Ўзбекистондаги тадбиркорлик субъектларига ишсиз хотин-қизларни иш билан таъминлаганлик учун давлат гранти ажратилади.

Бу ҳақда АОКАда ўтказилган брифингда Оила ва хотин-қизлар қўмитаси ахборот хизмати раҳбари Саодат Боймирзаева маълум қилди.

Маълум қилинишича, хотин-қизлар бандлигини таъминлаш, саломатлигини мустаҳкамлаш ҳамда уларни касбга ўқитиш фаолияти билан боғлиқ битта ижтимоий лойиҳа доирасида 20 нафаргача хотин-қизларнинг доимий бандлигини таъминлаш мақсадида тадбиркорлик субъектларига ҳар 1 нафар бандлиги таъминланадиган ишсиз хотин-қиз учун 3 миллион сўмдан ошмаган миқдорда Оила ва хотин-қизларни қўллаб-қувватлаш давлат мақсадли жамғармаси маблағлари ҳисобидан навбатдаги давлат гранти ажратилишини эълон қилинади.

Шу муносабат билан маҳаллаларда марказлар фаолияти учун навбатдаги давлат грантини олиш истагида бўлган тадбиркорлик субъектлари 2023 йил 25 ноябрга қадар тегишли маҳалла фуқаролар йиғинларига лойиҳа таклифларини ва ҳужжатларини тақдим этишлари мумкин.

Маҳалла фуқаролар йиғинлари орқали тақдим этилган лойиҳалар 28 ноябргача туман-шаҳар ишчи гуруҳлари томонидан Вазирлар Маҳкамасининг қарори билан тасдиқланган Низом талабларига мувофиқ кўриб чиқилади.

30 ноябрга қадар ҳудудий бошқармалар томонидан Оила ва хотин-қизлар қўмитасига давлат гранти ажратилиши сўралган буюртманома юборилади.

Ўзбекистонда биринчи бўлиб хусусий микро ГЭСни ишга туширилган Андижон вилоятида миллион долларлик ГЭС қурилмоқда. Бу ҳақда вилоят ҳокимлиги ахборот хизмати хабар берди.

Хабарда айтилишича, Улуғнор туманида яна бир ГЭС қурилиши бошланди. Ушбу лойиҳа қиймати 1 миллион долларни ташкил этиб, 500 дан зиёд хонадонларни узлуксиз электр энергияси билан таъминлашга мўлжалланган.

Мазкур лойиҳалар президентнинг “2023 йилда қайта тикланувчи энергия манбаларини ва энергия тежовчи технологияларни жорий этишни жадаллаштириш чора-тадбирлари тўғрисида”ги қарори ижросини таъминлаш мақсадида амалга оширилмоқда.

Кировда ўзбекистонлик бир гуруҳ гиёҳванд моддалар савдоси билан шуғулланган шахсларга нисбатан ҳукм ўқилди, дея хабар бермоқда Комсомольская правда. 

Хабар берилишича, 27 ва 29 ёшли ўзбеклар 2022 йилнинг март ойидан май ойига қадар шаҳардаги яширин жойлари орқали синтетик гиёҳванд моддаларни тарқатган.

Гуруҳ 2022 йил 12 майда қўлга олинган. Ҳуқуқ-тартибот идоралари ходимлари томонидан  220 граммдан ортиқ модда мусодара қилинган. 

Суд чет эл фуқароларига тегишли равишда 8 йил ва 6 йил 4 ой муддатга озодликдан маҳрум қилиш жазосини тайинлади. Улар жазони қаттиқ тартибли колонияда ўташади.

14 ноябрь куни қуйидаги манзилларда электр таъминоти вақтинча ўчирилди:

Сергели тумани: «Хонободтепа» МФЙнинг айрим ҳудудларида соат 09:00 дан 16:00 гача;

Яшнобод тумани: «Арғин» МФЙнинг айрим ҳудудларида 09:00 дан 17:00 гача.

Ўз навбатида, юқоридаги ҳудудларда таъмирлаш ишлари белгиланган вақтдан аввалроқ якунланиши мумкинлигини билдириб ўтамиз, дейилади «Ҳудудий электр тармоқлари» АЖ Матбуот хизмати хабарида. 

Ушбу тадқиқотнинг мақсади Ўзбекистонда чақалоқлар ўлими даражаси тенденцияларини ҳамда чақалоқлар ўлими хавфи билан боғлиқ асосий омилларни аниқлашдан иборат эди.

UNICEF таърифига кўра, чақалоқлар ўлими – бу маълум бир даврда туғилган боланинг ушбу даврдаги ёшга оид ўлим коэффициентларини ҳисобга олган ҳолда, ҳар 1 000 та туғилиш бўйича 1 ёшга тўлмасдан вафот этиш эҳтимолидир.

Тадқиқот умуммиллий хусусиятга эга бўлиб, 9.064 та туғилиш ҳақидаги маълумотларни ўз ичига олди, бунда 300 нафар бола бир ёшга тўлмасдан вафот этган.

Маълумотларимизга кўра, эгизак туғилган бир ёшгача бўлган боланинг ўлим хавфи 6,05 фоизга юқори.

Чақалоқлар ўлимини аниқловчи навбатдаги омил боланинг туғилиш тартиби эди. Тартиб бўйича иккинчи ва учинчи туғилган болаларда хавф 1,04 фоизга, тўртинчи ва ундан кейин туғилган болаларда эса оналари биринчи марта туғаётган болаларга нисбатан 2,22 фоизга юқори бўлган.

Инвестициялар, саноат ва савдо вазири Лазиз Қудратов Туркиянинг Albayrak Holding компанияси координатори Эрдал Налбант билан учрашув ўтказди. Бу ҳақда ИССВ матбуот хизмати хабар берди.

Маълум қилинишича, томонлар рақамлаштириш, инфратузилма объектларини қуриш ва машинасозлик соҳаларида янги лойиҳаларни амалга оширишни назарда тутган ҳолда икки томонлама муносабатларни фаоллаштириш ва ҳамкорликни янада ривожлантириш истиқболларини кўриб чиққан.

Учрашувда Туркия инвестициявий ва саноат доиралари учун Марказий Осиё минтақасида сармоя киритишнинг қулай йўналишини танлаш ва ўзаро манфаатли лойиҳаларни амалга оширишда ўзига хос майоқ бўлган компаниянинг мамлакатимиздаги муваффақиятли фаолияти таъкидланган.

Хусусан, Ўзбекистон шаҳарларида “Йўл ҳаракати қоидабузарликларини аниқлашнинг автоматлаштирилган фото ва видео қурилмаларини ўрнатиш” лойиҳаси доирасида амалга оширилаётган ишларнинг бориши кўриб чиқилган. Томонлар тизимни ўз вақтида ишга тушириш бўйича самарали чоралар кўриш зарурлигини қайд этган.

Маъдумот учун, Albayrak Holding 1952 йилда ташкил топган. Унинг таркибига 127 та компания киради ва ходимлар сони 15 минг кишидан ошади. Холдинг қишлоқ хўжалиги, чиқиндиларни қайта ишлаш, қоғоз маҳсулотларини ишлаб чиқариш, транспорт ва логистика, машинасозлик, инфратузилмавий ривожланиш ва бошқа соҳаларда лойиҳаларни амалга оширади.

Бишкекда Қирғизистон Иқтисодиёт вазирлиги вакили Алмаз Темирбеков ва Ўзбекистон асаларичилик тармоғи вакили Шуҳрат Ғаниев ўртасида асал сотиб олиш бўйича музокаралар бўлиб ўтди. Бу ҳақда Қирғизистон Иқтисодиёт вазирлиги матбуот хизмати хабар берди.

Музокаралар якунида ҳамкорлик меморандуми имзоланди ва Тошкентга асал етказиб бериш бўйича дастлабки шартнома тузилди. Бу қадам нафақат Қирғизистон ва Ўзбекистон ўртасидаги, балки уларнинг чегараларидан ташқарида ҳам асаларичилик ва ушбу маҳсулотларни ишлаб чиқариш соҳасидаги савдо алоқаларини кенгайтириши мумкин.

Имзoланган ҳамкорлик меморандуми қўшма лойиҳаларни амалга оширишга қаратилган бўлиб, дастлабки шартнома Тошкентга қирғиз тоғ асалини етказиб беришни маъқуллайди.

Истеъмолчиларга сифатли ва барқарор электр энергияси етказиб берилишини таъминлаш ва электр тармоқларидаги авариявий ҳолатларни олдини олиш, куз-қиш мавсумига пухта тайёргарлик кўриш мақсадида эртага, 13 ноябр куни Тошкентнинг 2 та туманида «свет» вақтинча ўчирилади.

Қуйида электр таъминоти вақтинча ўчириладиган манзиллар келтирилган:

Бектемир тумани: «Гулбоғ» ва «Ийик ота» МФЙларининг айрим ҳудудларида соат 09:00 дан 17:00 гача;

Чилонзор тумани: «Навбаҳор» МФЙнинг айрим ҳудудларида 09:00 дан 17:00 гача.

Юқоридаги ҳудудларда таъмирлаш ишлари белгиланган вақтдан аввалроқ якунланиши мумкинлигини билдириб ўтилган.

Сўнгги 10 кунда айрим истеъмолчиларнинг электр энергияси ва табиий газдан ноқонуний фойдаланишлари натижасида давлат манфаатларига 14 млрд 898 млн сўмлик зарар етказилган. Бу ҳақда Энергетика вазирлиги хабар бермоқда.

Вазирлик ҳузуридаги “Ўзенергоинспекция”, Бош прокуратура, тегишли ҳуқуқни муҳофаза қилувчи органлар, электр ҳамда газ таъминоти корхоналари мутахассислари билан ҳамкорликда ноябр ойида ўтказилган назорат тадбирларида 1 минг 185 та ҳолатда истеъмолчиларнинг табиий газ ва электр энергиясидан ноқонуний фойдаланганликлари аниқланди.

Бунда 11 млрд 338 млн сўмлик электр энергияси ва 3 млрд 560 млн сўмлик табиий газ талон-торож қилиниши натижасида давлат манфаатларига келтирилган жами 14 млрд 898 млн сўмлик зарар ундиришга қаратилди.

Ноқонуний фойдаланиш ҳолатларининг энг кўпи — Самарқанд, Фарғона ва Андижон вилоятлари ҳиссасига тўғри келади.

Қоидабузар истеъмолчиларга нисбатан белгиланган тартибда чоралар кўрилиб, тегишли ҳужжатлар ҳуқуқни муҳофаза этувчи органларга тақдим қилинди.

4 декабрдан бошлаб “Ўзбекистон ҳаво йўллари” Хабаровск халқаро аэропортидан Тошкентга тўғридан-тўғри мунтазам рейсларни йўлга қўяди. 

Жадвалга кўра, Хабаровскдан Тошкентга ҳафтада бир марта – душанба кунлари бориш мумкин бўлади.

Хабаровскдан учиш 23.20 га белгиланган, қайтиш рейси Тошкентдан 21.20 да келади.

Ўзбекистон пойтахтига учиш вақти тахминан 7 соатни ташкил қилади.

Хабаровскдан йўловчилар ўз манзилларига бизнес-классда 16 ўрин ва эконом-классда 172 ўринли салонга эга Airbus A321 самолётида етказилади. Парвоз давомида йўловчиларга салқин ва иссиқ ичимликлар, шунингдек, овқатланиш таклиф этилади.

Россияликлар Ўзбекистоннинг асосий аэропорти Европа ва Шимолий Америка мамлакатларига қулай трансферларни таклиф этади, дея баҳолашмоқда.