Бухоро вилоятда аҳолига кўрсатилаётган транспорт хизматлари сифатини ошириш, йўловчиларга қўшимча қулайликлар яратиш, жамоат транспорти тизимини такомиллаштириш бўйича зарур чоралар кўрилмоқда.
Йўловчи ташиш фаолияти билан шуғулланувчи тадбиркорлик субъектлари томонидан ҳаракат таркибини янгилаган ҳолда йўловчиларга қулай ва хавфсиз хизмат кўрсатишни ташкил этиш масаласига алоҳида эътибор қаратилмоқда.
Айни шу йўналишда вилоятга экологик тоза, ҳар томонлама қулай ва замонавий электробус олиб келинди. Атроф-муҳит учун мутлақо зарарсиз бўлган бу турдаги транспорт воситалари камхаржлиги билан ҳам қатор афзалликларга эга.
Хитойнинг “Zhongtong Bus со., Ltd” компаниясида ишлаб чиқарилган мазкур электробус 2,5 соат давомида оладиган тўлиқ қуввати билан 300-350 километр масофани босиб ўтади.
Тажриба синов натижаларидан келиб чиққан ҳолда йил охирига қадар вилоятга ушбу электробуслардан 100 та олиб келиниб, йўналишларга жойлаштирилиши режалаштирилган.
