2026 йил 1 майдан бошлаб Ўзбекистонда қурилиш, миграция, соғлиқни сақлаш, божхона тартиблари ва давлат хизматлари соҳаларига дахлдор қатор ўзгаришлар кучга киради. Бу ҳақда Norma.uz хабар берди.
Янгиликлардан бири сифатида янги кўп қаватли уйларда видеокузатув тизимларини мажбурий ўрнатиш жорий этилади. Камералар подъездлар, лифтлар ва уй атрофи ҳудудларида ўрнатилади, кириш жойларида эса домофонлар бўлади.
Миграция соҳасида сунъий интеллект технологиялари асосида ишловчи “ақлли” хизмат кўрсатиш пунктлари синов тартибида ишга туширилади. Улар Тошкент, Самарқанд ва Фарғона вилоятларининг айрим ҳудудларида, шунингдек Қорақалпоғистонда жорий этилади.
Шунингдек, умра зиёратини амалга ошириш учун сафарларни “Ҳаж ва Умра” ягона портали орқали мажбурий рўйхатдан ўтказиш тартиби жорий этилади.
Соғлиқни сақлаш тизимида халқаро тажрибаларга асосланган инфаркт ва инсультга қарши кураш бўйича Миллий дастур ишга туширилади.
Божхона соҳасида товарларни олиб киришда тўловларни босқичма-босқич амалга ошириш имконияти яратилади, шунингдек “Ягона ойна” рақамли платформаси орқали нонтариф чораларни шаффоф тартибга солиш тизими кенгайтирилади.
Архив жараёнлари ҳам соддалаштирилади: давлат органлари зарур маълумотларни электрон тизимлар орқали мустақил олиши сабабли айрим ҳужжатларни тақдим этиш талаби бекор қилинади.
Шу билан бирга, ногиронликни белгилаш тартиби ҳам ўзгаради — даволанишга йўлланмалар ва тиббиёт муассасаларига ёзилиш электрон шаклда расмийлаштирилади.
Рақамлаштиришга алоҳида эътибор қаратилган: барча лицензиялар, рухсатномалар ва хабарномалар “Лицензия” тизими ёки ЯИДХП орқали расмийлаштирилади. Марказий банк ва Истиқболли лойиҳалар миллий агентлиги ваколатига кирувчи жараёнлар бундан мустасно.
