Сирдарё вилоятида чиябўрининг одамларга ҳужум қилиши билан боғлиқ ҳолат қайд этилди.
Ҳодиса 9 июнь куни соат 17:30 атрофида Гулистон туманидаги «Ишонч» маҳалласи ҳудудида, дала майдони яқинида содир бўлган.
Маълумотларга кўра, ёввойи ҳайвон маҳаллий аҳолининг тўрт нафар вакилига ҳужум қилган. Воқеа гувоҳларидан бири вазиятга зудлик билан аралашиб, чиябўрини зарарсизлантирган ва атрофдагилар учун юзага келиши мумкин бўлган янада каттароқ хавфнинг олдини олган.
Жабрланганларга дарҳол тиббий ёрдам кўрсатилган. Айни пайтда улар шифокорлар назорати остида бўлиб, тиббиёт ходимлари маълумотига кўра, барчасининг аҳволи қониқарли деб баҳоланмоқда.
Масъул идоралар томонидан ҳодиса сабаблари ва ҳолатлари ўрганилмоқда. Шунингдек, бундай ҳолатларнинг такрорланишининг олдини олиш мақсадида зарур профилактик чора-тадбирлар кўрилмоқда.
Ҳозирча ҳайвоннинг нега агрессив ҳаракат қилгани аниқланмоқда.
