқ овлаш ҳолатлари аниқлангани қайд этилган эди.

Мутахассисларнинг фикрича, сувга электр токи юборилганда – 10-15 метргача радиусдаги минглаб балиқчалар қирилиб кетади.

Коррупцияга оид ҳуқуқбузарлик ҳақида Бош прокуратура, Давлат хавфсизлик хизмати, Ички ишлар вазирлиги, Бош прокуратура ҳузуридаги Иқтисодий жиноятларга қарши курашиш департаментига хабар берган ёки коррупцияга қарши курашишга бошқа тарзда кўмаклашган шахслар БҲМнинг 25 бараваригача (8 млн 500 минг сўм) миқдорида бир марталик пул мукофоти билан рағбатлантирилади.

 Фуқаролар ёки фуқаролиги бўлмаган шахслар томонидан ўзларига нисбатан пора талаб қилган шахс ҳақида ёки ўзларига маълум бўлган коррупцияга оид ҳуқуқбузарлик ҳақида коррупцияга қарши курашувчи органларга берган хабари асосида бундай ҳуқуқбузарлик фош этилиши;

Нодавлат тижорат ташкилотининг ёки бошқа нодавлат ташкилотининг ёхуд давлат органининг, давлат иштирокидаги ташкилотнинг ёки фуқаролар ўзини ўзи бошқариш органининг хизматчиси ўзига нисбатан пора беришни таклиф этган ёки пора талаб қилган шахс ҳақида ёхуд ўзига маълум бўлган коррупцияга оид ҳуқуқбузарлик ҳақида коррупцияга қарши курашувчи органларга (коррупцияга қарши курашувчи органларнинг ходимлари эса бевосита ўз раҳбарига) берган хабари асосида ҳуқуқбузарлик фош этилиши;

Коррупцияга оид жиноятни содир этганлиги учун қидирувда бўлган шахс тўғрисида ҳуқуқни муҳофаза қилувчи органларга берилган хабар асосида қидирувдаги шахс ушланиши, ҳуқуқни муҳофаза қилувчи органларнинг ходимлари бундан мустасно. 

Ургут тумани  Навоийшох кўчасида ҳаракатланиб келаётган кобалт русумли транспортда 600 гр гиёхвандлик моддаси борлиги аниқланган. Бу ҳақда Туман ҳокимлиги хабар берди.

2024 йил 13 апрель куни соат 17:50 лар атрофида Уругут туманиНавоийшох кўчасида харакатланиб келаётган кобалт русумли транспорт воситаси Ургут тумани ИИБ ЖХХ ЙҲХБ ходимлари томонидан тўхтатилиб,  хужжатлари текширилган.  Ҳайдовчи ўзини шубхали тутганлиги сабабли соҳавий хизмат ходимлари ва холислар иштирокида транспорт воситасининг салон қисми кўздан кечирилганда сариқ пакетга ўралган тўқ жигар рангли ўткир хидли ёпишқоқ симон тахминан оғирлиги 600 гр бўлган опий гиёхвандлик моддаси борлиги аниқланиб холислар иштрокида олинди. 

Хозирда Самарқанд вилояти ИИБ Тергов Бошқармаси томониданЖКнинг тегишли моддаларига асосан жиноят иши қўзғатилиб  дастлабки суриштирув ишлари олиб борилмоқда.

Давлат рўйхатидан ўтмасдан Фарғона вилояти Ўзбекистон тумани Қоратепа Дашт қишлоғи ҳудудидаги яшаш хонадонида тижорат мақсадларида ноқонуний  оҳак  цехи ташкил қилиб, табиий газ тармоғига ўзбошимчалик билан улаб олган шахс қўлга олинди. Бу ҳақда Бош прокуратура хабар берди.

Фарғона вилоят прокуратураси, ИЖҚК Департаменти вилоят бошқармаси томонидан ёқилғи — энергия ресурсларидан ноқонуний фойдаланиш билан боғлиқ ҳолатларни фош этишга қаратилган назорат тадбирлари давом этмоқда. 

Хусусан, фуқаро А.У. тегишли тартибда давлат рўйхатидан ўтмасдан Фарғона вилояти Ўзбекистон тумани Қоратепа Дашт қишлоғи ҳудудидаги яшаш хонадонида тижорат мақсадларида ноқонуний  оҳак  цехи ташкил қилиб, табиий газ тармоғига ўзбошимчалик билан улаб, 69,4 млн. сўмлик 46,2 минг метр. куб газни яширин равишда ўғирлагани аниқланди. 

Мазкур ҳолат юзасидан 14.04.2024 йилда Жиноят кодексининг 169-моддаси 2-қисми “д” банди билан жиноят иши қўзғатилиб, А.У. процессуал тартибда ушланган. 

Ҳозирда тергов ҳаракатлари олиб борилмоқда.

Ягона интерактив давлат хизматлари порталида (my.gov.uz) Давлат тиббий суғуртаси жамғармаси фаолиятига боғлиқ янги хизмат ишга туширилди.

Эндиликда имтиёзли тоифага кирувчи шахслар ўзларига тиббиёт ташкилотларида кўрсатилган тиббий хизматлар, дори воситалари ва тиббий буюмлар учун Давлат тиббий суғуртаси жамғармаси томонидан қопланган маблағлар тўғрисидаги тўлиқ маълумотларни онлайн тарзда олишлари мумкин бўлди.

Бунинг учун «my.gov.uz» порталига кириб, «Имтиёзли тоифага кирувчи шахсга электрон йўлланма асосида кўрсатилган тиббий хизматлар маълумоти»ни олиш учун сўров юборилади.

Шунингдек, ота-оналар учун фарзандларига кўрсатилган тиббий хизматлар тўғрисидаги маълумотларни олиш имконияти яратилди.

Мазкур давлат хизмати бепул бўлиб, Давлат тиббий суғуртаси жамғармаси томонидан кўрсатилади.

Хизматдан фойдаланиш учун қуйидаги ҳавола орқали ўтиш мумкин: https://my.gov.uz/uz/service/1008

Ўзбекистон ва Испания ўртасида олий таълим соҳасида ҳамкорлик алоқаларини янада жадаллаштириш мақсадида жорий йилнинг 15-16 апрель кунлари Испания Таълимни халқаролаштириш хизмати директори Альфонсо Хентил Альварес-Оссорио бошчилигидаги делегация амалий сафар билан Ўзбекистонга келди. Бу ҳақда «Дунё» АА мухбири хабар бермоқда.

Мақсад – икки мамлакат олий таълим муассасалари ўртасида ҳамкорлик алоқаларини кенгайтириш, Европа Иттифоқининг «Эразмус+» таълим дастури доирасида турли лойиҳаларда иштирок этишни таъминлаш масалаларини муҳокама қилишдан иборат.

Испания делегацияси таркибидан мамлакатнинг Аликанте, Алмерия, Вальядолид, Гранада, Уелва, Хаен, Лерида, Саламанка, Севия, Сан Хорхе каби етакчи университетлари ва Евро-Араб жамғармаси вакиллари ўрин олиши режалаштирилган.  

Ташриф чоғида Самарқанд ва Тошкент шаҳарларида икки мамлакат олийгоҳлари вакиллари иштирокида семинар ва B2B форматидаги учрашувлар бўлиб ўтади.

Сафар олдидан икки мамлакат олий таълим муассасалари вакиллари иштирокида вебинар ташкил этилди.

Мулоқот давомида Испания университетлари вакиллари таълим муассасалари фаолияти ҳақида тақдимотлар ташкил этдилар ва ҳамкорлик бўйича ўз таклифларини илгари сурдилар.

Вебинар иштирокчилари жорий йилнинг 15-16 апрель кунлари Тошкент ва Самарқанд шаҳарларида бўлиб ўтадиган учрашувларда мулоқотни давом эттириш ва ҳамкорлик истиқболларини белгилаб олишга келишиб олдилар.