АҚШ март ойи ўрталарида яширинча гипертовушли ракетани синовдан ўтказди. Россия билан муносабатлардаги кескинлик кучайишига йўл қўймаслик учун бу воқеа ошкор этилмаган деб хабар бермоқда CNN нашри.
CNN маълумотларига кўра, гап Пентагоннинг гипертовушли ҳаво орқали ишловчи қуроллар концепцияси доирасида ишлаб чиқилаётган ракета ҳақида кетмоқда. Синовлар муваффақиятли ўтган.
Таъкидланишича, ракета Б-52 бомбардимончи самолётидан Тинч океани узра учирилган. У 19 километрдан ортиқ баландликда 480 километрдан ортиқ масофани босиб ўтди. Ракетанинг максимал парвоз тезлиги товуш тезлигидан камида беш баравар кўп эди.
Бундан ташқари, бу гипертовушли ракетанинг иккинчи муваффақиятли синови бўлиб, биринчиси 2021 йил сентябрь ойида бўлиб ўтган.
Америка расмийлари Россия билан муносабатларда кескинликни келтириб чиқармаслик учун синов фактини яширишди. Ҳозирда эса АҚШ ва Россия ўртасидаги муносабатлар энг паст даражага етганини кўришимиз мумкин.
