Бугун Соғлиқни сақлаш вазири Амрилло Иноятов Беларус Республикаси делегацияси вакиллари билан учрашув ўтказди.
Унда ушбу мамлакатнинг Ўзбекистондаги Фавқулодда ва мухтор элчиси Леонид Маринич, Беларус Республикаси Миллий Кенгаши Вакиллар палатасининг хориждаги беларуслар ишлари бўйича Парламент гуруҳи раҳбари Валентина Ражанес, мазкур палатанинг Спорт, соғлиқни сақлаш, маданият, оила ва ёшлар масалалари бўйича Парламент комиссияси раиси, профессор Людмила Макарина-Кибак иштирок этди.
Мулоқот аввалида меҳмонларга кейинги йилларда давлатимиз раҳбари ташаббуси билан соғлиқни сақлаш соҳасида амалга оширилаётган кенг кўламли ислоҳотлар ҳақида маълумот берилди.
Ўз навбатида, Беларус делегацияси вакиллари ўз мамлакатида она ва бола саломатлигини муҳофаза қилиш бўйича эришилган ютуқлар хусусида сўзлаб берди.
Маълумки, Беларус оналар ва гўдаклар ўлими кўрсаткичи энг паст давлатлардан бири. Бу ерда оналик ва болаликни муҳофаза қилиш бўйича такомиллашган меъёрий-ҳуқуқий база шаклланган, кадрларни тайёрлаш бўйича самарали тизим яратилган.
Шундан келиб чиқиб, учрашувда Қашқадарёда барпо этилган Она ва бола саломатлиги тиббиёт маркази фаолиятига Беларус бошқарув тизимини жорий этиш масаласи кўриб чиқилди. Бунинг учун Беларус Она ва бола саломатлиги илмий-амалий марказининг мутахассисларини жалб қилишга келишиб олинди.
Шунингдек, меҳмонлар бу соҳадаги қонунчиликни такомиллаштириш, шу жумладан Ўзбекистон соғлиқни сақлаш кодексини ишлаб чиқишда яқиндан ёрдам беришга тайёрлигини билдирди.
Кун тартибидан ўрин олган яна бир масала – бирламчи бўғинда меҳнат қилаётган акушерларни Беларус таълим стандартлари асосида ўқитиш бўлди. Бу борада эришилган келишувга кўра, дастлабки босқичда Қашқадарё вилоятида бирламчи амбулатор тизимда фаолият юритаётган 900 нафар доя халқаро протоколлар асосида миллий мақсадлар ва демографик вазиятни ҳисобга олган ҳолда ўқитилади.
Якуний имтиҳон чет эллик экспертлар томонидан қабул қилиниб, ундан муваффақиятли ўтганлар халқаро сертификатга эга бўлади.
Мулоқот давомида шу йил 13-24 ноябрь кунлари мамлакатимизда ўтказилиши режалаштирилган Беларус тиббиёти кунларига тайёргарлик кўриш масаласи ҳам муҳокама қилинди.
Мазкур акция доирасида дўст мамлакатдан юртимизга болалар онкогематологияси, кардиология, онкология, неонатология каби йўналишлар бўйича етакчи мутахассислар, олимлар ташриф буюриши режалаштирилган. Улар иштирокида ҳудудларда юқори технологик жарроҳлик амалиётлари, маҳорат дарслари, консилиум ва семинарлар ташкил этилади.
Қолаверса, ана шу акциянинг мантиқий давоми сифатида ноябрь ойи якунида Минск шаҳрида Ўзбекистон – Беларус тиббиёт форуми ўтказилади. Икки давлат ўртасидаги тиббий ҳамкорликни мутлақо янги босқичга кўтаришга хизмат қиладиган ушбу нуфузли тадбирга юртимиздаги ҳудудий соғлиқни сақлаш бошқармалари, ихтисослаштирилган тиббиёт марказлари раҳбарлари ташриф буюриши кутилмоқда.
Ўзаро ҳамкорлик алоқаларини туман даражасида ривожлантириш мақсадида форумда туман тиббиёт бирлашмалари масъуллари, шунингдек тиббиёт техникумлари ва тиббий олийгоҳлар раҳбарлари ҳам иштирок этади.
Тадбир якунида ўзаро манфаатли қатор меморандум ва келишувлар имзоланиши кўзда тутилган.
