Америка Қўшма Штатлари Марказий разведка бошқармаси (МРБ) директори шу ҳафта қиролликка эълон қилинмаган ташрифи чоғида Саудия Арабистонининг Эрон билан яқинда муросага келганидан норозилигини билдирган.
The Wall Street Journal газетасининг масаладан хабардор манбаларга таянган ҳолда ёзишича, Марказий разведка бошқармаси директори Билл Бернс Саудия Арабистони валиаҳд шаҳзодаси Муҳаммад бин Салмонга ташрифи чоғида АҚШ қиролликнинг Эрон ва унинг иттифоқчиси Сурия билан яқинлашаётганидан «ҳайрон бўлганини» айтган.
Ўтган ой Риёз ва Теҳрон саккиз йиллик узилган алоқалардан сўнг Хитой воситачилиги орқали тўлиқ дипломатик алоқаларни тиклашга келишиб олдилар, буни халқаро ҳамжамиятда кўпчилик АҚШнинг Яқин Шарқ ва бутун дунёда гегемонлигига зарба сифатида баҳолади.
Шунингдек, Саудия Арабистони Суриядаги Башар Асад режими билан муносабатларни нормаллаштиришга тайёргарлик кўраётганининг белгилари ҳам бор эди, бу ҳам Американинг минтақадаги асосий ташқи сиёсат позициясига зид келади.
Ҳисоботга кўра, Марказий разведка бошқармаси директори ва АҚШ ҳукумати Вашингтоннинг минтақавий ўзгаришлардан четда қолиб кетганидан ҳафсаласи пир бўлганидан ва бунинг натижасида ўзини четда ҳис қилганидан хавотирда эди.
Ҳужжатда, шунингдек, АҚШ расмийси Бернс Саудия Арабистони расмийлари билан биринчи навбатда разведка ва терроризмга қарши ҳамкорликни муҳокама қилганини тасдиқлагани хабар қилинган.
Manba:Azon.uz
