Хожа Дониёр маҳалласида 28 июлда содир бўлган бахтсиз ҳодиса – ёнғин 28 та оила яшаб келаётган 13 та хонадоннинг том маънода кулини кўкка совурди. Нафақат уй жиҳозлари, балки аксариятнинг барча моддий бойлик ва ҳужжатлари ҳам кулга айланди.
Ёнғин сабаблари ҳақида аҳоли орасида ҳар хил гап-сўзлар юрибди. Аммо бу ҳақда то масъул ташкилотнинг хулосаси чиқмагунча бир нарса дейиш мушкул. Бу ҳақда берган саволимга Самарқанд вилоят Фавқулодда вазиятлар бошқармаси (ФВБ) матбуот хизмати раҳбари Илҳом Боқиев “ҳужжатларни экспертлар ўрганяпти, натижаси маълум бўлиши билан уни ёнғиндан зарар кўрганларга ҳамда жамоатчиликка етказамиз”, деб жавоб қайтарди.
Ҳодиса жойида бўлганларнинг сўзларига қараганда, ёнғин жуда тез, шиддат билан атрофга тарқалган. Бахтга қарши ўша куни шаҳар бўйича водопроводда сув йўқ эди ва ёнғин бошлангандан кейин бирданига шамол кўтарилди ҳамда оловнинг тезлик билан ёйилишига сабаб бўлди.
Хожа Дониёр маҳалла раиси Рофе Охунов сўзларига қулоқ тутайлик: “Бундай офат қаердан келди? 28 та оиланинг 100 нафар аъзоси уй-жойсиз, мол-муксиз кўчада қолди. Хонадонларнинг бирида 17 кишидан иборат тўртта оила яшарди. Айримлар қариндошлариникида, баъзилар маҳалладошлариникида жойлашиб олди. Агар водопроводда сув бўлганда, гидрантлар тўғри ҳамда жойида ўрнатилганда, ўт ўчирувчилар вақтида ва сув билан келганда, балки зарар бу даражада бўлмасди”.
Уй-жойи ёниб кетган ва ёнғиндан тўрт кун олдин тўй қилиб, келин туширган Назира Марупованинг дардли, аламли сўзлари ҳеч кимни бефарқ қолдирмайди. У нега ўт ўчириш машиналари сувсиз келганлигини, унинг ва қўшниларининг аҳволи билан ҳеч ким қизиқмаётганлигини, бу ёғи нима бўлишини билмасдан, фиғони чиқмоқда.
Деярли ҳар доим ёнғинга гувоҳ бўлганлар ўт ўчириш машиналари фалокат жойига сувсиз келганлигини иддао қилишади. Аслида ҳам шундайми? Бу саволга вилоят ФВБ бошлиғи Илҳом Исмоилов жавоб бериб, бундай ўйлаш хато эканлигини таъкидлади.
“Ўт ўчириш машиналарининг конструкцияси шундайки, улар сувсиз ҳаракатлана олмайди. Машинанинг суви тезда тугаши туфайли одамлар уни сувсиз келди деб ўйлашади. Гап шундаки, 4 тонналик машинанинг суви икки дақиқага етмасдан тугайди. Шу сабабли ўт ўчириш машиналари ёнғин жойига келганда иложи бўлса, сув манбаига уланишга интилади”, – дейди И.Исмоилов.
Ёнғиндан талофат кўрган оилалар маҳаллий ҳокимият, турли ташкилотлар ёрдамига муҳтож. Ёнғиндан бир кун ўтиб, маҳаллага шаҳар ҳокимининг ўринбосари Фирўз Нажмиддинов келиб, вазият билан танишган. Маҳалла раиси Р.Охунов хонадонларга етказилган зарарни ҳисоблаб, алоҳида рўйхат тузган ҳолда шаҳар ҳокимига тақдим этди.
Яна бир муҳим муаммо шундан иборатки, тегишли давлат органлари ёнғинда қолиб кетган уй-жой ҳужжатлари ҳамда шахсий ҳужжатларни тиклашда амалий ёрдам кўрсатишлари зарур.
Қолаверса, юртимизда саховатпеша, савобталаб инсонлар оз эмас. Ўйлаймизки, улар ҳам четда қараб турмайди.
Тошпўлат Раҳматуллаев,
Самарқанд вилояти бўйича ўз мухбиримиз
