Ўзбекистон Республикаси Президенти Шавкат Мирзиёев 22 октябрь куни Евроосиё иқтисодий комиссияси (ЕИК) Ҳайъати раиси Бақитжан Сағинтаевни қабул қилди. Учрашувда Ўзбекистоннинг кузатувчи давлат сифатида Евроосиё иқтисодий иттифоқи (ЕОИИ) билан ўзаро манфаатли ҳамкорлиги изчил кенгайиб бораётгани таъкидланди.
Суҳбат чоғида томонлар савдо ва инвестициялар ҳажмини ошириш, савдо тўсиқларини қисқартириш ҳамда божхона ва транспорт тартиб-таомилларини рақамлаштириш масалаларини муҳокама қилдилар. Шунингдек, техник тартибга солиш тизимларини яқинлаштириш бўйича «йўл харитаси» ижроси ва Евроосиё тараққиёт банки доирасидаги кооперация лойиҳалари ижобий баҳоланди. Учрашув якунида жорий йил охирига қадар қўшма ишчи гуруҳнинг навбатдаги йиғилишини ўтказиш ҳамда янги Ҳамкорлик режасини қабул қилишга келишиб олинди.
