Замонавий тиббиётнинг энг катта ютуқларидан бири, шубҳасиз, телетиббиётдир. Айниқса, шошилинч тиббий ёрдам кўрсатишда унинг натижадорлиги юқори.
Шу боисдан ҳам бугунги кунда Республика шошилинч тиббий ёрдам илмий маркази ва унинг филиалларида телемедицина орқали беморларни даволашга алоҳида эътибор қаратиляпти.
Хусусан, жорий йилнинг ўтган 5 ойи давомида телетиббиёт орқали 200 маротаба (2022 йил шу даврига нисбатан 80 тага кўп) боғланишларда 800 та маслаҳат, 16 та консилиум, 27 та намойиш операциялари ўтказилди. Натижада 900 нафарга яқин беморни яшаш жойида даволаш имконияти яратилди.
Шунингдек, марказлар фаолиятига илғор хорижий давлатлардан экспертлар жалб қилинган ҳолда замонавий менежмент тизимини такомиллаштириш, соҳага янги инновацион даволаш ва диагностика усулларини жорий этишни жадаллаштириш, илмий-амалий ҳамкорликни кенг йўлга қўйиш ишлари мунтазам ташкил этилмоқда.
Мисол учун, жигар трансплантология йўналиши бўйича Ҳиндистон ва Туркия марказлари билан, нейрохирургия йўналишида Япония, хирургия бўйича Озарбайжон маркази билан амалий ишлар бошлаб юборилди.
Қолаверса, йил якунигача марказнинг ҳудудий филиалларида интервенцион амалиётлар йўлга қўйилади. Натижада 9 турдаги янги жарроҳлик ва диагностика усуллари амалиётга татбиқ қилинади.
