Самарқанддаги “Bassiane” тунги клуби олдида жанжал қилган барча шахсларга нисбатан жиноят иши қўзғатилди. Бу ҳақда вилоят ИИБ Ахборот хизмати хабар қилди.Қайд этилишича жорий йилнинг 7 август куни фуқаро E.B. ўзининг таниши билан “Bassiane” номли тунги клубга дам олиш мақсадида кирмоқчи бўлган вақтида, клубда қўриқчи бўлиб ишловчи R.M. уларни клубга киритмаслигини айтиб, турли ножўя сўзлар билан ҳақорат қилиб, бир гуруҳ шериклари билан уларни уриб, тан жароҳати етказган.
Мазкур ҳолат юзасидан фуқаро R.M. ва бошқа шахсларга нисбатан Самарқанд шаҳри бўйича ИИО ФМБ ҳузуридаги Тергов бўлими томонидан Ўзбекистон Республикаси ЖКнинг 277-моддаси 2-қисми «б» банди (бир гуруҳ шахслар томонидан безорилик) билан жиноят иши қўзғатилди.
Тергов ҳаракатлари олиб борилмоқда.Шунингдек, вилоят ИИБ жанжалда бир киши вафот этганлиги тўғрисидаги хабарлар ҳақиқатга тўғри келмаслиги таъкидлаган.Аввалроқ, Тошкент шаҳридаги Амир Темур хиёбонида вояга етмаган йигитлар жанжаллашгани ҳамда ҳолат юзасидан Мирзо Улуғбек тумани ИИО ФМБ томонидан текширув ўтказилаётгани ҳақида хабар қилинганди.