Ўзбекистон терма жамоаси Тошкентда ўтказилган ўсмирлар ва ёшлар ўртасидаги оғир атлетика бўйича Осиё чемпионатини 51 та медаль билан якунлади.
Мусобақанинг сўнгги куни Олимпия шаҳарчасида энг оғир вазн тоифасида медаллар учун баҳслар бўлиб ўтди.
110 килограммдан юқори вазнда ёшлар ўртасида Омадилло Олимов даст кўтариш ва иккикураш натижалари бўйича олтин медални қўлга киритди. Шу тариқа, спортчи икки карра чемпионликни расмийлаштирди.
Умуман, Ўзбекистон ёшлар терма жамоаси 23 та медаль — 7 та олтин, 10 та кумуш ва 6 та бронза медалини қўлга киритди.
Ўсмирлар эса жамоа ҳисобига яна 28 та медаль қўшди. Улар 6 та олтин, 8 та кумуш ва 14 та бронза медалига эга бўлди.
Ўзбекистон, шунингдек, бир қатор йўналишларда жамоавий ҳисобда биринчи ўринни эгаллади. Жумладан, ёшлар, қизлар, ўсмирлар ва ўғил болалар ўртасида умумий очколар бўйича терма жамоа биринчи бўлди.
Ўзбекистон Миллий олимпия қўмитаси спортчилар, мураббийлар, Ўзбекистон оғир атлетика федерацияси ва мухлисларни қитъа чемпионатидаги муваффақиятли иштирок билан табриклади.
