Ёш гандболчиларимиз Эрондаги халқаро турнирда совриндор бўлишди
Жорий йил 13-20 январь кунлари Эрон Ислом Республикасининг Хузестан шаҳрида гандбол бўйича 2002-2004 йилларда туғилган ёшлар ўртасида халқаро турнир бўлиб ўтди. Турнирда шу ёш тоифасида дунёнинг энг кучли жамоалари иштирок этди.
Ўзбекистон гандбол федерацияси бош котиби Исмоил Матхаликовнинг хабар беришича, мазкур нуфузли мусобақада қатнашган мамлакатимиз терма жамоаси аъзолари шоҳсупанинг 3-поғонасига кўтарилишди. Бу билан ўзбекистонлик гандболчилар 2022 йилдаги илк халқаро турнирни катта ютуқ билан бошлаб беришди.
Вакилларимиз мусобақа давомида Ироқ (28:15), Грузия (43:29), Туркия (33:26), Эрон ёшлар терма жамоаси (38:21) устидан ғалаба қозонган бўлса, мусобақа мезбонларининг 2004 йилда туғилган ёшлар терма жамоасига 23:22 ҳамда 2002 йилда туғилган ёшларига 34:22 ҳисобида имкониятни бой беришди.
Сафар давомида мамлакатимиз спорт делегациясига Исмоилжон Матхолиқов раҳбарлик қилган бўлса, бош мураббий вазифаси Ботир Караджаевга ишониб топширилди.
