Актёр Бахшилло Фатуллаев шу кунларда ўзбек ва турк киноижодкорлари томонидан суратга олинаётган “Юр муҳаббат” сериалида Турғун исмли бадавлат тадбиркор ролини ижро қилмоқда.
Сериал продюсери Руслан Мирзаев, режиссёр Шуҳрат Саломов. Сериалда таниқли ўзбек актёрларидан Улуғбек Қодиров, Гавҳар Зокирова, Ситора Алимжонова ва бошқалар иштирок этишмоқда. Сериалда шунингдек, турк актёрлари ҳам иштирок этиши кутилмоқда.
Бу сериалда актёр Бахшилло Фатуллаев қаҳрамони тадбиркор Турғун дастлаб, томошабинда салбий образдек таассурот қолдиради. Унинг укаси Мурод жиноятчи. Аммо, Турғун ўз укасининг ҳаракатларини ёқламайди. Унинг ўз ҳақиқати бўлиб, ўз дунёқарашига эга инсон.
Сериал давомида дастлаб ҳеч нарсадан ками йўқ, беташвишдек кўринган Турғуннинг юрагини, йиллар давомида кемириб келаётган дарди борлиги аён бўлади. У томошабинлар ўйлаганидек жиноятчи эмас.
Турғун ўзининг ёшлик даврида қилган энг катта хатосини тузатишга умр бўйи ҳаракат қилиб келаётган инсон бўлиб чиқади. Бу хато, уни йиллар давомида ҳаловатини ўғирлаган, юрагига тошдек ботган эди. Бахшилло Фатуллаев ижросидаги бу ролни кўриб, томошабинлар бир умр айбдорлик ҳисси билан яшаш қанчалик оғирлигини тушунадилар. Қанчалар бадавлат ва катта имкониятга эга бўла туриб, ёшликдаги биргина хатосини тузата олмаётгани туфайли, ҳеч нарса татимаётган бу қаҳрамон, Бахшилло Фатуллаев ижросида янада дардли характерда намоён бўлиши шубҳасиз.
Қаҳрамон ўз хатосини тузатишининг имкони борми? Буни албатта, сериални кўриб билиш мумкин.
Бу характерли образни яратишга ҳам актёр Бахшилло Фатуллаев катта масъулият билан ёндошмоқда.
Сериалнинг суратга олиш ишлари Ўзбекистон ва Туркияда бўлиб ўтиши режалаштирилган.
Топ статей за 7 дней
Подпишитесь на нас
- Advertisement -
