26 август куни Ўзбекистон Давлат хавфсизлик хизмати наркотик воситаларнинг ноқонуний айланмаси билан шуғулланганликда гумон қилинган гуруҳ фаолиятига чек қўйилганини маълум қилди.
Идора маълумотига кўра, Сирдарё туманида гуруҳга тегишли вақтинчалик яшаш жойи аниқланган. У ерда муқаддам судланган 41 ёшли Тошкент шаҳрида яшовчи шахс бўлган.
Тергов давомида Қашқадарё вилоятида рўйхатдан ўтган 43 ёшли Тожикистон фуқароси ва 1964 йилда туғилган, муқаддам судланган яна бир шахснинг ҳам ушбу ишга алоқадорлиги аниқланган.
Тергов версиясига кўра, уч нафар шахс катта миқдордаги опиумни қайта сотиш мақсадида келишиб олган. Улар гиёҳвандлик воситасини кичик дозаларга қадоқлаб, юқори устама нархда сотишни режалаштирган.
Наркотик воситалар Жиззах вилоятининг Янгиобод туманидаги яширин жойга беркитилган. ДХХ маълумотига кўра, ушбу яширин жойни Тожикистондан келган наркокурьерлар жиҳозлаган.
Ҳуқуқни муҳофаза қилувчи органлар томонидан 13 килограмм 653 грамм опиум мусодара қилинди.
Мазкур ҳолат юзасидан жиноят иши қўзғатилди. Гумон қилинувчиларга 20 йилгача озодликдан маҳрум қилиш жазоси таҳдид қилмоқда.
