Бухоро вилоятида маст ҳайдовчи 40 нафар боғча тарбияланувчисини автобусда олиб кетган

Бухоро вилоятининг Ромитан туманида ЙПХ ходимлари ичида 40 нафар боғча тарбияланувчиси бўлган автобусни тўхтатди.

Текширув давомида ҳайдовчи транспорт воситасини маст ҳолатда бошқараётгани аниқланган. Шунингдек, у ҳуқуқни муҳофаза қилувчи орган ходимларининг қонуний талабларига бўйсунмасдан, ҳаракатни давом эттиришга уринган.

Суд ҳайдовчини маст ҳолда транспорт бошқариш, йўловчи ташиш қоидаларини бузиш ҳамда ички ишлар органлари ходимларининг қонуний талабларини бажармасликда айбдор деб топди.

Қоидабузарга 40 базавий ҳисоблаш миқдори — 16,48 млн сўм жарима тайинланди. Шунингдек, у уч йил муддатга барча турдаги транспорт воситаларини бошқариш ҳуқуқидан маҳрум қилинди.