Халқ депутатлари Тошкент шаҳар кенгашининг еттинчи чақириқ биринчи сессияси 6 ноябрь куни бўлиб ўтди. Бу ҳақда шаҳар ҳокимлиги матбуот хизмати хабар берди.
Унда Тошкент шаҳар Ҳудудий сайлов комиссияси раиси Абдулла Магруповнинг 27 октябрда бўлиб ўтган сайлов якунлари тўғрисидаги ахбороти тингланди.
Сессияда депутат Рустам Калонов Халқ депутатлари Тошкент шаҳар кенгаши раиси этиб сайланди.
Тадбирда халқ депутатлари Тошкент шаҳар кенгашига сайланган депутатларнинг партия гуруҳлари рўйхатдан ўтказилиб, кенгашнинг регламенти ва доимий комиссиялар тўғрисидаги Низом тасдиқланди.
Маслаҳатлашувда президент томонидан Тошкент шаҳар ҳокими лавозимига Шавкат Умурзоқов номзоди кўрсатилганлиги билдирилди. Халқ депутатлари Тошкент шаҳар кенгашининг қарори билан Шавкат Умурзоқов Тошкент шаҳар ҳокими лавозимига тасдиқланди.
