Бельгиянинг нуфузли нашрлари томонидан Ўзбекистон ва Бельгия ўртасидаги муносабатларнинг янги босқичига бағишланган мақола эълон қилинди. Унда Бельгиянинг Тошкент шаҳрида элчихона очиш қарори икки давлат ўртасидаги ҳамкорликни янада мустаҳкамлашга хизмат қилиши таъкидланган.
Мақолада қайд этилишича, сўнгги ўн йил ичида Ўзбекистон ва Бельгия ўртасидаги дипломатик ҳамда иқтисодий алоқалар изчил ривожланиб борди. Савдо, инвестициялар ва сиёсий мулоқот соҳаларидаги ҳамкорлик янги мазмун билан бойиб, ўзаро манфаатли лойиҳалар сони ортиб бормоқда.
Нашр муаллифларининг фикрича, Бельгиянинг Ўзбекистонда дипломатик ваколатхона очиши оддий маъмурий қарор эмас. Бу қадам Ўзбекистоннинг Марказий Осиёдаги иқтисодий ва геосиёсий аҳамияти ортиб бораётганини, шунингдек Европа давлатларининг минтақа билан стратегик ҳамкорликни кенгайтиришга бўлган қизиқиши кучайганини кўрсатади.
Таъкидланишича, янги элчихона икки мамлакат ўртасидаги сиёсий мулоқотни фаоллаштириш, савдо-иқтисодий алоқаларни кенгайтириш ва маданий-гуманитар ҳамкорликни ривожлантириш учун қўшимча имкониятлар яратади. Шу билан бирга, мазкур қарор Ўзбекистон ва Европа давлатлари ўртасидаги муносабатларни янада чуқурлаштириш йўлидаги муҳим қадам сифатида баҳоланмоқда.
