Тошкент шаҳридаги модернизм меъморчилигининг машҳур намуналаридан бири ҳисобланган «Мовий гумбазлар» мажмуаси илмий тадқиқотлар асосида ҳамда маданий меросни асрашнинг халқаро тамойилларига мувофиқ тўлиқ реставрация қилиниб, ўзининг дастлабки қиёфасига қайтарилади. Бу ҳақда Маданий мерос агентлиги маълум қилди.
Маълум қилинишича, агентлик директорининг биринчи ўринбосари Элмурод Нажимов объектни унинг муаллифи, таниқли меъмор Вил Муратов билан биргаликда кўздан кечирган. Учрашув давомида тарихий иншоотни илмий асосда тиклаш ва унинг меъморий қиёфасини сақлаб қолиш масалалари муҳокама қилинган.
1968–1970 йилларда барпо этилган «Мовий гумбазлар» нафақат модернизм меъморчилигининг ноёб ёдгорлиги, балки Тошкентнинг ўзига хос рамзларидан бири ҳисобланади. 2019 йилда Вазирлар Маҳкамаси қарори билан объект кўчмас моддий маданий мерос объектларининг Миллий рўйхатига киритилган.
Қайд этилишича, кейинги йилларда амалга оширилган таъмирлаш ишлари давомида мажмуанинг мозаика безакларига ўзгартиришлар киритилган. Бу эса объектнинг тарихий меъморий ва бадиий қиёфасига таъсир кўрсатган.
Ҳозирда «Мовий гумбазлар»нинг илк кўринишини аниқлаш ва уни қайта тиклаш ишлари объект муаллифи Вил Муратов иштирокида илмий асосда олиб борилмоқда. Реставрация жараёнида иншоотнинг тарихий қиёфасини максимал даражада сақлаб қолишга алоҳида эътибор қаратилиши таъкидланди.
