- Advertisement -
Қозоғистон ва Ўзбекистон чегарасидаги “Капланбек” назорат-ўтказиш пунктида фуқаролардан пул талаб қилганликда гумонланаётган эркак қўлга олинди.
Текширувларга ижтимоий тармоқларда тарқалган видео сабаб бўлган. Видеода номаълум шахс чегара пунктидаги одамлар тўпланган жойда отвертка билан таҳдид қилиб, фуқаролардан пул талаб қилаётгани айтилган.
Туркистон вилояти полиция департаменти маълумотига кўра, мазкур ҳолат юзасидан жиноят иши қўзғатилган. Гумонланувчи доимий яшаш жойига эга бўлмаган 43 ёшли маҳаллий фуқаро экани аниқланган.
Ҳозирда у Сариоғоч туманидаги вақтинча сақлаш ҳибсхонасига жойлаштирилган. Ҳолат юзасидан зарур тергов ҳаракатлари олиб борилмоқда.
