Фирибгарлик эҳтимоли билан боғлиқ жиноят иши доирасида икки киши, жумладан, Imarat Development қурилиш лойиҳаси эгаси Марат Хамдамов ушланди. Бу ҳақда Тошкент шаҳар ИИББ хабар берди.
Идора маълумотларига кўра, М. Х. ва Ж. А. Жиноят-процессуал кодексининг 227-моддаси тартибида ушланган. Хамдамов иш бўйича гумонланувчи сифатида ўтмоқда.
1 ноябрь куни Imarat Development МЧЖ раҳбариятига нисбатан жиноят иши қўзғатилган. Тергов Жиноят кодексининг 168-моддаси (фирибгарлик) ва 192¹¹-моддаси (нодавлат ташкилоти мансабдор шахслари томонидан ваколатларни суиистеъмол қилиш) бўйича олиб борилмоқда.
Иш компания мижозларининг шартномаларда белгиланган муддатларда хонадонлар топширилмагани ҳақидаги шикоятлари билан боғлиқ.
Қурувчи компанияга нисбатан эътирозлар ҳақида нималар маълум?
Imarat Development атрофидаги муаммолар ўтган йилдан буён муҳокама қилиб келинмоқда. 2025 йил июль ойида Қуйичирчиқ туманидаги Sergeli City турар жой мажмуаси қурилишида қоидабузарликлар аниқланган.
Қурилиш инспекцияси маълумотларига кўра, бешта блокдаги ишлар зарур давлат рўйхатидан ўтказилмасдан олиб борилган. Мутахассислар бетон устунларда бўшлиқлар, пойдевор остида сув тўплангани ва лойиҳада кўзда тутилган дренаж тизими мавжуд эмаслигини ҳам аниқлаган.
Инспекция қоидабузарликларни бартараф этишни талаб қилган ва ушбу блокларда қурилиш ишларини вақтинча тўхтатган. Ўшанда Марат Хамдамов қурилиш бутунлай тўхтатилмаганини билдирган.
Кейинчалик харидорлар пулларини қайтариб олиш билан боғлиқ муаммолар ҳақида очиқ гапира бошлаган. Уларнинг сўзларига кўра, компания блогерлар иштирокидаги реклама орқали мижозларни жалб қилган ҳамда уй-жойларни бошланғич бадалсиз ёки минимал тўлов билан бўлиб тўлаш шарти асосида таклиф қилган.
Мижозлар сотув менежерлари томонидан кўрсатилган объектлар манзиллари ҳақиқатга мос келмаслиги ҳақида ҳам билдирган. Хусусан, Қуйичирчиқ туманидаги лойиҳа Сергелий ва Янгиҳаёт туманларида жойлашган турар жой мажмуаси сифатида тақдим этилган. Паркент туманидаги объект эса Янги Тошкентдаги лойиҳа сифатида кўрсатилган.
Харидорларнинг айтишича, айрим объектларда қурилиш ишлари секин олиб борилган, баъзи майдонларда эса ишлар котлован қазиш босқичида қолиб кетган. Шартномаларни бекор қилишга уринган мижозлар жарима, пеня ва маблағларни қайтариш кечиктирилаётганидан ҳам шикоят қилган.
Жиноят иши бўйича тергов давом этмоқда. Ушланган шахсларнинг айби ҳозирча исботланмаган.
