Тошкент шаҳрининг Яшнобод туманида жойлашган кўп қаватли уйда юз берган йирик ёнғин оқибатида бир нечта оила турар жойидан айрилди.
Фожиа 15 май куни содир бўлган. Уй аҳолисининг айтишича, ёнғин хонадонлардан бирида бошланиб, қисқа вақт ичида бутун уй бўйлаб тарқалган. Одамлар болаларини қутқариб қолиш учун саросима ичида кўчага чиқиб кетишга мажбур бўлган.
Кўпчилик фақат ҳужжатларини олиб чиқишга улгурган, айрим фуқаролар эса уй кийимидаёқ ташқарига чиққан.
Ёнғин натижасида хонадон эгалари мебел, маиший техника, кийим-кечак, ҳужжатлар ва йиллар давомида тўпланган бошқа мол-мулкларидан маҳрум бўлди.
Қўшниларнинг тахминига кўра, ёнғинга хонадонлардан бирида яшовчи эркакнинг маст ҳолатда ўчирилмаган сигарета билан ухлаб қолгани сабаб бўлган бўлиши мумкин.
Ҳозирда жабрланган оилалар ҳужжатларни тиклаш ва вақтинчалик турар жой топиш билан овора. Улар содир бўлган ҳолат бўйича жамоатчиликдан ёрдам сўрамоқда.
