Биз ўлим жазоси тайинланадиган жиноятлар сонини босқичма-босқич камайтириб, бу жазони тўлиқ бекор қилдик. Шунга қарамасдан, айрим фуқаролар томонидан ўлим жазосини тиклаш, уни жиноят қонунчилигига қайта киритиш ҳақида таклифлар ҳам илгари сурилмоқда. Ваҳоланки, яшаш ҳуқуқи – ҳар бир инсоннинг табиий ҳуқуқи бўлиб, унга бу ҳуқуқни давлат эмас, Яратганнинг ўзи ато этган. Номукаммал суд тизимидаги бир хато инсоннинг умрига зомин бўлиши мумкин. Чунки эртага уни қайтариб бўлмайди. Инсон зоти бундай қарор чиқариши одамийлик мезонларига тўғри келмайди.
Киритилаётган ўзгартириш нафақат ўлим жазосини бекор қилиш, балки қатъий равишда тақиқланишини эълон қилмоқда. Ўзгаришнинг Конституциядан ўрин олиши буни янада мустаҳкамлайди, давлатимиз бу ўта жиддий масалада ҳеч қачон ортга қайтмаслигини, инсонпарварлик ғояларига содиқ эканлигини бутун дунёга яққол намоён қилади. Бугунги кунда 106 давлатда (Италия, Норвегия, Швенция, Польша ва бошқ.) ўлим жазоси барча жиноятлар учун бекор қилинган.
Хулоса: Инсон ҳаёти – олий қадрият ва илоҳий неъмат, бунинг Конституциямизда акс эттирилиши бизни дунё ҳамжамиятидаги нуфузимиз яна бир поғона ошишига хизмат қилади, демократик ислоҳотлар ва инсонпарварлик йўлида собит эканимизга ишончини янада оширади.
Депутат: Иномжон Қудратов
Эксперт: Фарҳод Примов
