Ўзбекистон Президенти Шавкат Мирзиёев мактаб битирувчиларига йўллаган табригида ёшлар мамлакатнинг энг катта ишончи ва таянчи эканини таъкидлади. Қайд этилишича, бугунги битирувчилар эртанги муҳандис, шифокор, олим, тадбиркор ва Учинчи Ренессанс бунёдкорларидир.
Жорий йилда илк бор 11 минг нафардан ортиқ ўқувчи мактабни олтин ва кумуш медаллар билан тамомламоқда. Шунингдек, 171 нафар ёш дунёнинг етакчи университетларига ўқишга қабул қилинган бўлса, минглаб битирувчилар мамлакатимиз олий таълим муассасалари талабаси бўлишга муваффақ бўлган.
Президент таъкидлаганидек, бугун мамлакатда 207 та олийгоҳ ва 643 та техникум ёшларга замонавий билим ва касб-ҳунар бериш имкониятини яратмоқда. Шу билан бирга, меҳнат бозорида амалий билим, замонавий кўникмалар ва натижа муҳим мезонга айланиб бораётгани қайд этилди.
Ёшларни қўллаб-қувватлаш мақсадида тадбиркорлик билан шуғулланиш истагида бўлган битирувчилар учун банклар томонидан 25 триллион сўмлик имтиёзли кредитлар ажратилмоқда. Стартап лойиҳаларини амалга ошириш учун эса 100 миллион доллар маблағ йўналтирилиши белгиланган. Шунингдек, йирик IT компаниялари ҳар йили камида 50 минг нафар ёшни сунъий интеллект соҳасида ўқитиб, юқори даромадли иш ўринлари билан таъминлашга тайёр экани билдирилди.
Мурожаатда замонавий касб ва хорижий тилларни эгаллашнинг аҳамиятига алоҳида эътибор қаратилди. Ёшларга камида битта хорижий тил ва бир замонавий касбни ўрганиш тавсия этилди.
Президент ўз сўзида китоб мутолаасининг аҳамиятига ҳам тўхталиб, китоб инсоннинг энг яқин дўсти ва энг кучли қуроли эканини таъкидлади. Шунингдек, мамлакат ёшларининг халқаро майдонларда қўлга киритаётган муваффақиятлари мисолида катта мақсадлар сари интилиш ва изланишнинг аҳамияти қайд этилди.
Табрик якунида барча битирувчиларга бахт, омад ва улкан зафарлар тилаб, уларни доимо ўзгаришлар ва ислоҳотлар руҳи билан яшайдиган авлод бўлишга чақирди.
