Ўзбекистон аҳолисининг 55,7 фоизи ёки 21,7 миллион нафари меҳнатга лаёқатли ёшда. Бу ҳақда Миллий статистика қўмитаси аҳоли ва қишлоқ хўжалигини рўйхатга олиш якунлари бўйича маълумот берди.
Мамлакат аҳолисининг қарийб учдан бир қисми ҳали меҳнатга лаёқатли ёшга етмаган. Бу 12,5 миллион киши ёки умумий аҳолининг 32 фоизини ташкил этади.
Яна 4,8 миллион киши (12,3 фоиз) меҳнатга лаёқатли ёшдан юқори бўлган аҳоли қаторига киради.
Шундай қилиб, мамлакатда ҳар 100 нафар аҳолига ўртача 56 нафар меҳнатга лаёқатли ёшдаги киши тўғри келади.
Аввалроқ Миллий статистика қўмитаси аҳолининг таълим даражаси ҳақида маълумот берган эди. Рўйхатга олиш натижаларига кўра, Ўзбекистонда 15 ёшдан катта бўлган 3,27 миллион киши ёки ушбу ёш гуруҳидаги аҳолининг 12 фоизи олий ёки олий таълимдан кейинги маълумотга эга. Шу билан бирга, мазкур ёш гуруҳидагиларнинг 42,8 фоизи умумий ўрта маълумотли ҳисобланади.
