Мамлакатимизда тиббиётнинг бирламчи бўғинини мутлақо янгича ёндашувлар асосида трансформация қилишга киришилган.Хусусан, жорий йилнинг ўтган даврида 22 та оилавий поликлиника, 93 та оилавий шифокор пункти ва 394 та маҳалла тиббиёт пункти ташкил этилиб, бирламчи бўғин муассасалари умумий сони 3586 тадан 4095 тага етказилди.
Шунингдек, ўтган йилдан бошлаб, ҳар бир маҳаллада “хонадонбай” тамойили асосида фаолият кўрсатувчи 17 400 та тиббий бригада ташкил этилди.
Универсал-прогрессив патронаж модели жорий қилиниб, 500 минг нафардан зиёд ҳомиладор, 3,9 млн. нафар 5 ёшгача болалар, 146 минг нафар уйда ётиб қолган, ўзгалар парваришига муҳтож ногиронлиги бор шахслар ушбу тиббий хизмат тури билан қамраб олинди.
Шу кунгача юртимиз бўйлаб 32 млн. нафар аҳоли “Электрон поликлиника” платформасига бириктирилди ва электрон тиббий картани юритиш тизими жорий этилди.
Оилавий шифокор пунктлари, оилавий поликлиника ва туман (шаҳар) кўп тармоқли марказий поликлиникаларида кундузги стационар иш вақти соат 20:00 га қадар узайтирилди ҳамда уларда ишловчи тиббиёт ходимлари учун қўшимча устама ҳақ тўлаш йўлга қўйилди.
Натижада 134 минг нафар беморга бирламчи тиббий-санитария ёрдами муассасаларининг кундузги шифохоналарида уйидан ажралмаган ҳолда даволаниш имконияти яратилди.
