Сочидан Омскга учаётган “Ural Airlines” авиакомпаниясининг Аирбус-А320 лайнери Новосибирск вилоятининг Убинский туманидаги далага фавқулодда қўнишни амалга оширди, деб хабар бермоқда Россия Фавқулодда вазиятлар вазирлиги. Дастлабки маълумотларга кўра, қурбонлар йўқ.
Дастлаб Фавқулодда вазиятлар вазирлиги ва вилоят транспорт прокуратураси самолёт бортида 159 киши, жумладан 23 нафар бола ва олти нафар экипаж аъзоси бўлганини маълум қилган эди. Кейинроқ Новосибирск вилояти Фавқулодда вазиятлар вазирлиги самолёт бортида 170 киши бўлганига аниқлик киритди.
Flightradar маълумотларига кўра, самолёт Омск аэропортига қўнмаган, йўналишини ўзгартирган, транспондер кодини 7700 (асосий сигнал) ўрнатган ва кейин Новосибирск томон учган. Новосибирск аэропорти матбуот хизмати самолёт муқобил аэродромга учаётганини тасдиқлади.
Омск вилояти губернатори вазифасини бажарувчи Виталий Хоценконинг айтишича, фавқулодда қўнишга дастлабки сабаб гидравлика тизимидаги носозлик бўлган. Убинский тумани раҳбари Олег Конюк агентликка самолётнинг фюзеляжи бузилмаганини, барча йўловчилар эвакуация қилинганини айтди. Хоценко ўзининг Телеграм-каналида қутқарувчилар воқеа жойида иш олиб бораётганини ёзган.
Ғарбий Сибир транспорт прокуратураси ҳодиса сабабларини ўрганмоқда. Парвозлар хавфсизлиги қонунчилигининг бажарилиши текширилмоқда. Фавқулодда вазиятлар вазирлигининг минтақавий бош бошқармасига таяниб, “РИА Новости” фавқулодда қўниш жойида ҳеч қандай бино ва вайроналар йўқлигини хабар қилмоқда.
