Тошкент шаҳрининг Яшнобод туманида такси ҳайдовчиси ва йўловчи ўртасидаги оғзаки жанжал муштлашувга айланган. Ҳодиса ортидан икки шахсга нисбатан жиноят иши қўзғатилди.
Ҳодиса 17 август куни соат 19:30 атрофида Абдулла Қодирий кўчасида содир бўлган. Тошкент шаҳар ИИББ маълумотига кўра, 1999 йилда туғилган Onix русумли автомобиль ҳайдовчиси ва 2001 йилда туғилган йўловчи аёл ўртасида жанжал келиб чиққан.
Ҳайдовчи аёлдан автомобилдан тушишни сўраган. Йўловчи эса бу талабни бажармасдан, воқеа жойига блогер бўлган акасини чақирган.
Унинг келиши ортидан эркаклар ўртасида муштлашув юзага келган. Ҳодиса акс этган видеолар кейинчалик ижтимоий тармоқларда тарқалган.
Ҳолат юзасидан йўловчининг акасига нисбатан Жиноят кодексининг 277-моддаси (безорилик) билан жиноят иши қўзғатилган.
Шунингдек, йўловчи аёлга нисбатан Жиноят кодексининг 139-моддаси 2-қисми (туҳмат) асосида жиноят иши очилган. Маълум қилинишича, у ҳайдовчини айблаган ва унга босим ўтказишга уринган.
Ҳозирда ҳолат юзасидан тергов ҳаракатлари давом этмоқда.
