Ўзгидромет маълумотига кўра, 6 июнь куни Ўзбекистоннинг аксарият ҳудудларида қуруқ ва илиқ об-ҳаво сақланиб қолади. Ёғингарчилик фақат Фарғона водийсининг айрим туманлари ва тоғли ҳудудларда кузатилиши мумкин.
Тошкент шаҳрида ўзгарувчан булутли ҳаво бўлиши, ёғингарчилик кутилмаслиги прогноз қилинмоқда. Ҳаво ҳарорати кечаси 17–19 даража, кундузи эса 32–34 даража иссиқ бўлади. Айрим жойларда шамол кучайиши ва чанг-тўзон кузатилиши мумкин.
Қорақалпоғистон Республикаси, Хоразм, Бухоро ва Навоий вилоятларида ёғингарчилик кутилмайди. Кундузи ҳаво ҳарорати 30–35 даражагача кўтарилади. Айрим ҳудудларда шамол тезлиги секундига 13–18 метргача кучайиши мумкин.
Тошкент, Самарқанд, Жиззах ва Сирдарё вилоятларида ҳам қуруқ об-ҳаво сақланиб, кундузи ҳарорат 30–35 даража атрофида бўлади.
Энг иссиқ ҳаво Қашқадарё ва Сурхондарё вилоятларида кузатилиб, ҳарорат 38 даражагача етиши кутилмоқда.
Андижон, Наманган ва Фарғона вилоятларида куннинг иккинчи ярмида айрим жойларда қисқа муддатли ёмғир ва момақалдироқ бўлиши мумкин.
Тоғ олди ва тоғли ҳудудларда вақт-вақти билан ёмғир ёғиши, момақалдироқ кузатилиши эҳтимоли бор. Синоптиклар мазкур ҳудудларда сел ва тошқин хавфи сақланиб қолаётгани ҳақида огоҳлантирмоқда.
Маълум қилинишича, республика тоғ олди ва тоғли ҳудудларида сел-паводок ҳодисалари юзага келиши хавфи сақланиб турибди.
