Германиянинг сайёҳат ва туризмга ихтисослашган нуфузли «Travelbook» онлайн-журналида Ўзбекистон пойтахтига бағишланган кенг қамровли мақола эълон қилинди. Мақола муаллифи Лена Браун Тошкентни қадимий шарқона анъаналар, замонавий архитектура ва бой миллий ошхона мукаммал уйғунлашган ноёб шаҳар сифатида эътироф этади.
Нашрда пойтахтнинг модернистик архитектурасига алоҳида эътибор қаратилиб, жорий йилнинг июль ойида шаҳарнинг 10 та меъморий обидаси ЮНЕСКОнинг Бутунжаҳон мероси рўйхатига киритилгани таъкидланади. Модернизм ва миллий анъаналар уйғунлигига яққол мисол сифатида Ўзбекистон тарихи давлат музеи биноси келтирилган. Шунингдек, муаллиф ўқувчиларни Ҳазрати Имом мажмуаси, Кўкалдош мадрасаси ҳамда жорий йилнинг март ойида фойдаланишга топширилган Ўзбекистон Ислом цивилизацияси маркази каби тарихий-диний масканлар билан таништиради.
Сайёҳлар учун алоҳида жозибадор манзиллар сифатида санъат галереясига тенглаштирилган Тошкент метрополитени, машҳур «Чорсу» ва Миробод бозорлари, «Беш Қозон» миллий таомлар маркази, шунингдек «Tashkent City» ҳудудидаги замонавий масканлар кўрсатиб ўтилган. Бундан ташқари, Тошкент бутун минтақа бўйлаб сайёҳат қилиш учун қулай марказ экани, «Афросиёб» тезюрар поездлари орқали Самарқанд ва Бухорога қулай етиб олиш мумкинлиги урғуланган. Эслатиб ўтамиз, «Travelbook» журнали Тошкентни 2027 йил учун энг истиқболли сайёҳлик йўналишлари рўйхатига ҳам киритган эди.
