Куни кеча Мактабгача ва мактаб таълими вазири Ҳилола Умарова иштирокида матбуот анжумани бўлиб ўтди. Унда мактаб ер майдонларини ноқонуний эгаллаш ҳолатлари бўйича ҳам савол берилди.
«Очиғини айтишимиз керак, бундай ҳолатлар тизимга бегона эмас. Айниқса, 2019-2022 йилларда тизимдаги 279 та мактаб ва мактабдан ташқари таълим муассасаларида ноқонуний равишда 470 та ҳолатда 93,6 гектар ер майдони фуқаролар ва маҳаллий ҳокимликлар қарори асосида ўзлаштирилган.
Бугунги кунда, 256 та ҳолат бўйича Фуқаролик ва маъмурий судларга даво аризалари киритилиб, 189 та суд қарорлари тизим фойдасига қаноатлантирилди. 58 та объект мактаблар балансига тўлиқ қайтарилган.
Биргина мисол, Қўқон шаҳридаги 27-мактабни олайлик. Мактаб биносини иккита ташкилот ноқонуний равишда эгаллаб олган. Вазирликнинг позицияси аниқ, биз мактабларни тўлиқ қайтариб олишни хоҳлаймиз. Ҳозирда бу борада ҳаракатлар олиб бориляпти», дея муносабат билдирди Ҳилола Умарова.
