Германия ташқи ишлар вазири Анналена Бербок БМТ Хавфсизлик Кенгаши ва Халқаро жиноий судни ислоҳ қилишга чақирди.
Бербок Хавфсизлик Кенгаши охирги марта 60 йил олдин ислоҳ қилинганини ва шу вақтдан бошлаб жаҳон сиёсатида — Африкада, Лотин Америкаси ва Осиёда ҳам янги мустақил давлатлар пайдо бўлганини эслатди.
“Бу давлатлар қарорлар қабул қилишда овоз бериш ҳуқуқини ва музокаралар столидан жой олишни ҳақли равишда талаб қилмоқда”, дейди Германия ТИВ раҳбари. Шунингдек, у бошқа халқаро институтлар, масалан, Халқаро жиноий суднинг Рим статути ҳам ислоҳотга муҳтожлигини қўшимча қилди.
Аввалроқ Қозоғистон президенти Қосим-Жомарт Тоқаев БМТ Хавфсизлик кенгаши таркибига ўзгартиришлар киритиш зарурлигини маълум қилган эди.
“Бирлашган Миллатлар Ташкилоти ягона универсал ташкилот бўлиб қолмоқда, аммо унинг Хавфсизлик Кенгаши ислоҳ қилиниши керак”, деган эди Тоқаев.